ਗਲਾਸਗੋ ਗ੍ਰੀਨ ਪਾਰਕ ਵਿਚ ਪਰਵਾਸ ਵਿਰੋਧੀ ਤੇ ਵਿਰੋਧੀ ਧਿਰਾਂ ਦੇ ਪ੍ਰਦਰਸ਼ਨ, ਸੈਂਕੜੇ ਲੋਕ ਹੋਏ ਇਕੱਠੇ

ਅ

ਅਜੀਤ ਡੈਸਕ 14-09-2026

ਗਲਾਸਗੋ, 13 ਸਤੰਬਰ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਗਲਾਸਗੋ ਗ੍ਰੀਨ ਵਿੱਚ ਸ਼ਨੀਵਾਰ ਨੂੰ ਪਰਵਾਸ ਵਿਰੋਧੀ ਪ੍ਰਦਰਸ਼ਨ ਅਤੇ ਉਸ ਦੇ ਵਿਰੋਧ ਵਿਚ ਕੀਤੇ ਗਏ ਜਵਾਬੀ ਪ੍ਰਦਰਸ਼ਨ ਵਿੱਚ ਸੈਂਕੜੇ ਲੋਕ ਇਕੱਠੇ ਹੋਏ। ਵੱਡੀ ਗਿਣਤੀ ਵਿਚ ਪੁਲਿਸ ਤਾਇਨਾਤ ਰਹੀ ਅਤੇ ਦੋਵਾਂ ਧਿਰਾਂ ਨੂੰ ਪਾਰਕ ਦੇ ਪੂਰਬੀ ਹਿੱਸੇ ਵਿੱਚ ਵੱਖ - ਵੱਖ ਥਾਵਾਂ ’ਤੇ ਰੱਖਿਆ ਗਿਆ। ਪੁਲਿਸ ਅਨੁਸਾਰ ਪ੍ਰਦਰਸ਼ਨ ਬਿਨਾਂ ਕਿਸੇ ਹਿੰਸਾ, ਗੜਬੜ ਜਾਂ ਵੱਡੇ ਵਿਘਨ ਦੇ ਸਮਾਪਤ ਹੋ ਗਏ। ਪਰਵਾਸ ਵਿਰੋਧੀ ਪ੍ਰਦਰਸ਼ਨ ਦਾ ਸੱਦਾ ‘ਪਿੰਕ ਲੇਡੀਜ਼’ ਵੱਲੋਂ ਦਿੱਤਾ ਗਿਆ ਸੀ। ਇਸ ਦੇ ਜਵਾਬ ਵਿੱਚ ‘ਸਟੈਂਡ ਅੱਪ ਟੂ ਰੇਸਿਜ਼ਮ’ ਸਮੇਤ ਨਸਲਵਾਦ ਵਿਰੋਧੀ ਜਥੇਬੰਦੀਆਂ ਨੇ ਗਲਾਸਗੋ ਗ੍ਰੀਨ ਵਿੱਚ ਜਵਾਬੀ ਇਕੱਠ ਕੀਤਾ। ਦੋਵਾਂ ਧਿਰਾਂ ਨੂੰ ਪੀਪਲਜ਼ ਪੈਲੇਸ ਅਤੇ ਭਾਰੀ ਪੁਲਿਸ ਬੰਦੋਬਸਤ ਰਾਹੀਂ ਇੱਕ-ਦੂਜੇ ਤੋਂ ਵੱਖ ਰੱਖਿਆ ਗਿਆ। ਪੁਲਿਸ ਨੇ ਪਹਿਲਾਂ ਹੀ ਚਿਤਾਵਨੀ ਦਿੱਤੀ ਸੀ ਕਿ ਹਿੰਸਾ ਜਾਂ ਗੜਬੜ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਪੁਲਿਸ ਸਕਾਟਲੈਂਡ ਨੇ ਇਸ ਮੌਕੇ ਲਈ ਵੱਡੀ ਸੁਰੱਖਿਆ ਯੋਜਨਾ ਬਣਾਈ ਸੀ। ਆਮ ਵਰਦੀਧਾਰੀ ਪੁਲਿਸ ਤੋਂ ਇਲਾਵਾ ਘੋੜਸਵਾਰ ਪੁਲਿਸ, ਪੁਲਿਸ ਕੁੱਤੇ, ਡਰੋਨ ਅਤੇ ਪੁਲਿਸ ਹੈਲੀਕਾਪਟਰ ਸਮੇਤ ਵਿਸ਼ੇਸ਼ ਸਾਧਨਾਂ ਦੀ ਵਿਵਸਥਾ ਕੀਤੀ ਗਈ ਸੀ। ਨਫ਼ਰਤੀ ਅਪਰਾਧ ਨਾਲ ਸਬੰਧਤ ਮਾਮਲਿਆਂ ਦੀ ਪਛਾਣ ਲਈ ਵਿਸ਼ੇਸ਼ ਸਿਖਲਾਈ ਪ੍ਰਾਪਤ ਅਧਿਕਾਰੀ ਵੀ ਤਾਇਨਾਤ ਕੀਤੇ ਗਏ ਸਨ। ਪੁਲਿਸ ਦਾ ਕਹਿਣਾ ਸੀ ਕਿ ਲੋਕਾਂ ਨੂੰ ਸ਼ਾਂਤਮਈ ਢੰਗ ਨਾਲ ਆਪਣੀ ਗੱਲ ਰੱਖਣ ਦਾ ਹੱਕ ਹੈ, ਪਰ ਅਪਰਾਧ ਜਾਂ ਹਿੰਸਾ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।