ਨਵੀਂ ਦਿੱਲੀ, 4 ਜੁਲਾਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਸਿਵਾਨੀ ਰਾਏ ਵਲੋਂ ਲਿਖੇ ਅਤੇ ਨਿਰਦੇਸ਼ਤ ਨਾਟਕ ‘ਦੀ ਅਨਸਪੋਕਨ’ ਦਾ ਆਯੋਜਨ ਐਲ.ਟੀ.ਜੀ. ਆਡੀਟੋਰੀਅਮ ਵਿਖੇ ਕੀਤਾ ਗਿਆ ਜਿਸ ਵਿਚ ਲੜਕਿਆਂ ਦੇ ਨਾਲ ਹੋਣ ਵਾਲੇ ਯੋਨ-ਸ਼ੋਸ਼ਣ ਦੇ ਮੁੱਦੇ ਨੂੰ ਉਠਾਇਆ ਗਿਆ ਹੈ। ਇਸ ਨਾਟਕ ਵਿਚ ਚਾਰ ਪੁਰਸ਼ਾਂ ਦੀ ਕਹਾਣੀ ਹੈ, ਜਿਨ੍ਹਾਂ ਦਾ ਬਚਪਨ ਸ਼ੋਸ਼ਣ ਦੇ ਅਜਿਹੇ ਪਰਛਾਵੇਂ ਵਿਚ ਬੀਤਿਆ, ਪ੍ਰੰਤੂ ਉਨ੍ਹਾਂ ਨੇ ਇਸ ਬਾਰੇ ਕਿਸੇ ਨਾਲ ਕੋਈ ਗੱਲ ਨਹੀਂ ਕੀਤੀ ਅਤੇ ਉਨ੍ਹਾਂ ਦੀ ਸਾਰੀ ਜ਼ਿੰਦਗੀ ਹੀ ਚੁੱਪੀ ਵਿਚ ਬੀਤ ਜਾਂਦੀ ਹੈ। ਸਿਵਾਨੀ ਰਾਏ ਦੇ ਨਿਰਦੇਸ਼ਨ ਦੀ ਖਾਸ ਗੱਲ ਹੈ ਕਿ ਉਨ੍ਹਾਂ ਨੇ ਆਪਣੇ ਇਸ ਨਾਟਕ ਵਿਚ ਕੋਈ ਸੰਗੀਤ ਨਹੀਂ ਦਿੱਤਾ। ਨਾਟਕ ਵਿਚ ਕਹਾਣੀ ਦੇ ਰੂਪ ਵਿਚ ਪੇਸ਼ ਕੀਤੀ ਗਈ ਇਕ ਬਹਿਸ ਹੈ ਕਿ ਪੁਰਸ਼ਾਂ ਨੂੰ ਵੀ ਦਰਦ ਮਹਿਸੂਸ ਕਰਨ ਦੀ ਇਜਾਜ਼ਤ ਹੈ, ਦਰਦ ਦਾ ਨਾਂਅ ਲੈਣਾ ਕਮਜ਼ੋਰੀ ਨਹੀਂ ਹੈ। ਸਿਵਾਨੀ ਰਾਏ ਨੇ ਇਹ ਨਾਟਕ ਹੀ ਨਹੀਂ ਬਣਾਇਆ, ਬਲਕਿ ਭਾਰਤੀ ਥੀਏਟਰ ਦਾ ਬੰਦ ਦਰਵਾਜ਼ਾ ਖੋਲ੍ਹਿਆ ਹੈ।
