ਬਿੱਲ ਕਲਰਕਾਂ ਦੀ ਬਦਲੀ ਤੋਂ ਨਾਰਾਜ਼ ਨਗਰ ਨਿਗਮ ਯੂਨੀਅਨ ਵਲੋਂ ਰੋਸ ਪ੍ਰਦਰਸ਼ਨ <br/>
ਅਜੀਤ ਡੈਸਕ
23-05-2026
ਦੂਜੀ ਯੂਨੀਅਨ ਵਲੋਂ ਕਰਵਾਇਆ ਗਿਆ ਸਫ਼ਾਈ ਦਾ ਕੰਮ
ਜਲੰਧਰ, ਇਕ ਯੂਨੀਅਨ ਵਲੋਂ ਜਿੱਥੇ ਕੰਮ ਦੀ ਹੜਤਾਲ ਕੀਤੀ ਗਈ ਹੈ ਤੇ ਦੂਜੇ ਪਾਸੇ ਡਰਾਈਵਰ ਜੇ.ਸੀ. ਬੀ. ਆਪਰੇਟਰ ਯੂਨੀਅਨ ਵੱਲੋਂ ਕੰਮ ਕੀਤਾ ਜਾ ਰਿਹਾ ਹੈ ਤੇ ਸ਼ਹਿਰ ਦੇ ਕਈ ਡੰਪਾਂ ਨੂੰ ਸਾਫ਼ ਕੀਤਾ ਜਾ ਰਿਹਾ ਹੈ | ਪ੍ਰਧਾਨ ਅਨਿਲ ਸਭਰਵਾਲ ਨੇ ਇਹ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਜਿਹੜੀ ਯੂਨੀਅਨ ਦੀ ਹੜਤਾਲ ਚੱਲ ਰਹੀ ਹੈ, ਉਹ ਹੜਤਾਲ ਵਿਚ ਸ਼ਾਮਿਲ ਨਹੀਂ ਹਨ | ਉਹ ਆਪਣੀ ਯੂਨੀਅਨ ਦੇ ਡਰਾਈਵਰ ਅਤੇ ਜੇ.ਸੀ.ਬੀ. ਆਪ੍ਰੇਟਰਾਂ ਨਾਲ ਸ਼ਹਿਰ ਦੇ ਡੰਪਾਂ ਉੱਤੇ ਸਾਫ਼ ਸਫ਼ਾਈ ਕਰ ਰਹੇ ਹਨ | ਇਸ ਦੌਰਾਨ ਬੀ. ਐਮ. ਸੀ. ਚੌਂਕ ਦੇ ਨੇੜੇ ਜੋ ਬੱਸ ਸਟੈਂਡ ਨੂੰ ਜਾਂਦਿਆਂ ਕਿੰਗ ਹੋਟਲ ਦੇ ਬਾਹਰ ਕੂੜੇ ਦਾ ਡੰਪ ਸਾਫ਼ ਕਰਵਾਇਆ ਗਿਆ |
ਬਿੱਲ ਕਲਰਕਾਂ ਨੂੰ ਬਦਲੀ 'ਤੇ ਕੋਈ ਇਤਰਾਜ਼ ਨਹੀਂ-ਸੰਨੀ ਸਹੋਤਾ
ਜਲੰਧਰ, ਅੱਜ ਨਗਰ ਨਿਗਮ ਦੀਆਂ ਸੰਯੁਕਤ ਯੂਨੀਅਨਾਂ ਨੇ ਸਫ਼ਾਈ ਮਜ਼ਦੂਰ ਫੈਡਰੇਸ਼ਨ ਪੰਜਾਬ ਦੇ ਜਨਰਲ ਸਕੱਤਰ ਸੰਨ੍ਹੀ ਸਹੋਤਾ ਦੀ ਅਗਵਾਈ ਹੇਠ ਫੈਡਰੇਸ਼ਨ ਦੇ ਦਫ਼ਤਰ ਵਿਚ ਮੀਡੀਆ ਨੂੰ ਜਾਰੀ ਬਿਆਨ ਵਿਚ ਦੱਸਿਆ ਗਿਆ ਕਿ ਨਗਰ ਨਿਗਮ ਵਿਚ ਫੈਲੇ ਭਿ੍ਸ਼ਟਾਚਾਰ ਨੂੰ ਖ਼ਤਮ ਕਰਨ ਲਈ ਮੇਅਰ ਸ਼੍ਰੀ ਵਿਨੀਤ ਧੀਰ ਦੇ ਹੁਕਮਾਂ 'ਤੇ ਨਗਰ ਨਿਗਮ ਦੇ ਕਮਿਸ਼ਨਰ ਸ਼੍ਰੀ ਸੰਦੀਪ ਰਿਸ਼ੀ ਨੇ ਪਿਛਲੇ ਦਿਨੀਂ ਤਹਿਬਾਜ਼ਾਰੀ, ਵਰਕਸ਼ਾਪ ਸ਼ਾਖਾ ਅਤੇ ਹੁਣ ਹੈਲਥ ਸ਼ਾਖਾ ਦੇ ਬਿੱਲ ਕਲਰਕਾਂ ਨੂੰ ਵੱਖ-ਵੱਖ ਸ਼ਾਖਾਵਾਂ ਵਿਚ ਤਬਦੀਲ ਕਰ ਦਿੱਤਾ ਹੈ | ਹੈਲਥ ਸ਼ਾਖਾ ਤੋਂ ਬਦਲੇ ਗਏ 7 ਕਲਰਕਾਂ ਵਿਚੋਂ ਸ੍ਰੀ ਰਿੰਕੂ, ਸ੍ਰੀ ਵਿਕੀ ਸਹੋਤਾ ਅਤੇ ਸ੍ਰੀ ਰਾਜੇਸ਼ ਸ਼ਰਮਾ ਜੋ ਕਿ ਪੱਕੇ ਕਲਰਕ ਹਨ, ਉਨ੍ਹਾਂ ਨੂੰ ਆਪਣੀ ਹੋਈ ਬਦਲੀ 'ਤੇ ਕੋਈ ਇਤਰਾਜ਼ ਨਹੀਂ ਹੈ | ਉਨ੍ਹਾਂ ਦੋਸ਼ ਲਗਾਇਆ ਕਿ ਜੋ ਕੱਚੇ ਕਲਰਕ ਹਨ ਅਤੇ 20-25 ਸਾਲਾਂ ਤੋਂ ਕਲਰਕਾਂ ਦੀਆਂ ਸੀਟਾਂ 'ਤੇ ਬੈਠੇ ਹਨ ਅਤੇ ਸਫ਼ਾਈ ਸੇਵਕਾਂ ਦਾ ਸ਼ੋਸ਼ਣ ਕਰ ਰਹੇ ਹਨ | ਉਨਾਂ ਕਿਹਾ ਕਿ ਸਾਡੀਆਂ ਸਾਰੀਆਂ ਯੂਨੀਅਨਾਂ ਸ਼ਹਿਰ ਵਾਸੀਆਂ, ਨਗਰ ਨਿਗਮ ਦੇ ਮੇਅਰ ਅਤੇ ਕਮਿਸ਼ਨਰ ਦੇ ਨਾਲ ਖੜੀਆਂ ਹਨ | ਇਸ ਮੀਟਿੰਗ ਵਿਚ ਸੈਨੇਟਰੀ ਸੁਪਰਵਾਈਜ਼ਰ ਯੂਨੀਅਨ ਦੇ ਪ੍ਰਧਾਨ ਸੰਨ੍ਹੀ ਸੇਠੀ, ਹੀਰੋ ਸਭਰਵਾਲ, ਕਰਨ ਥਾਪਰ, ਨਿਗਮ ਸਫ਼ਾਈ ਮਜ਼ਦੂਰ ਯੂਨੀਅਨ ਦੇ ਪ੍ਰਧਾਨ ਗੌਰਵ ਗਿੱਲ, ਬੰਟੀ ਥਾਪਰ, ਰਾਹੁਲ ਲੁਥਾਰ, ਡਰਾਈਵਰ ਅਤੇ ਜੇ.ਸੀ.ਬੀ. ਆਪਰੇਟਰ ਯੂਨੀਅਨ ਦੇ ਪ੍ਰਧਾਨ ਅਨਿਲ ਸਭਰਵਾਲ, ਸ਼ਾਮ ਲਾਲ ਗਿੱਲ ਸਮੇਤ ਹੋਰ ਆਗੂ ਹਾਜ਼ਰ ਸਨ |
