ਨਿਊਯਾਰਕ, 29 ਜੂਨ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਆਪਣੇ 22 ਸਾਲ ਪੁਰਾਣੇ ਸਵਿਫਟ ਸਪੇਸ ਟੈਲੀਸਕੋਪ ਨੂੰ ਬਚਾਉਣ ਲਈ ਇਕ ਅਹਿਮ ਬਚਾਅ ਮੁਹਿੰਮ ਸ਼ੁਰੂ ਕਰਨ ਜਾ ਰਹੀ ਹੈ। 2004 ’ਚ ਲਾਂਚ ਕੀਤਾ ਗਿਆ ਇਹ ਟੈਲੀਸਕੋਪ ਸੂਰਜੀ ਗਤੀਵਿਧੀਆਂ ਵਧਣ ਕਾਰਨ ਹੌਲੀ-ਹੌਲੀ ਆਪਣੀ ਗ੍ਰਹਿ ਪੰਥ ਤੋਂ ਹੇਠਾਂ ਆ ਰਿਹਾ ਹੈ। ਜੇ ਇਸ ਨੂੰ ਸਮੇਂ ਸਿਰ ਉੱਚੇ ਗ੍ਰਹਿ ਪੰਥ ਵਿੱਚ ਨਾ ਪਹੁੰਚਾਇਆ ਗਿਆ ਤਾਂ ਇਹ ਆਉਣ ਵਾਲੇ ਮਹੀਨਿਆਂ ’ਚ ਧਰਤੀ ਦੇ ਵਾਯੂਮੰਡਲ ’ਚ ਦਾਖ਼ਲ ਹੋ ਕੇ ਨਸ਼ਟ ਹੋ ਸਕਦਾ ਹੈ। ਇਸ ਮਿਸ਼ਨ ਲਈ ਨਾਸਾ ਨੇ ਅਮਰੀਕੀ ਸਟਾਰਟਅੱਪ ਕੈਟਾਲਿਸਟ ਸਪੇਸ ਤਕਨਾਲਜੀ ਨਾਲ ਕਰੀਬ 3 ਕਰੋੜ ਡਾਲਰ (30 ਮਿਲੀਅਨ ਡਾਲਰ) ਦਾ ਸਮਝੌਤਾ ਕੀਤਾ ਹੈ। ਕੰਪਨੀ ਦਾ “ਲਿੰਕ” ਨਾਮੀ ਰੋਬੋਟਿਕ ਪੁਲਾੜ ਯਾਨ ਤਿੰਨ ਮਕੈਨਿਕਲ ਬਾਂਹਾਂ ਦੀ ਮਦਦ ਨਾਲ ਸਵਿਫਟ ਟੈਲੀਸਕੋਪ ਨੂੰ ਫੜੇਗਾ ਤੇ ਉਸ ਨੂੰ ਮੌਜੂਦਾ ਲਗਭਗ 360 ਕਿਲੋਮੀਟਰ ਦੀ ਗ੍ਰਹਿ ਪੰਥ ਤੋਂ ਚੁੱਕ ਕੇ 600 ਕਿਲੋਮੀਟਰ ਦੀ ਵੱਧ ਸੁਰੱਖਿਅਤ ਗ੍ਰਹਿ ਪੰਥ ਵਿੱਚ ਪਹੁੰਚਾਏਗਾ।
