ਕੁਰਾਲੀ, 29 ਜਨਵਰੀ (ਹਰਪ੍ਰੀਤ ਸਿੰਘ)-ਸ਼ਹਿਰ ਵਿਚ ਬਸੰਤ ਪੰਚਮੀ ਮੌਕੇ ਚਾਇਨਾ ਡੋਰ ਕਾਰਨ ਨਾਲ ਉੱਡੇ ਪਤੰਗਾਂ ਕਾਰਨ ਵਾਪਰੇ ਵੱਖ-ਵੱਖ ਹਾਦਸਿਆਂ ਦੌਰਾਨ ਕਰੀਬ ਇਕ ਦਰਜ਼ਨ ਵਿਅਕਤੀ ਜ਼ਖ਼ਮੀ ਹੋ ਗਏ | ਜਖਮੀਆਂ ਨੂੰ ਇਲਾਜ ਲਈ ਹਸਪਤਾਲ ਲਿਜਾਣਾ ਪਿਆ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਮੋਟਰਸਾਈਕਲ 'ਤੇ ਜਾ ਰਹੇ ਪਵਨ ਰਾਮ (27) ਨਿਵਾਸੀ ਅਨੰਦਪੁਰ ਸਾਹਿਬ ਨੂੰ ਕੌਮੀ ਸੜਕ 'ਤੇ ਟੁੱਟ ਕੇ ਜਾ ਰਹੇ ਪਤੰਗ ਦੀ ਡੋਰ ਨੇ ਆਪਣੀ ਲਪੇਟ ਵਿਚ ਲੈ ਲਿਆ, ਜਿਸ ਕਾਰਨ ਉਸਦੀ ਗਰਦਨ 'ਤੇ ਵੱਡਾ ਕੱਟ ਲੱਗ ਗਿਆ | ਪਵਨ ਕੁਮਾਰ ਨੂੰ ਵੀ ਹਸਪਤਾਲ ਇਲਾਜ਼ ਲਈ ਲਿਆਂਦਾ ਗਿਆ | ਇਸੇ ਤਰ੍ਹਾਂ ਦਵਿੰਦਰ ਸਿੰਘ (33) ਪੁੱਤਰ ਗੁਰਵਿੰਦਰ ਸਿੰਘ ਵਾਸੀ ਮੱਲਾਂਪੁਰ, ਮੁੰਧੋਂ ਸੰਗਤੀਆਂ ਦੇ ਓਮੀ (28) ਪੁੱਤਰ ਪਾਲ ਸਿੰਘ, ਗੋਸਲਾਂ ਨਿਵਾਸੀ ਗੁੱਡੂ ਕੁਮਾਰ (54), ਨੰਗਲ ਨਿਵਾਸੀ ਜਰਨੈਲ ਸਿੰਘ, 9 ਸਾਲਾ ਪ੍ਰਵਿ੍ਸ਼ ਕੁਮਾਰ, ਪਰਮਿੰਦਰ ਸਿੰਘ ਚਰਹੇੜੀ ਚਾਇਨਾ ਡੋਰ ਦੀ ਲਪੇਟ ਵਿਚ ਆਉਣ ਕਾਰਨ ਜਖ਼ਮੀ ਹੋ ਗਏ, ਜਿਨ੍ਹਾਂ ਵਿਚੋਂ ਕਈਆਂ ਦੇ ਟਾਂਕੇ ਤੱਕ ਵੀ ਲਗਾਉਣ ਪਏ ਹਨ | ਇਲਾਕਾ ਨਿਵਾਸੀਆਂ ਨੇ ਪ੍ਰਸਾਸ਼ਨ ਤੋਂ ਸ਼ਹਿਰ ਵਿਚ ਪਾਬੰਦੀ ਦੇ ਬਾਵਜੂਦ ਚਾਇਨਾਂ ਡੋਰ ਵੇਚਣ ਵਾਲਿਆਂ ਖਿਲਾਫ਼ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ |
