ਹਾਲ-ਏ-ਹਕੂਮਤ : ਇਕ ਰਾਤ ਦੇ ਡਿਪਟੀ! ਪੁਲਿਸ ਬਣੀ ਸਿਆਸਤਦਾਨਾਂ ਤੇ ਤਕੜੀਆਂ ਧਿਰਾਂ ਦਾ ਹੱਥ ਠੋਕਾ
ਅਜੀਤ ਡੈਸਕ
14-09-2019
ਲੋਕ ਸੱਥਾਂ 'ਚ ਇਹ ਚਰਚਾ ਆਮ ਸੁਣਨ ਨੂੰ ਮਿਲ ਰਹੀ ਹੈ ਕਿ ਲੋਕ ਸਭਾ ਮੈਂਬਰ ਮਹਾਰਾਣੀ ਪ੍ਰਨੀਤ ਕੌਰ ਦੀ ਸਿਫਾਰਿਸ਼ 'ਤੇ ਹੀ ਦੁਬਾਰਾ ਸਿਮਰਨਜੀਤ ਸਿੰਘ ਲੰਗ ਦੀ ਇੱਥੇ ਤਾਇਨਾਤੀ ਦੇ ਆਰਡਰ ਹੋਏ ਸਨ, ਪਰ ਦੂਜੇ ਬੰਨੇ ਮੁੱਖ ਮੰਤਰੀ ਦੇ ਨਜ਼ਦੀਕੀ ਦੱਸੇ ਜਾਂਦੇ ਮੰਤਰੀ ਕਾਂਗੜ ਦੇ ਪਰਿਵਾਰਕ ਮੈਂਬਰ ਗੁਰਬਖਸ਼ੀਸ਼ ਸਿੰਘ ਦੀ ਅਗਲੇ ਹੀ ਦਿਨ ਮੁੱਲਾਂਪੁਰ ਤੋਂ ਡੇਰਾਬੱਸੀ ਬਦਲੀ ਕਰ ਦਿੱਤੀ | ਹਲਕੇ 'ਚ ਇਹ ਗੱਲ ਜੰਗਲ ਦੀ ਅੱਗ ਵਾਂਗ ਫੈਲ ਗਈ ਹੈ ਕਿ ਡੇਰਾਬੱਸੀ ਹਲਕਾ ਲੋਕ ਸਭਾ ਪਟਿਆਲਾ ਦੇ ਅਧੀਨ ਆਉਂਦਾ ਹੈ, ਜਿੱਥੋਂ ਕਿ ਮਹਾਰਾਣੀ ਪ੍ਰਨੀਤ ਕੌਰ ਮੈਂਬਰ ਹਨ, ਪਰ ਮਹਾਰਾਣੀ ਦੀ ਸਿਫਾਰਿਸ਼ ਨੂੰ ਦਰਕਿਨਾਰ ਕਰਨਾ ਆਪਣੇ ਆਪ 'ਚ ਵੱਡਾ ਸਵਾਲ ਹੈ | ਲੋਕਾਂ 'ਚ ਚੁੰਝ ਚਰਚਾ ਵੱਡੀ ਪੱਧਰ 'ਤੇ ਹੈ ਕਿ ਡੇਰਾਬੱਸੀ 'ਚ ਅਜਿਹੀ ਕਿਹੜੀ ਗਿੱਦੜਸਿੰਙੀ ਹੈ, ਜਿਸ ਕਰਕੇ ਅਫ਼ਸਰ ਇਕ ਰਾਤ ਲਈ ਵੀ ਲਾਂਭੇ ਨਹੀਂ ਹੋਣਾ ਚਾਹੁੰਦੇ ਅਤੇ ਹੋਰਨਾਂ ਖੇਤਰਾਂ ਤੋਂ ਇੱਥੇ ਬਦਲੀਆਂ ਕਰਵਾਉਣ ਵਾਲੇ ਪੂਰੇ ਤਰਲੋਮੱਛੀ ਹੋਏ ਪਏ ਹਨ | ਰਾਜੇ-ਰਾਣੀ ਦੀ ਖੇਡ 'ਚ 'ਬਾਬੂ' ਪਿਆਦੇ ਬਣ ਗਏ ਹਨ | ਲੋਕਾਂ ਨੇ ਦੋਸ਼ ਲਾਇਆ ਕਿ ਆਵਾਮ ਦੀ ਹਿਫਾਜ਼ਤ ਕਰਨ ਵਾਲੀ ਪੁਲਿਸ ਸਿਆਸਤਦਾਨਾਂ ਤੇ ਤਕੜੀਆਂ ਧਿਰਾਂ ਦਾ ਹੱਥ ਠੋਕਾ ਬਣ ਕੇ ਰਹਿ ਗਈ ਹੈ, ਜਿਸ ਕਾਰਨ ਆਮ ਲੋਕਾਂ 'ਚ ਪੁਲਿਸ ਦੀ ਛਵੀ ਪ੍ਰਤੀ ਬੇਭਰੋਸਗੀ ਦਾ ਆਲਮ ਹੈ |
