ਕਾਰ ਬੂਟ ਸੇਲ ਤੋਂ 25 ਪਾਉਂਡ ਵਿਚ ਖਰੀਦਿਆ ਕੈਪਟਨ ਕੁੱਕ ਦਾ ਤਗਮਾ ਨਿਲਾਮੀ 'ਚ 5,000 ਪਾਉਂਡ ਵਿਚ ਵਿਕਿਆ

ਲੈਸਟਰ (ਇੰਗਲੈਂਡ), 10 ਮਈ (ਸੁਖਜਿੰਦਰ ਸਿੰਘ ਢੱਡੇ)-ਬਰਤਾਨੀਆ ਦੇ ਪ੍ਰਸਿੱਧ ਸਮੁੰਦਰੀ ਖੋਜੀ ਕੈਪਟਨ ਜੇਮਜ਼ ਕੁੱਕ ਦੀ ਯਾਦ ਵਿਚ ਤਿਆਰ ਕੀਤਾ ਗਿਆ 18ਵੀਂ ਸਦੀ ਦਾ ਇਕ ਬਹੁਤ ਹੀ ਦੁਰਲੱਭ ਕਾਂਸੀ ਦਾ ਤਗਮਾ ਵੈਸਟ ਯਾਰਕਸ਼ਾਇਰ ਦੀ ਇਕ ਕਾਰ ਬੂਟ ਸੇਲ ਤੋਂ ਸਿਰਫ਼ 25 ਪਾਉਂਡ ਵਿਚ ਖਰੀਦਿਆ ਗਿਆ ਸੀ, ਜੋ ਹੁਣ ਨਿਲਾਮੀ ਦੌਰਾਨ 5,000 ਪਾਉਂਡ ਵਿਚ ਵਿਕ ਕੇ ਚਰਚਾ ਦਾ ਕੇਂਦਰ ਬਣ ਗਿਆ ਹੈ | ਇਹ ਇਤਿਹਾਸਕ ਤਗਮਾ ਹੁਣ ਵਿਟਬੀ ਸਥਿਤ ਕੈਪਟਨ ਕੁੱਕ ਮੈਮੋਰੀਅਲ ਮਿਊਜ਼ੀਅਮ ਵੱਲੋਂ ਖਰੀਦਿਆ ਗਿਆ ਹੈ | ਮਿਊਜ਼ੀਅਮ ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਇਸ ਤਮਗੇ ਨੂੰ ਕੈਪਟਨ ਕੁੱਕ ਦੇ ਜਨਮ ਦੇ 300 ਸਾਲ ਪੂਰੇ ਹੋਣ ਮੌਕੇ ਲਗਾਈ ਜਾਣ ਵਾਲੀ ਵਿਸ਼ੇਸ਼ ਪ੍ਰਦਰਸ਼ਨੀ ਵਿਚ ਰੱਖਿਆ ਜਾਵੇਗਾ | ਕੈਪਟਨ ਜੇਮਜ਼ ਕੁੱਕ ਦਾ ਜਨਮ 1728 ਵਿਚ ਹੋਇਆ ਸੀ ਅਤੇ ਉਹ ਦੁਨੀਆ ਦੇ ਸਭ ਤੋਂ ਮਸ਼ਹੂਰ ਖੋਜੀਆਂ ਵਿਚੋਂ ਇਕ ਮੰਨੇ ਜਾਂਦੇ ਹਨ | ਜਿਸ ਵਿਅਕਤੀ ਨੇ ਇਹ ਤਮਗਾ ਖਰੀਦਿਆ ਸੀ, ਉਸ ਨੇ ਦੱਸਿਆ ਕਿ ਉਹ ਵੈਸਟ ਯਾਰਕਸ਼ਾਇਰ ਦੀ ਇਕ ਕਾਰ ਬੂਟ ਸੇਲ 'ਤੇ ਗਿਆ ਸੀ, ਜਿੱਥੇ ਉਸ ਨੇ ਪੁਰਾਣੇ ਸਿੱਕਿਆਂ ਅਤੇ ਤਮਗਿਆਂ ਨਾਲ ਭਰਿਆ ਇਕ ਡੱਬਾ ਸਿਰਫ਼ 25 ਪਾਉਂਡ ਵਿਚ ਖਰੀਦ ਲਿਆ | ਉਸ ਸਮੇਂ ਉਸ ਨੂੰ ਇਹ ਅਹਿਸਾਸ ਨਹੀਂ ਸੀ ਕਿ ਉਸ ਡੱਬੇ ਵਿਚ ਕੈਪਟਨ ਕੁੱਕ ਨਾਲ ਸਬੰਧਤ ਇਕ ਇਤਿਹਾਸਕ ਅਤੇ ਬਹੁਤ ਦੁਰਲੱਭ ਤਮਗਾ ਵੀ ਮੌਜੂਦ ਹੈ | ਬਾਅਦ ਵਿਚ ਜਦੋਂ ਮਾਹਿਰਾਂ ਨੇ ਜਾਂਚ ਕੀਤੀ ਤਾਂ ਪਤਾ ਲੱਗਿਆ ਕਿ ਇਹ ਤਮਗਾ 18ਵੀਂ ਸਦੀ ਵਿਚ ਕੈਪਟਨ ਕੁੱਕ ਦੀ ਮੌਤ ਦੀ ਯਾਦ ਵਿਚ ਤਿਆਰ ਕੀਤਾ ਗਿਆ ਸੀ | ਇਹ ਤਮਗਾ ਕਾਫ਼ੀ ਦੁਰਲੱਭ ਹੈ ਅਤੇ ਇਸ ਵਰਗੇ ਸਿਰਫ਼ ਦੋ ਹੋਰ ਨਮੂਨੇ ਹੀ ਦੁਨੀਆ ਭਰ ਦੇ ਮਿਊਜ਼ੀਅਮਾਂ ਵਿਚ ਦਰਜ ਹਨ | ਇਕ ਨਮੂਨਾ ਗ੍ਰੀਨਵਿਚ ਅਤੇ ਦੂਜਾ ਆਸਟ੍ਰੇਲੀਆ ਦੇ ਸਿਡਨੀ ਮਿਊਜ਼ੀਅਮ ਵਿਚ ਮੌਜੂਦ ਹੈ | ਟੈਨੈਂਟਸ ਆਕਸ਼ਨੀਅਰਜ਼ ਦੇ ਸਿੱਕਾ ਮਾਹਿਰ ਵਿਲ ਡੌਬਿਨਜ਼ ਨੇ ਕਿਹਾ ਕਿ ਇਹ ਨਿਲਾਮੀ ਬਹੁਤ ਖਾਸ ਰਹੀ | ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਖੁਸ਼ੀ ਹੈ ਕਿ ਇਹ ਤਮਗਾ ਹੁਣ ਕੈਪਟਨ ਕੁੱਕ ਮੈਮੋਰੀਅਲ ਮਿਊਜ਼ੀਅਮ ਵਿਚ ਰੱਖਿਆ ਜਾਵੇਗਾ, ਜਿੱਥੇ ਲੋਕ ਇਸ ਨੂੰ ਨੇੜੇ ਤੋਂ ਦੇਖ ਸਕਣਗੇ | ਉਨ੍ਹਾਂ ਕਿਹਾ ਕਿ ਇਹ ਸਿਰਫ਼ ਇਕ ਤਮਗਾ ਨਹੀਂ, ਸਗੋਂ ਬਰਤਾਨਵੀ ਸਮੁੰਦਰੀ ਇਤਿਹਾਸ ਦੀ ਮਹੱਤਵਪੂਰਨ ਨਿਸ਼ਾਨੀ ਹੈ | ਮਿਊਜ਼ੀਅਮ ਦੇ ਟਰੱਸਟੀ ਬੋਰਡ ਦੇ ਚੇਅਰਮੈਨ ਰਿਚਰਡ ਕੋਰਨਿਕੀ ਨੇ ਦੱਸਿਆ ਕਿ ਇਹ ਤਮਗਾ ਉਸ ਇਮਾਰਤ ਵਿਚ ਰੱਖਿਆ ਜਾਵੇਗਾ ਜਿੱਥੇ ਨੌਜਵਾਨ ਜੇਮਜ਼ ਕੁੱਕ ਨੇ ਸਮੁੰਦਰੀ ਜੀਵਨ ਦੀ ਸਿਖਲਾਈ ਲਈ ਸੀ | ਉਨ੍ਹਾਂ ਕਿਹਾ ਕਿ ਵਿਟਬੀ ਸ਼ਹਿਰ ਕੈਪਟਨ ਕੁੱਕ ਦੇ ਜੀਵਨ ਨਾਲ ਡੂੰਘੇ ਤੌਰ 'ਤੇ ਜੁੜਿਆ ਹੋਇਆ ਹੈ ਅਤੇ ਇਹ ਤਮਗਾ ਮਿਊਜ਼ੀਅਮ ਦੀ ਸ਼ਾਨ ਵਿਚ ਹੋਰ ਵਾਧਾ ਕਰੇਗਾ | ਕੈਪਟਨ ਜੇਮਜ਼ ਕੁੱਕ ਨੇ 1768 ਵਿਚ ਪਾਉਂਡਚਪਾਉਂਡਮ ਬਾਰਕ ਪਾਉਂਡਾਡੇਵਰ ਜਹਾਜ਼ ਰਾਹੀਂ ਆਪਣੀ ਪਹਿਲੀ ਸਮੁੰਦਰੀ ਯਾਤਰਾ ਸ਼ੁਰੂ ਕੀਤੀ ਸੀ | ਉਹ ਤਿੰਨ ਵੱਡੀਆਂ ਸਮੁੰਦਰੀ ਯਾਤਰਾਵਾਂ ਲਈ ਮਸ਼ਹੂਰ ਹਨ, ਜਿਨ੍ਹਾਂ ਦੌਰਾਨ ਉਨ੍ਹਾਂ ਨੇ ਦੁਨੀਆ ਦੇ ਕਈ ਨਵੇਂ ਖੇਤਰਾਂ ਦੀ ਖੋਜ ਕੀਤੀ | ਉਨ੍ਹਾਂ ਨੇ ਤਾਹੀਤੀ ਸਮੇਤ ਕਈ ਟਾਪੂਆਂ ਅਤੇ ਪ੍ਰਸ਼ਾਂਤ ਮਹਾਸਾਗਰ ਦੇ ਇਲਾਕਿਆਂ ਬਾਰੇ ਮਹੱਤਵਪੂਰਨ ਜਾਣਕਾਰੀ ਦੁਨੀਆ ਸਾਹਮਣੇ ਰੱਖੀ | ਉਨ੍ਹਾਂ ਦੀਆਂ ਯਾਤਰਾਵਾਂ ਨੇ ਭੂਗੋਲ, ਸਮੁੰਦਰੀ ਵਿਗਿਆਨ ਅਤੇ ਖਗੋਲ ਵਿਗਿਆਨ ਦੇ ਖੇਤਰਾਂ ਵਿਚ ਵੱਡਾ ਯੋਗਦਾਨ ਪਾਇਆ | 1779 ਵਿਚ ਹਵਾਈ ਟਾਪੂ 'ਚ ਸਥਾਨਕ ਲੋਕਾਂ ਨਾਲ ਹੋਈ ਝੜਪ ਦੌਰਾਨ ਉਨ੍ਹਾਂ ਦੀ ਮੌਤ ਹੋ ਗਈ ਸੀ | ਰੌਇਲ ਮਿੰਟ ਵੱਲੋਂ ਵੀ ਕੈਪਟਨ ਕੁੱਕ ਦੀ ਯਾਦ ਵਿਚ ਕਈ ਯਾਦਗਾਰੀ ਸਿੱਕੇ ਅਤੇ ਤਮਗੇ ਜਾਰੀ ਕੀਤੇ ਜਾ ਚੁੱਕੇ ਹਨ | 1928 ਵਿਚ ਉਨ੍ਹਾਂ ਦੇ ਜਨਮ ਦੇ 200 ਸਾਲ ਪੂਰੇ ਹੋਣ 'ਤੇ ਪਹਿਲਾ ਯਾਦਗਾਰੀ ਸਿੱਕਾ ਜਾਰੀ ਕੀਤਾ ਗਿਆ ਸੀ, ਜਦਕਿ ਹਾਲੀਆ ਸਾਲਾਂ ਵਿਚ ਵੀ ਉਨ੍ਹਾਂ ਦੀਆਂ ਸਮੁੰਦਰੀ ਯਾਤਰਾਵਾਂ ਨੂੰ ਸਮਰਪਿਤ ਵਿਸ਼ੇਸ਼ ਸਿੱਕੇ ਜਾਰੀ ਕੀਤੇ ਗਏ ਹਨ |