ਕਪੂਰਥਲਾ, 1 ਜੁਲਾਈ (ਵਿ.ਪ੍ਰ.)-ਜ਼ਿਲ੍ਹਾ ਭਾਸ਼ਾ ਅਫ਼ਸਰ ਕਪੂਰਥਲਾ ਜਸਪ੍ਰੀਤ ਕੌਰ ਨੇ ਦੱਸਿਆ ਕਿ ਭਾਸ਼ਾ ਵਿਭਾਗ ਪੰਜਾਬ ਦੇ ਤਿਮਾਹੀ ਰਸਾਲੇ ਜਨ ਸਾਹਿਤ ਦੇ ਮਹੀਨਾ ਜੁਲਾਈ ਤੋਂ ਸਤੰਬਰ 2026 ਤੱਕ ‘ਦੇਵਨੀਤ’ ਵਿਸ਼ੇਸ਼ ਅੰਕ ਪ੍ਰਕਾਸ਼ਿਤ ਕੀਤਾ ਜਾ ਰਿਹਾ ਹੈ | ਉਨ੍ਹਾਂ ਜ਼ਿਲ੍ਹੇ ਦੇ ਲਿਖਾਰੀਆਂ, ਸਾਹਿਤਕਾਰਾਂ ਤੇ ਸਾਹਿਤ ਸਭਾਵਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਵਿਸ਼ੇਸ਼ ਅੰਕ ਲਈ 30 ਜੁਲਾਈ ਤੋਂ ਪਹਿਲਾਂ ਭਾਸ਼ਾ ਵਿਭਾਗ ਦੇ ਈ-ਮੇਲ ‘ਤੇ ਰਚਨਾਵਾਂ ਭੇਜਣ ਜਾਂ ਇਸ ਸਬੰਧੀ ਦਫ਼ਤਰ ਦੇ ਡੀਲਿੰਗ ਸਹਾਇਕ ਮਨੀਸ਼ ਕੁਮਾਰ ਨਾਲ ਸੰਪਰਕ ਕੀਤਾ ਜਾਵੇ | ਉਨ੍ਹਾਂ ਕਿਹਾ ਕਿ ਇਸ ਵਿਸ਼ੇਸ਼ ਅੰਕ ਵਿਚ ਭਾਸ਼ਾ ਵਿਭਾਗ ਵਲੋਂ ਉੱਘੇ ਸ਼ਾਇਰ ‘ਦੇਵਨੀਤ’ (ਬਲਦੇਵ ਸਿੰਘ ਸਿੱਧੂ) ਨਾਲ ਸਬੰਧਿਤ ਸਿਰਜਣਾਤਮਿਕ ਅਤੇ ਅਲੋਚਨਾਤਮਿਕ ਲੇਖ, ਕਵਿਤਾਵਾਂ ਤੇ ਯਾਦਾਂ, ਰੇਖਾ ਚਿੱਤਰ ਆਦਿ ਪ੍ਰਕਾਸ਼ਿਤ ਕੀਤੇ ਜਾਣਗੇ |
