ਸ਼ਾਇਦ ਤੁਸੀਂ ਨਹੀਂ ਜਾਣਦੇ ਕਿ ਆਲੂ ਵਿਚ ਕਿੰਨੇ ਪੋਸ਼ਕ ਤੱਤ ਮੌਜੂਦ ਹਨ | ਇਹ ਵਿਟਾਮਿਨ ਸੀ, ਬੀ-6, ਕਾਪਰ, ਪੋਟਾਸ਼ੀਅਮ, ਮੈਗਨੀਸ਼ੀਅਮ ਅਤੇ ਰੇਸ਼ੇ ਦਾ ਮਹੱਤਵਪੂਰਨ ਸਰੋਤ ਹੈ |
ਇਸ ਵਿਚ ਮੌਜੂਦ ਪੋਸ਼ਕ ਤੱਤ ਕੁਦਰਤੀ ਐਂਟੀਆਕਸੀਡੈਂਟ ਹੁੰਦੇ ਹਨ | ਇਸ ਵਿਚ ਸਿਹਤ ਵਿਚ ਵਾਧਾ ਕਰਨ ਵਾਲੇ ਮਹੱਤਵਪੂਰਨ ਗੁਣ ਕੈਰੋਟੋਨਾਈਪਡਸ, ਫਲੈਵੋਨਾਈਡਸ, ਕੈਫੇਕ ਐਸਿਡ ਅਤੇ ਪ੍ਰੋਟੀਨ ਨੂੰ ਇਕੱਠਾ ਕਰਨ ਵਾਲਾ ਯੋਗਿਕ ਜਿਵੇਂ ਪੇਆਟਿਨ ਭਰਪੂਰ ਮਾਤਰਾ ਵਿਚ ਹੁੰਦੇ ਹਨ | ਇਹ ਸਾਡੇ ਸਰੀਰ ਦੀ ਰੋਗ ਪ੍ਰਤੀਰੋਧੀ ਸ਼ਕਤੀ ਨੂੰ ਵਧਾਉਣ ਵਿਚ ਸਹਾਇਕ ਸਿੱਧ ਹੁੰਦੇ ਹਨ | ਇਨ੍ਹਾਂ ਵਿਚ ਬਲੱਡ ਪ੍ਰੈੱਸ਼ਰ ਨੂੰ ਘੱਟ ਕਰਨ ਵਾਲਾ ਤੱਤ ਜਿਵੇਂ ਕਿਊਕੋਮਾਈਨਸ ਵੀ ਮੌਜੂਦ ਹੁੰਦਾ ਹੈ |
ਜਿਹੜੇ ਲੋਕ ਆਪਣਾ ਵਜ਼ਨ ਘੱਟ ਕਰਨਾ ਚਾਹੁੰਦੇ ਹਨ, ਪਹਿਲਾਂ ਉਨ੍ਹਾਂ ਨੂੰ ਆਲੂ ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦਿੱਤੀ ਜਾਂਦੀ ਸੀ, ਪਰ ਇਹ ਸਹੀ ਨਹੀਂ ਹੈ | ਹੁਣ ਭੋਜਨ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਵਿਚ ਕੈਲੋਰੀ ਦੀ ਮਾਤਰਾ ਬਹੁਤ ਘੱਟ ਹੁੰਦੀ ਹੈ, ਜਦ ਕਿ ਕਾਰਬੋਹਾਈਡ੍ਰੇਟਸ ਇਸ ਵਿਚ ਭਰਪੂਰ ਮਾਤਰਾ ਵਿਚ ਪਾਇਆ ਜਾਂਦਾ ਹੈ | ਜਦੋਂ ਅਸੀਂ ਇਸ ਨੂੰ ਤਲ ਕੇ ਖਾਂਦੇ ਹਾਂ ਤਾਂ ਇਸ ਵਿਚੋਂ ਪੋਸ਼ਕ ਤੱਤ ਖ਼ਤਮ ਹੋ ਜਾਂਦੇ ਹਨ |
