ਇੰਦੌਰ, 18 ਜੂਨ (ਰਤਨਜੀਤ ਸਿੰਘ ਸ਼ੈਰੀ)-ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ 18 ਤੋਂ 22 ਜੂਨ ਤੱਕ ਮੱਧ ਪ੍ਰਦੇਸ਼ ਦੇ ਦੌਰੇ ‘ਤੇ ਰਹਿਣਗੇ। ਰਾਸ਼ਟਰਪਤੀ ਮੁਰਮੂ ਅੱਜ ਸਵੇਰੇ 9:25 ਵਜੇ ਇੰਦੌਰ ਹਵਾਈ ਅੱਡੇ ‘ਤੇ ਪੁੱਜੇ, ਜਿਥੇ ਉਨ੍ਹਾਂ ਦਾ ਸਵਾਗਤ ਰਾਜਪਾਲ ਸ੍ਰੀ ਮੰਗੂ ਭਾਈ ਪਟੇਲ ਮੁੱਖ ਮੰਤਰੀ ਡਾ. ਮੋਹਨ ਯਾਦਵ, ਕੈਬਿਨਟ ਮੰਤਰੀ ਕੈਲਾਸ਼ ਵਿਜੇਵਰਗੀ, ਜਲ ਸੰਸਾਧਨ ਮੰਤਰੀ ਤੁਲਸੀਰਾਮ ਸਿਲਾਵਟ, ਮੇਅਰ ਸ੍ਰੀ ਪੁਸ਼ਯ ਮਿੱਤਰ ਭਾਰਗਵ ਆਦਿ ਨੇ ਕੀਤਾ। ਕੁੱਝ ਸਮਾਂ ਗੱਲਬਾਤ ਕਰਨ ਤੋਂ ਬਾਅਦ ਉਹ ਸਵੇਰੇ ਹੈਲੀਕਾਪਟਰ ਰਾਹੀਂ ਬੈਤੂਲ ਲਈ ਰਵਾਨਾ ਹੋ ਗਏ, ਉਥੇ ਉਹ ਬੜਾਦੇਵ ਮਹੋਤਸਵ ਦੇ ਪ੍ਰੋਗਰਾਮ ਵਿਚ ਸ਼ਾਮਿਲ ਹੋਏ। ਉਥੋਂ ਉਹ ਦੁਪਹਿਰ ਬਾਅਦ ਓਂਕਾਰੇਸ਼ਵਰ ਲਈ ਰਵਾਨਾ ਹੋ ਗਏ। ਓਂਕਾਰੇਸ਼ਵਰ ਹਿੰਦੂਆਂ ਦਾ ਪ੍ਰਸਿੱਧ ਜੋਤੀ ਲਿੰਗ ਹੈ। ਇਥੇ ਹੀ ਗੁਰੂ ਨਾਨਕ ਪਾਤਸ਼ਾਹ ਵੀ ਆਪਣੀ ਦੂਜੀ ਉਦਾਸੀ ਵੇਲੇ ਆਏ ਸਨ, ਇਥੇ ਹੀ ਉਨ੍ਹਾਂ ਨੇ ਦੱਖਣੀ ਓਂਕਾਰ ਦੀ ਬਾਣੀ ਵੀ ਰਚੀ ਸੀ । ਸ਼ਾਮ ਉਨ੍ਹਾਂ ਓਂਕਾਰੇਸ਼ਵਰ ਮੰਦਰ ਵਿਚ ਦਰਸ਼ਨ ਕਰਕੇ ਆਰਤੀ ਵਿਚ ਸ਼ਾਮਿਲ ਹੋਏ। ਰਾਤ ਵਿਸ਼ਰਾਮ ਵੀ ਇਥੇ ਕੀਤਾ ।
