ਜਲੰਧਰ ਛਾਉਣੀ, 28 ਜੂਨ (ਪਵਨ ਖਰਬੰਦਾ)- ਕੇਂਦਰੀ ਹਲਕੇ ਅਧੀਨ ਆਉਂਦੇ ਰਾਮਾ ਮੰਡੀ ਖੇਤਰ ਨੇੜੇ ਸਥਿਤ ਅਰਮਾਨ ਨਗਰ ਵਿਚ ਉਸ ਸਮੇਂ ਅਫਰਾ ਤਫਰੀ ਦਾ ਮਾਹੌਲ ਬਣ ਗਿਆ ਜਦੋਂ ਉਕਤ ਖੇਤਰ ਵਿਚ ਸਥਿਤ ਇਕ ਕਾਸਮੇਟਿਕ ਦੀ ਦੁਕਾਨ ਤੇ ਉਸ ਦੇ ਉੱਪਰ ਬਣੇ ਹੋਏ ਕਮਰੇ ਵਿਚ ਅੱਗ ਲੱਗ ਗਈ। ਇਸ ਦੌਰਾਨ ਸੈਰ ਕਰ ਰਹੇ ਲੋਕਾਂ ਨੋ ਰੌਲਾ ਪਾਉਂਦੇ ਹੋਏ ਉਕਤ ਘਰ ਵਿਚ ਸੌੰ ਰਹੀ ਇਕ ਔਰਤ ਤੇ ਉਸ ਦੀ ਬੱਚੀ ਨੂੰ ਬਹੁਤ ਹੀ ਮੁਸ਼ਕਿਲ ਨਾਲ ਬਚਾਇਆ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਮੌਕੇ ਤੇ ਫਾਇਰ ਬਿ੍ਗੇਡ ਦੇ ਕਰਮਚਾਰੀ ਪਹੁੰਚ ਗਏ, ਪ੍ਰੰਤੂ ਉਨ੍ਹਾਂ ਦੇ ਆਉਣ ਤੋਂ ਪਹਿਲ੍ਹਾਂ ਹੀ ਦੁਕਾਨ ਅਤੇ ਘਰ ਵਿਚ ਪਿਆ ਹੋਇਆ ਸਾਰਾ ਹੀ ਸਾਮਾਨ ਸੜ ਚੁੱਕਿਆ ਸੀ। ਇਸ ਦੌਰਾਨ ਸੀਨੀਅਰ ਡਿਪਟੀ ਮੇਅਰ ਬਲਬੀਰ ਸਿੰਘ ਬਿੱਟੂ ਤੇ ਥਾਣਾ ਰਾਮਾ ਮੰਡੀ ਦੇ ਪੁਲਿਸ ਕਰਮਚਾਰੀ ਵੀ ਮੌਕੇ ਤੇ ਪਹੁੰਚ ਗਏ। ਜਾਣਕਾਰੀ ਦਿੰਦੇ ਹੋਏ ਦੁਕਾਨ ਅਤੇ ਘਰ ਦੇ ਮਾਲਕ ਅਜੀਤ ਗੁਪਤਾ ਪੁੱਤਰ ਲਾਲ ਪ੍ਰਸਾਦ ਵਾਸੀ ਅਰਮਾਨ ਨਗਰ ਨੇ ਦੱਸਿਆ ਅੱਜ ਸਵੇਰ ਸਮੇਂ ਉਸ ਦੇ ਘਰ ਦੇ ਹੇਠਾਂ ਬਣੀ ਹੋਈ ਦੁਕਾਨ ਵਿੱਚ ਸ਼ਾਰਟ ਸਰਕਟ ਹੋਣ ਕਾਰਨ ਉਸ ਦੀ ਦੁਕਾਨ ਤੇ ਘਰ ਵਿੱਚ ਪਿਆ ਹੋਇਆ ਲੱਖਾਂ ਰੁਪਏ ਦਾ ਸਾਮਾਨ ਸੜ ਕੇ ਸੁਆਹ ਹੋ ਗਿਆ। ਉਨ੍ਹਾਂ ਦੱਸਿਆ ਕਿ ਘਟਨਾ ਦੌਰਾਨ ਉਸ ਦੀ ਪਤਨੀ ਕਵਿਤਾ ਤੇ ਬੇਟੀ ਮਿਸਟੀ ਘਰ ਵਿਚ ਹੀ ਸਨ, ਜਿਨ੍ਹਾਂ ਨੂੰ ਲੋਕਾਂ ਦੀ ਮਦਦ ਨਾਲ ਬਚਾਅ ਲਿਆ ਗਿਆ।
