ਚੰਡੀਗੜ੍ਹ, 24 ਸਤੰਬਰ (ਪੀ.ਟੀ.ਆਈ.)-ਪ੍ਰਸਿੱਧ ਰੂਸੀ ਮੂਲ ਦੇ ਮਿਗ-21 ਲੜਾਕੂ ਜਹਾਜ਼, ਜੋ ਛੇ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਭਾਰਤੀ ਹਵਾਈ ਸੈਨਾ ਦੇ ਲੜਾਕੂ ਬੇੜੇ ਦੀ ਰੀੜ ਦੀ ਹੱਡੀ ਰਹੇ ਹਨ, ਆਖਰਕਾਰ ਚੰਡੀਗੜ੍ਹ ਵਿਚ ਇੱਕ ਡੀਕਮਿਸ਼ਨਿੰਗ ਸਮਾਗਮ ਵਿਚ ਆਈ.ਏ.ਐਫ. ਤੋਂ ਸੇਵਾਮੁਕਤ ਹੋਣ ਲਈ ਤਿਆਰ ਹਨ, ਜਿੱਥੇ ਇਸ ਪ੍ਰਤੀਕ ਜਹਾਜ਼ ਨੂੰ ਪਹਿਲੀ ਵਾਰ ਛੇ ਦਹਾਕੇ ਪਹਿਲਾਂ ਸ਼ਾਮਿਲ ਕੀਤਾ ਗਿਆ ਸੀ | ਮਿਗ-21 ਆਪ੍ਰੇਸ਼ਨਾਂ ਦਾ ਅਧਿਕਾਰਤ ਸਮਾਪਨ 26 ਸਤੰਬਰ ਨੂੰ ਇੱਕ ਰਸਮੀ ਫਲਾਈਪਾਸਟ ਤੇ ਡੀਕਮਿਸ਼ਨਿੰਗ ਸਮਾਗਮ ਨਾਲ ਹੋਵੇਗਾ, ਜੋ ਭਾਰਤ ਦੀ ਹਵਾਈ ਸ਼ਕਤੀ ਵਿਚ ਇੱਕ ਇਤਿਹਾਸਕ ਅਧਿਆਇ ਦੇ ਅੰਤ ਨੂੰ ਦਰਸਾਉਂਦਾ ਹੈ | 'ਪੈਂਥਰਸ' ਨਾਮਕ ਨੰਬਰ 23 ਸਕੁਐਡਰਨ ਨਾਲ ਸੰਬੰਧਿਤ ਆਖਰੀ ਮਿਗ-21 ਜੈੱਟ, ਨੂੰ ਚੰਡੀਗੜ੍ਹ ਹਵਾਈ ਸੈਨਾ ਸਟੇਸ਼ਨ 'ਤੇ ਡੀਕਮਿਸ਼ਨਿੰਗ ਸਮਾਰੋਹ ਵਿਚ ਵਿਦਾਇਗੀ ਦਿੱਤੀ ਜਾਵੇਗੀ | ਸ਼ੁੱਕਰਵਾਰ ਨੂੰ , ਏਅਰ ਚੀਫ਼ ਮਾਰਸ਼ਲ ਏ.ਪੀ. ਸਿੰਘ, 'ਬਾਦਲ 3' ਕਾਲ ਸਾਈਨ ਨਾਲ ਸਕੁਐਡਰਨ ਦੀ ਆਖਰੀ ਉਡਾਣ ਉਡਾਉਣਗੇ |
