ਬੱਚਿਓ! ਪੜ੍ਹਾਈ ਵਿੱਚ ਸਖ਼ਤ ਮਿਹਨਤ ਕਰੋ

ਪਿਆਰੇ ਬੱਚਿਓ! ਜ਼ਿੰਦਗੀ ਵਿੱਚ ਸਫ਼ਲਤਾ ਪ੍ਰਾਪਤ ਕਰਨ ਲਈ ਮਿਹਨਤ ਦਾ ਕੋਈ ਬਦਲ ਨਹੀਂ | ਪੜ੍ਹਾਈ ਵਿਦਿਆਰਥੀ ਜੀਵਨ ਦਾ ਸਭ ਤੋਂ ਮਹੱਤਵਪੂਰਨ ਹਿੱਸਾ ਹੈ | ਜਿਹੜੇ ਬੱਚੇ ਆਪਣੀ ਪੜ੍ਹਾਈ ਪ੍ਰਤੀ ਇਮਾਨਦਾਰ ਰਹਿੰਦੇ ਹਨ ਅਤੇ ਨਿਯਮਿਤ ਮਿਹਨਤ ਕਰਦੇ ਹਨ, ਉਹ ਆਪਣੇ ਗਿਆਨ ਵਿੱਚ ਵਾਧਾ ਕਰਨ ਦੇ ਨਾਲ-ਨਾਲ ਆਪਣੇ ਭਵਿੱਖ ਨੂੰ ਵੀ ਮਜ਼ਬੂਤ ਬਣਾਉਂਦੇ ਹਨ |

ਬੱਚਿਓ! ਪੜ੍ਹਾਈ ਨੂੰ ਬੋਝ ਨਾ ਸਮਝੋ | ਇਸ ਨੂੰ ਆਪਣੇ ਸੁਪਨਿਆਂ ਨੂੰ ਪੂਰਾ ਕਰਨ ਦਾ ਸਾਧਨ ਸਮਝੋ | ਹਰ ਰੋਜ਼ ਸਕੂਲ ਵਿੱਚ ਧਿਆਨ ਨਾਲ ਪੜ੍ਹੋ, ਅਧਿਆਪਕਾਂ ਦੀਆਂ ਗੱਲਾਂ ਨੂੰ ਧਿਆਨ ਨਾਲ ਸੁਣੋ ਅਤੇ ਜੋ ਗੱਲ ਸਮਝ ਨਾ ਆਵੇ, ਉਸ ਬਾਰੇ ਬੇਝਿਜਕ ਸਵਾਲ ਪੁੱਛੋ | ਸਵਾਲ ਪੁੱਛਣਾ ਕਮਜ਼ੋਰੀ ਨਹੀਂ, ਸਗੋਂ ਸਿੱਖਣ ਦੀ ਨਿਸ਼ਾਨੀ ਹੈ |
ਸਖ਼ਤ ਮਿਹਨਤ ਦਾ ਅਰਥ ਇਹ ਨਹੀਂ ਕਿ ਤੁਸੀਂ ਹਰ ਸਮੇਂ ਕਿਤਾਬਾਂ ਵਿੱਚ ਹੀ ਲੱਗੇ ਰਹੋ | ਇਸ ਦਾ ਅਰਥ ਹੈ ਕਿ ਤੁਸੀਂ ਆਪਣੇ ਸਮੇਂ ਦੀ ਸਹੀ ਵਰਤੋਂ ਕਰੋ ਅਤੇ ਪੜ੍ਹਾਈ ਲਈ ਨਿਯਮਿਤ ਸਮਾਂ ਕੱਢੋ | ਇੱਕ ਚੰਗੀ ਸਮਾਂ-ਸਾਰਣੀ ਬਣਾਓ | ਔਖੇ ਵਿਸ਼ਿਆਂ ਲਈ ਵਧੇਰੇ ਅਭਿਆਸ ਕਰੋ ਅਤੇ ਪਿਛਲੇ ਪਾਠਾਂ ਦੀ ਦੁਹਰਾਈ ਵੀ ਕਰਦੇ ਰਹੋ | ਲਿਖਣ, ਪੜ੍ਹਨ ਅਤੇ ਰਚਨਾਤਮਿਕ ਗਤੀਵਿਧੀਆਂ ਵਿੱਚ ਨਿਯਮਿਤ ਅਭਿਆਸ, ਤੁਹਾਡੀ ਸਿੱਖਿਆ ਨੂੰ ਹੋਰ ਮਜ਼ਬੂਤ ਕਰੇਗਾ |
ਬੱਚਿਓ ! ਕਈ ਵਾਰ ਮਿਹਨਤ ਕਰਨ ਦੇ ਬਾਵਜੂਦ ਵੀ ਮਨਚਾਹੇ ਨਤੀਜੇ ਨਹੀਂ ਮਿਲਦੇ | ਅਜਿਹੇ ਸਮੇਂ ਨਿਰਾਸ਼ ਹੋਣ ਦੀ ਬਜਾਏ ਆਪਣੀਆਂ ਗ਼ਲਤੀਆਂ ਤੋਂ ਸਿੱਖੋ | ਅਸਫ਼ਲਤਾ ਨੂੰ ਅੰਤ ਨਾ ਸਮਝੋ | ਇਹ ਤੁਹਾਨੂੰ ਆਪਣੀਆਂ ਕਮੀਆਂ ਪਛਾਣ ਕੇ ਹੋਰ ਵਧੀਆ ਕਰਨ ਦਾ ਮੌਕਾ ਦਿੰਦੀ ਹੈ |
ਯਾਦ ਰੱਖੋ ਕਿ ਛੋਟੇ-ਛੋਟੇ ਨਿਯਮਿਤ ਯਤਨ ਹੀ ਵੱਡੀ ਸਫ਼ਲਤਾ ਦਾ ਰਾਹ ਬਣਾਉਂਦੇ ਹਨ | ਅੱਜ ਕੀਤੀ ਮਿਹਨਤ ਕੱਲ੍ਹ ਤੁਹਾਡੇ ਲਈ ਮਾਣ ਅਤੇ ਖੁਸ਼ੀ ਦਾ ਕਾਰਨ ਬਣ ਸਕਦੀ ਹੈ | ਇਸ ਲਈ ਆਪਣੇ ਸੁਪਨੇ ਵੱਡੇ ਰੱਖੋ, ਮਿਹਨਤ ਨੂੰ ਆਪਣਾ ਸਾਥੀ ਬਣਾਓ ਅਤੇ ਹਰ ਰੋਜ਼ ਕੁਝ ਨਵਾਂ ਸਿੱਖਣ ਦਾ ਯਤਨ ਕਰਦੇ ਰਹੋ |

-(ਸਟੇਟ ਐਵਾਰਡੀ) ਮੁੱਖ ਅਧਿਆਪਕ, ਸਰਕਾਰੀ ਪ੍ਰਾਇਮਰੀ ਸਮਾਰਟ ਸਕੂਲ, ਮਲੂਕਾ (ਬਠਿੰਡਾ)
ਫ਼ੋਨ : 98720-895