ਜੇਕਰ ਇਸ ਨੂੰ ਪਕਾਉਣ ਦੇ ਢੰਗ ਵਿਚ ਬਦਲਾਅ ਲਿਆਂਦਾ ਜਾਵੇ ਤਾਂ ਅਸੀਂ ਇਸ ਤੋਂ ਬਹੁਤ ਲਾਭ ਲੈ ਸਕਦੇ ਹਾਂ | ਜਿਵੇਂ ਤਲਣ ਦੀ ਬਜਾਏ ਜੇਕਰ ਇਸ ਨੂੰ ਉਬਾਲ ਕੇ ਵੱਖ-ਵੱਖ ਰੂਪਾਂ ਵਿਚ ਵਰਤਿਆ ਜਾਵੇ ਤਾਂ ਬਿਹਤਰ ਹੋਵੇਗਾ | ਉਬਲੇ ਹੋਏ ਆਲੂਆਂ ਤੋਂ ਤੁਸੀਂ ਆਲੂ ਦੀ ਚਾਟ ਤਿਆਰ ਕਰ ਸਕਦੇ ਹੋ ਜਾਂ ਫਿਰ ਇਨ੍ਹਾਂ ਨੂੰ ਛੋਲਿਆਂ ਨਾਲ ਮਿਲਾ ਕੇ ਖਾ ਸਕਦੇ ਹੋ | ਇਸ ਤੋਂ ਇਲਾਵਾ ਪਰਮਲ ਵਿਚ ਵੀ ਉਬਲੇ ਹੋਏ ਆਲੂ ਪਾ ਕੇ ਖਾਧੇ ਜਾਂਦੇ ਹਨ |
ਜੇਕਰ ਆਲੂ ਦਾ ਪਰੌਂਠਾ ਖਾਣ ਦੇ ਸ਼ੌਕੀਨ ਹੋ ਤਾਂ ਇਸ ਵਿਚ ਹੋਰ ਸਬਜ਼ੀਆਂ ਮਿਲਾ ਕੇ ਪਰੌਂਠਾ ਬਣਾਓ | ਇਹ ਸਿਹਤਮੰਦ ਵੀ ਹੋਵੇਗਾ ਤੇ ਸਵਾਦੀ ਵੀ | ਨਾਲ ਹੀ ਆਲੂਆਂ ਦੇ ਪੋਸ਼ਕ ਤੱਤਾਂ ਨੂੰ ਖ਼ਤਮ ਹੋਣ ਤੋਂ ਬਚਾਉਣ ਲਈ ਤੁਸੀਂ ਇਸ ਨੂੰ ਭੋਜਨ ਵਿਚ ਬੇਕ ਕਰਕੇ ਵੀ ਖਾ ਸਕਦੇ ਹੋ |
ਮਿੱਠੇ ਆਲੂਆਂ ਨੂੰ ਅਕਸਰ ਸੁਆਣੀਆਂ ਪਸੰਦ ਨਹੀਂ ੰਕਰਦੀਆਂ | ਸ਼ਾਇਦ ਇਸ ਤਰ੍ਹਾਂ ਉਹ ਇਸ ਦੇ ਸਵਾਦ ਦੇ ਕਾਰਨ ਕਰਦੀਆਂ ਹਨ | ਜੇਕਰ ਤੁਸੀਂ ਵੀ ਇਸ ਤਰ੍ਹਾਂ ਕਰਦੇ ਹੋ ਤਾਂ ਧਿਆਨ ਦਿਓ ਕਿ ਮਿੱਠੇ ਆਲੂ ਵੀ ਪੋਟਾਸ਼ੀਅਮ, ਰੇਸ਼ੇ ਤੇ ਕੈਰੋਟੇਨਾਈਡਸ ਦੇ ਚੰਗੇ ਸਰੋਤ ਹਨ | ਇਸ ਵਿਚ ਭਰਪੂਰ ਮਾਤਰਾ ਵਿਚ ਐਂਟੀਆਕਸੀਡੈਂਟ ਹੁੰਦੇ ਹਨ | ਇਨ੍ਹਾਂ ਵਿਚ ਵੀ ਸਾਧਾਰਨ ਆਲੂਆਂ ਵਾਂਗ ਆਇਰਨ, ਵਿਟਾਮਿਨ ਏ, ਸੀ, ਮੈਗਨੀਸ਼ੀਅਮ, ਕਾਪਰ ਤੇ ਰੇਸ਼ਾ ਭਰਪੂਰ ਮਾਤਰਾ ਵਿਚ ਪਾਇਆ ਜਾਂਦਾ ਹੈ | ਨਾਲ ਹੀ ਇਹ ਊਰਜਾ ਨੂੰ ਵਧਾਉਣ ਵਿਚ ਵੀ ਸਹਾਇਕ ਹਨ |
-0-
