ਬੰਗਾ, 18 ਅਕਤੂਬਰ (ਸੁਰਿੰਦਰ ਸਿੰਘ ