ਜਗਰਾਉਂ, 4 ਨਵੰਬਰ (ਗੁਰਦੀਪ ਸਿੰਘ ਮਲਕ)-ਕਬੱਡੀ ਖਿਡਾਰੀ ਤੇਜਪਾਲ ਸਿੰਘ ਜਿਸ ਦੀ ਮੌਤ ਮੰਗਲਵਾਰ ਨੂੰ ਹੋਈ ਸੀ, ਪਰਿਵਾਰਕ ਮੈਂਬਰਾਂ ਨੇ ਕਤਲ ਦੇ ਪੰਜਵੇਂ ਦਿਨ ਪੋਸਟਮਾਰਟਮ ਕਰਵਾਉਣ 'ਤੇ ਸਹਿਮਤੀ ਜਤਾਈ | ਇਹ ਫ਼ੈਸਲਾ ਐਸ.ਐਸ.ਪੀ. ਡਾ. ਅੰਕੁਰ ਗੁਪਤਾ ਅਤੇ ਹੋਰ ਸੀਨੀਅਰ ਪੁਲਿਸ ਅਧਿਕਾਰੀਆਂ ਨਾਲ ਸੋਮਵਾਰ ਰਾਤ ਹੋਈ ਬੈਠਕ ਤੋਂ ਬਾਅਦ ਲਿਆ ਗਿਆ, ਜਿਸ 'ਚ ਪੁਲਿਸ ਨੇ ਭਰੋਸਾ ਦਿਵਾਇਆ ਕਿ ਤੀਜਾ ਆਰੋਪੀ ਹਰਜੋਬਨਪ੍ਰੀਤ ਸਿੰਘ ਉਰਫ ਕਾਲਾ ਰੂਮੀ ਨੂੰ ਵੀ ਜਲਦ ਕਾਬੂ ਕਰ ਲਿਆ ਜਾਵੇਗਾ | ਤਿੰਨ ਡਾਕਟਰਾਂ ਦੇ ਬੋਰਡ ਨੇ ਪੋਸਟਮਾਰਟਮ ਕੀਤਾ | ਡਾਕਟਰਾਂ ਮੁਤਾਬਕ ਤੇਜਪਾਲ ਨੂੰ 30 ਐੱਮ.ਐੱਮ. ਦੀ ਪਿਸਤੌਲ ਨਾਲ ਗੋਲੀ ਮਾਰੀ ਗਈ ਸੀ | ਗੋਲੀ ਦਿਲ ਦੇ ਨੇੜੇ ਸਰੀਰ 'ਚ ਦਾਖਲ ਹੋਈ ਤੇ ਅੰਦਰ ਘੁੰਮਦੀ ਹੋਈ ਗੁਰਦੇ ਕੋਲੋਂ ਨਿਕਲੀ | ਗੋਲੀ ਬਹੁਤ ਨੇੜੇ ਤੋਂ ਚਲਾਈ ਗਈ ਸੀ, ਜਿਸ ਕਾਰਨ ਉਸਦੀ ਮੌਕੇ 'ਤੇ ਹੀ ਮੌਤ ਹੋ ਗਈ | ਐਸ.ਐਸ.ਪੀ. ਦੇ ਹੁਕਮਾਂ 'ਤੇ ਖਾਸ ਟੀਮਾਂ ਬਣਾਈਆਂ ਗਈਆਂ ਹਨ, ਜੋ ਹੱਤਿਆਕਾਂਡ ਦੇ ਹਰ ਪੱਖ ਦੀ ਜਾਂਚ ਕਰ ਰਹੀਆਂ ਹਨ | ਪੁਲਿਸ ਹੁਣ ਤੱਕ ਦੋ ਮੁੱਖ ਆਰੋਪੀਆਂ ਹਨੀ ਅਤੇ ਗਗਨਾ ਨੂੰ ਗਿ੍ਫ਼ਤਾਰ ਕਰ ਚੁੱਕੀ ਹੈ, ਜਿਨ੍ਹਾਂ ਤੋਂ ਗੈਰ ਕਾਨੂੰਨੀ ਪਿਸਤੌਲ ਅਤੇ ਕਾਰਤੂਸ ਬਰਾਮਦ ਹੋਏ ਹਨ | ਤੀਜੇ ਆਰੋਪੀ ਕਾਲਾ ਰੂਮੀ ਦੀ ਤਲਾਸ਼ ਜਾਰੀ ਹੈ |
