ਸਕਾਟਲੈਂਡ ਦੀਆਂ ਜੇਲ੍ਹਾਂ ਵਿਚ ਕੈਦੀਆਂ ਦੀ ਵਧਦੀ ਗਿਣਤੀ ਬਣੀ ਗੰਭੀਰ ਖ਼ਤਰਾ

ਅ

ਅਜੀਤ ਡੈਸਕ 14-09-2026

ਗਲਾਸਗੋ, 13 ਸਤੰਬਰ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਸਕਾਟਲੈਂਡ ਦੀਆਂ ਜੇਲ੍ਹਾਂ ਵਿਚ ਕੈਦੀਆਂ ਦੀ ਗਿਣਤੀ ਲਗਭਗ 8,500 ਤੱਕ ਪਹੁੰਚਣ ਕਾਰਨ ਜੇਲ੍ਹ ਪ੍ਰਬੰਧਨ ਉਤੇ ਭਾਰੀ ਦਬਾਅ ਪੈ ਰਿਹਾ ਹੈ। ਸਕਾਟਿਸ਼ ਜੇਲ੍ਹ ਸਰਵਿਸ ਨੇ ਮੌਜੂਦਾ ਸਥਿਤੀ ਨੂੰ ਅਸਹਿਣਯੋਗ ਦੱਸਦਿਆਂ ਚਿਤਾਵਨੀ ਦਿੱਤੀ ਹੈ ਕਿ ਇਸ ਨਾਲ ਜੇਲ੍ਹਾਂ ਵਿੱਚ ਬੰਦ ਕੈਦੀਆਂ ਅਤੇ ਕੰਮ ਕਰਨ ਵਾਲੇ ਕਰਮਚਾਰੀਆਂ ਦੀ ਸੁਰੱਖਿਆ ਨੂੰ ਗੰਭੀਰ ਖ਼ਤਰਾ ਪੈਦਾ ਹੋ ਗਿਆ ਹੈ। ਪਿਛਲੇ ਡੇਢ ਸਾਲ ਦੌਰਾਨ ਸਕਾਟਲੈਂਡ ਦੇ ਕੇਂਦਰੀ ਇਲਾਕਿਆਂ ਵਿੱਚ ਚੱਲੀ ਗੈਂਗਵਾਰ ਨਾਲ ਜੁੜੇ ਕਈ ਵਿਅਕਤੀਆਂ ਨੂੰ ਜੇਲ੍ਹ ਭੇਜਿਆ ਗਿਆ ਹੈ। ਲਾਇਨਜ਼, ਡੈਨੀਅਲਜ਼ ਅਤੇ ਟੀਐੱਮਜੇ ਗਰੋਹਾਂ ਵਿਚਾਲੇ ਚੱਲ ਰਹੇ ਟਕਰਾਅ ਨੂੰ ਰੋਕਣ ਲਈ ਪੁਲਿਸ ਵੱਲੋਂ ਸ਼ੁਰੂ ਕੀਤੇ ਗਏ “ਆਪ੍ਰੇਸ਼ਨ ਪੋਰਟਾਲੈੱਜ” ਅਧੀਨ 84 ਵੱਖ-ਵੱਖ ਘਟਨਾਵਾਂ ਦੀ ਜਾਂਚ ਕੀਤੀ ਗਈ ਅਤੇ 60 ਤੋਂ ਵੱਧ ਗ੍ਰਿਫ਼ਤਾਰੀਆਂ ਹੋਈਆਂ ਹਨ। ਗੈਂਗਵਾਰ ਨਾਲ ਸਬੰਧਤ ਅਪਰਾਧਾਂ ਲਈ ਹੁਣ ਤੱਕ 15 ਤੋਂ ਵੱਧ ਵਿਅਕਤੀਆਂ ਨੂੰ ਜੇਲ੍ਹ ਦੀ ਸਜ਼ਾ ਮਿਲ ਚੁੱਕੀ ਹੈ। ਜੇਲ੍ਹ ਅਧਿਕਾਰੀਆਂ ਲਈ ਵਿਰੋਧੀ ਗਰੋਹਾਂ ਨਾਲ ਸਬੰਧਤ ਕੈਦੀਆਂ ਨੂੰ ਇੱਕ-ਦੂਜੇ ਤੋਂ ਵੱਖ ਰੱਖਣਾ ਵੱਡੀ ਚੁਣੌਤੀ ਬਣ ਗਿਆ ਹੈ। ਸਤੰਬਰ 2025 ਵਿੱਚ ਜੇਲ੍ਹ ਵਿੱਚ ਬੰਦ ਕੋਕੀਨ ਤਸਕਰ ਮਾਰਕ ਰਿਚਰਡਸਨ ਦੇ ਸਿਰ ਉੱਤੇ ਇਨਾਮ ਰੱਖੇ ਜਾਣ ਦੀਆਂ ਖ਼ਬਰਾਂ ਤੋਂ ਬਾਅਦ ਵਾਧੂ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਸਨ। ਅਪ੍ਰੈਲ 2026 ਵਿੱਚ ਦੁਬਈ ਤੋਂ ਹਵਾਲਗੀ ਰਾਹੀਂ ਲਿਆਂਦੇ ਗਏ ਸਟੀਫਨ ਜੈਮੀਸਨ ਨੂੰ ਬਹੁ-ਕਰੋੜੀ ਨਸ਼ਾ ਕਾਰੋਬਾਰ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਦੇ ਦੋਸ਼ ਹੇਠ ਛੇ ਸਾਲ ਦੀ ਕੈਦ ਸੁਣਾਈ ਗਈ ਸੀ। ਡੈਨੀਅਲਜ਼ ਗਰੋਹ ਦੇ ਮੁਖੀ ਸਟੀਵਨ ਡੈਨੀਅਲ ਨੂੰ ਵੀ ਅਗਸਤ ਵਿੱਚ ਗੰਭੀਰ ਸੰਗਠਿਤ ਅਪਰਾਧ ਅਤੇ ਨਸ਼ਿਆਂ ਦੇ ਉਤਪਾਦਨ ਤੇ ਸਪਲਾਈ ਦੇ ਦੋਸ਼ਾਂ ਹੇਠ ਗ੍ਰਿਫ਼ਤਾਰ ਕਰਕੇ ਹਿਰਾਸਤ ਵਿਚ ਭੇਜਿਆ ਗਿਆ। ਸਕਾਟਿਸ਼ ਜੇਲ੍ਹ ਸਰਵਿਸ ਅਨੁਸਾਰ ਕੈਦੀਆਂ ਦੀ ਵਧਦੀ ਗਿਣਤੀ ਅਤੇ ਉਨ੍ਹਾਂ ਨਾਲ ਜੁੜੀਆਂ ਗੁੰਝਲਦਾਰ ਸੁਰੱਖਿਆ ਲੋੜਾਂ ਕਾਰਨ ਪੁਨਰਵਾਸ ਦਾ ਕੰਮ ਵੀ ਪ੍ਰਭਾਵਿਤ ਹੋ ਰਿਹਾ ਹੈ। ਗੰਭੀਰ ਸੰਗਠਿਤ ਅਪਰਾਧਾਂ ਨਾਲ ਸਬੰਧ, ਅਪਰਾਧਿਕ ਪਿਛੋਕੜ, ਉਮਰ ਜਾਂ ਕਾਨੂੰਨੀ ਦਰਜੇ ਕਾਰਨ ਕਈ ਕੈਦੀਆਂ ਨੂੰ ਦੂਜਿਆਂ ਤੋਂ ਵੱਖ ਰੱਖਣਾ ਪੈਂਦਾ ਹੈ। ਭੀੜ ਕਾਰਨ ਸਟਾਫ਼ ਲਈ ਕੈਦੀਆਂ ਨਾਲ ਕੰਮ ਕਰਨਾ, ਉਨ੍ਹਾਂ ਦਾ ਮੁੜ ਵਸੇਬਾ ਕਰਨਾ ਅਤੇ ਦੁਬਾਰਾ ਅਪਰਾਧ ਕਰਨ ਦਾ ਖ਼ਤਰਾ ਘਟਾਉਣਾ ਮੁਸ਼ਕਲ ਹੋ ਰਿਹਾ ਹੈ। ਸਕਾਟਿਸ਼ ਸਰਕਾਰ ਨੇ ਕਿਹਾ ਹੈ ਕਿ ਸੀਨੀਅਰ ਅਪਰਾਧਿਕ ਵਿਅਕਤੀਆਂ ਦਾ ਜੇਲ੍ਹਾਂ ਵਿੱਚ ਹੋਣਾ ਇਸ ਗੱਲ ਦਾ ਸਬੂਤ ਹੈ ਕਿ ਨਿਆਂ ਪ੍ਰਣਾਲੀ ਸੰਗਠਿਤ ਅਪਰਾਧ ਵਿਰੁੱਧ ਕਾਰਵਾਈ ਕਰ ਰਹੀ ਹੈ, ਪਰ ਇਸ ਨਾਲ ਜੇਲ੍ਹ ਪ੍ਰਬੰਧਾਂ ਉੱਤੇ ਪੈ ਰਹੇ ਅਸਰ ਨੂੰ ਵੀ ਸਵੀਕਾਰ ਕੀਤਾ ਗਿਆ ਹੈ। ਭੀੜ ਘਟਾਉਣ ਲਈ ਨਵੀਆਂ ਜੇਲ੍ਹਾਂ ਬਣਾਈਆਂ ਜਾ ਰਹੀਆਂ ਹਨ। ਸਕਾਟਲੈਂਡ ਵਿੱਚ ਦੋ ਬਣ ਰਹੀਆਂ ਨਵੀਆਂ ਜੇਲ੍ਹਾਂ ਐੱਚਐੱਮਪੀ ਹਾਈਲੈਂਡ ਜੇਲ੍ਹ ਦੇ ਅਗਲੀ ਬਸੰਤ ਤੱਕ ਮੁਕੰਮਲ ਹੋਣ ਅਤੇ ਐੱਚ.ਐੱਮ.ਪੀ. ਜੇਲ੍ਹ ਗਲਾਸਗੋ ਦੇ 2028 ਵਿੱਚ ਖੁੱਲ੍ਹਣ ਦੀ ਸੰਭਾਵਨਾ ਹੈ। ਸਰਕਾਰ ਨੇ ਜੇਲ੍ਹ ਆਬਾਦੀ ਨੂੰ ਟਿਕਾਊ ਪੱਧਰ ਉਤੇ ਲਿਆਉਣ ਲਈ ਕੀਤੀ ਸਲਾਹ-ਮਸ਼ਵਰਾ ਪ੍ਰਕਿਰਿਆ ਦੇ ਜਵਾਬਾਂ ਦੀ ਸਮੀਖਿਆ ਕਰਕੇ ਅਗਲੇ ਕਦਮ ਤੈਅ ਕਰਨ ਦੀ ਗੱਲ ਵੀ ਆਖੀ ਹੈ। ਤਸਵੀਰ: ਗਲਾਸਗੋ ਫੋਟੋ