ਕਸਬਾ ਕਾਠਗੜ੍ਹ ਦੇ ਕਈ ਪਿੰਡਾਂ 'ਚ ਵਧਦੀ ਜਾ ਰਹੀ ਅਵਾਰਾ ਪਸ਼ੂਆਂ ਦੀ ਤਾਦਾਦ ਕਾਰਨ ਲੋਕ ਪ੍ਰੇਸ਼ਾਨ
ਅਜੀਤ ਡੈਸਕ
02-06-2025
ਕੁੱਝ ਤਕੜੇ ਜ਼ਿਮੀਂਦਾਰਾਂ ਵੱਲੋਂ ਤਾਂ ਆਪਣੇ ਖੇਤਾਂ ਨੂੰ ਜਾਲ ਜਾਂ ਕੰਡੇਦਾਰ ਤਾਰਾਂ ਲਗਾ ਕੇ ਆਪਣੇ ਖੇਤਾਂ ਨੂੰ ਇਨ੍ਹਾਂ ਤੋਂ ਬਚਾ ਲਿਆ ਗਿਆ ਹੈ | ਪਰ ਛੋਟੇ ਜ਼ਿਮੀਂਦਾਰ ਇਨ੍ਹਾਂ ਅਵਾਰਾ ਪਸ਼ੂਆਂ ਦੇ ਉਜਾੜੇ ਕਾਰਨ ਲਗਪਗ ਖੇਤੀ ਕਰਨੀ ਹੀ ਛੱਡ ਗਏ ਹਨ | ਜਿਹੜੇ ਅਵਾਰਾ ਪਸ਼ੂਆਂ ਨੂੰ ਗੱਡੀਆਂ 'ਚ ਭਰ-ਭਰ ਕੇ ਲਿਆ ਕੇ ਇਥੇ ਛੱਡਿਆ ਜਾ ਰਿਹਾ ਹੈ ਉਹ ਵੀ ਆਪਣੇ ਝੁੰਡ ਬਣਾ ਕੇ ਸੜਕ ਦੇ ਕਿਨਾਰੇ ਬੈਠੇ ਆਮ ਨਜ਼ਰ ਆ ਜਾਂਦੇ ਹਨ | ਜਿਨ੍ਹਾਂ ਵਿੱਚ ਕਾਠਗੜ੍ਹ ਤੋਂ ਉਧਨਵਾਲ ਤੱਕ ਚਾਰ ਪੰਜ ਝੁੰਡ ਸੜਕ 'ਤੇ ਬੈਠੇ ਰਹਿੰਦੇ ਹਨ ਜੋ ਕਿ ਸੜਕੀ ਹਾਦਸਿਆਂ ਦਾ ਕਾਰਨ ਵੀ ਬਣਦੇ ਹਨ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਹੁਣ ਇਨ੍ਹਾਂ ਅਵਾਰਾ ਪਸ਼ੂਆਂ ਦੀ ਤਾਦਾਦ ਮੰਡ ਏਰੀਏ ਵਿੱਚ ਵੀ ਵਧਦੀ ਜਾ ਰਹੀ ਹੈ | ਇਨ੍ਹਾਂ ਅਵਾਰਾ ਪਸ਼ੂਆਂ ਕਾਰਨ ਕਈ ਸੜਕ ਹਾਦਸੇ ਅਤੇ ਕਈ ਮੌਤਾਂ ਵੀ ਹੋ ਚੁੱਕੀਆਂ ਹਨ | ਪ੍ਰੰਤੂ ਪ੍ਰਸ਼ਾਸਨ ਵਲੋਂ ਕੋਈ ਵੀ ਉਚਿਤ ਕਾਰਵਾਈ ਨਹੀਂ ਕੀਤੀ ਗਈ | ਸਾਡੇ ਇਲਾਕੇ 'ਚ ਕਈ ਗਊ ਰਕਸ਼ਕ ਦਲ ਅਤੇ ਕਈ ਪ੍ਰਸਿੱਧ ਗਊਸ਼ਾਲਾਵਾਂ ਹਨ | ਪ੍ਰੰਤੂ ਇਹਨਾਂ ਅਵਾਰਾ ਪਸ਼ੂਆਂ ਲਈ ਕਿਸੇ ਵੱਲੋਂ ਕੋਈ ਪਹਿਲਕਦਮੀ ਨਹੀਂ ਕੀਤੀ ਗਈ | ਗਊਸ਼ਾਲਾ ਕਮੇਟੀ ਦੇ ਇੱਕ ਸਰਗਰਮ ਮੈਂਬਰ ਤਜਿੰਦਰ ਜੈਲਦਾਰ ਦੇ ਘਰ ਤੋਂ ਬਾਹਰ ਗਊਆਂ ਵੱਲੋਂ ਡੇਰਾ ਲਗਾ ਲਿਆ ਗਿਆ | ਜਿਸ ਸਬੰਧੀ ਉਹਨਾਂ ਤੋਂ ਇਨ੍ਹਾਂ ਅਵਾਰਾ ਗਊਆਂ ਸਬੰਧੀ ਜਾਣਕਾਰੀ ਲਈ ਗਈ ਕਿ ਤੁਸੀਂ ਗਊਸ਼ਾਲਾ ਕਮੇਟੀ ਦੇ ਮੈਂਬਰ ਹੋ ਤੁਸੀਂ ਇਹਨਾਂ ਲਈ ਕੀ ਕਰ ਰਹੇ ਹੋ ਤਾਂ ਉਹਨਾਂ ਵੱਲੋਂ ਕੋਈ ਭਰੋਸੇਯੋਗ ਜਵਾਬ ਨਹੀਂ ਦਿੱਤਾ ਗਿਆ | ਉਹਨਾਂ ਕਿਹਾ ਕਿ ਮੈਂ ਕਮੇਟੀ ਮੈਂਬਰਾਂ ਨਾਲ ਇਸ ਸਬੰਧੀ ਗੱਲਬਾਤ ਕਰਾਂਗਾ | ਪ੍ਰੰਤੂ ਇਸ ਕਮੇਟੀ ਮੈਂਬਰ ਦੇ ਘਰ ਦੇ ਮੂਹਰੇ ਬੈਠੀਆਂ ਗਊਆਂ ਸ਼ਾਇਦ ਇਸ ਆਸ ਵਿੱਚ ਹਨ ਕਿ ਸ਼ਾਇਦ ਕਿਸੇ ਮੈਂਬਰ ਜਾਂ ਸਮਾਜ ਸੇਵੀ ਦੀ ਨਜ਼ਰ ਇਨ੍ਹਾਂ 'ਤੇ ਸਵੱਲੀ ਹੋ ਜਾਵੇ ਅਤੇ ਇਨ੍ਹਾਂ ਦਾ ਉਧਾਰ ਹੋ ਜਾਵੇ | ਪੁਲਿਸ ਪ੍ਰਸ਼ਾਸਨ ਨੂੰ ਇਹਨਾਂ ਅਵਾਰਾ ਪਸ਼ੂਆਂ ਨੂੰ ਗੱਡੀਆਂ ਵਿੱਚ ਭਰ ਕੇ ਛੱਡਣ ਵਾਲਿਆਂ ਖਿਲਾਫ਼ ਬਣਦੀ ਕਾਨੂੰਨੀ ਕਾਰਵਾਈ ਕਰਨੀ ਚਾਹੀਦੀ ਹੈ ਨਾਲ ਹੀ ਸਾਡੇ ਇਲਾਕੇ 'ਚ ਜੋ ਗਊ ਰਕਸ਼ਾ ਦਲ ਅਤੇ ਗਊਸ਼ਾਲਾਵਾਂ ਹਨ ਉਹਨਾਂ ਨੂੰ ਪਹਿਲਕਦਮੀ ਕਰਦੇ ਹੋਏ ਇਹਨਾਂ ਅਵਾਰਾ ਪਸ਼ੂਆਂ ਦੇ ਹੱਲ ਲਈ ਅੱਗੇ ਆਉਣ ਦੀ ਲੋੜ ਹੈ |
