ਸਾਨ ਫਰਾਂਸਿਸਕੋ, 7 ਮਾਰਚ (ਐਸ. ਅਸ਼ੋਕ ਭੌਰਾ)-ਪੀ.ਸੀ.ਏ. (ਪੰਜਾਬ ਕਲਚਰਲ ਐਸੋਸੀਏਸ਼ਨ) ਬਰੈਂਟਵੁੱਡ ਵੱਲੋ ਦੂਜੀ 'ਧੀਆਂ ਦੀ ਲੋਹੜੀ' ਬੜੇ ਹੀ ਉਤਸ਼ਾਹ ਤੇ ਰੌਣਕ ਭਰੇ ਮਾਹੌਲ 'ਚ ਨਾਲ ਮਨਾਈ ਗਈ | ਇਸ ਸਮਾਗਮ 'ਚ ਪੰਜਾਬੀ ਭਾਈਚਾਰੇ ਨੇ ਵੱਡੀ ਗਿਣਤੀ 'ਚ ਭਾਗ ਲਿਆ ਤੇ ਧੀਆਂ ਦੇ ਸਨਮਾਨ 'ਚ ਖੁਸ਼ੀ ਤੇ ਮਾਣ ਨਾਲ ਲੋਹੜੀ ਦੇ ਤਿਉਹਾਰ ਦਾ ਜਸ਼ਨ ਸਾਰਿਆਂ ਲਈ ਨਿਵੇਕਲਾ ਤੇ ਯਾਦਗਾਰੀ ਬਣ ਗਿਆ | ਸਮੁੱਚੇ ਸਮਾਰੋਹ ਦੀ ਖੂਬਸੂਰਤ ਮੇਜ਼ਬਾਨੀ ਮਲਿਕਾ ਆਸ਼ਾ ਸ਼ਰਮਾ ਨੇ ਕੀਤੀ | ਪ੍ਰਸਿੱਧ ਸੂਫੀ ਗਾਇਕ ਸੁਖਦੇਵ ਸਾਹਿਲ ਨੇ ਆਪਣੇ ਰੂਹ-ਰੱਜਵੇਂ ਗੀਤਾਂ ਨਾਲ ਦਰਸ਼ਕਾਂ ਨੂੰ ਮੋਹ ਲਿਆ | ਲੋਕ ਨਾਚ ਭੰਗੜੇ ਦੀ ਪੇਸ਼ਕਸ਼ 'ਫਾਇਵ ਸਟਾਰ ਭੰਗੜਾ ਐਕਡਮੀ' ਵੱਲੋਂ ਕੀਤੀ ਗਈ ਤੇ 'ਰੌਣਕ ਪੰਜਾਬ ਦੀ' ਗਿੱਧਾ ਟੀਮ ਨੇ ਪੰਜਾਬੀਆਂ ਦੇ ਰਵਾਇਤੀ ਲੋਕ ਨਾਚ ਗਿੱਧਾ ਦੀ ਪੇਸ਼ਕਾਰੀ ਨੇ ਇਕ ਤਰਾਂ ਸਿਖਰ ਕਰ ਦਿੱਤੀ | ਸਮਾਗਮ ਦੌਰਾਨ ਆਸ਼ਾ ਸ਼ਰਮਾ ਨੂੰ 'ਧੀ ਪੰਜਾਬ ਦੀ' ਐਵਾਰਡ ਤੇ ਪ੍ਰਸਿੱਧ ਸੂਫੀ ਗਾਇਕ ਸੁਖਦੇਵ ਸਾਹਿਲ ਨੂੰ 'ਸੁਰਾਂ ਦਾ ਬਾਦਸ਼ਾਹ' ਐਵਾਰਡ ਪ੍ਰਦਾਨ ਕੀਤਾ ਗਿਆ | ਪੀ.ਸੀ.ਏ. ਦੇ ਚੇਅਰਮੈਨ ਭੁਪਿੰਦਰ ਸਿੰਘ ਬਾਜਵਾ ਨੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਇਸ ਸਾਲ ਦੀ 'ਧੀਆਂ ਦੀ ਲੋਹੜੀ' ਬੇਹੱਦ ਕਾਮਯਾਬ ਰਹੀ ਤੇ ਕਮਿਊਨਿਟੀ ਵੱਲੋਂ ਵੀ ਵੱਡਾ ਸਹਿਯੋਗ ਮਿਲਿਆ | ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਪੀ.ਸੀ.ਏ. ਬ੍ਰੈਂਟਵੁੱਡ ਪਹਿਲਾਂ ਵੀ ਕਮਿਊਨਿਟੀ ਸੇਵਾ ਤਹਿਤ ਬਲੱਡ ਡਰਾਈਵ ਆਯੋਜਿਤ ਕਰ ਚੁੱਕੀ ਹੈ ਤੇ ਇਸ ਸਾਲ ਮੁੜ ਬਲੱਡ ਡੋਨੇਸ਼ਨ ਕੈਂਪ ਲਗਾਉਣ ਦੀ ਯੋਜਨਾ ਹੈ | ਇਸ ਤੋਂ ਇਲਾਵਾ, 4 ਜੁਲਾਈ ਨੂੰ ਅਮਰੀਕਨ ਆਜ਼ਾਦੀ ਪਰੇਡ ਦੌਰਾਨ ਮੁਫ਼ਤ ਪਾਣੀ ਵੰਡਣ ਦਾ ਪ੍ਰੋਗਰਾਮ ਵੀ ਕਰਵਾਇਆ ਜਾਵੇਗਾ | ਇਹ ਸਮਾਗਮ ਧੀਆਂ ਦੀ ਅਹਿਮੀਅਤ ਨੂੰ ਉਭਾਰਨ ਤੇ ਕਮਿਊਨਿਟੀ ਸੇਵਾ ਦੀ ਭਾਵਨਾ ਨੂੰ ਮਜ਼ਬੂਤ ਕਰਨ ਵੱਲ ਇਕ ਮਹੱਤਵਪੂਰਨ ਕਦਮ ਤੇ ਕੜੀ ਸਾਬਤ ਹੋਇਆ |
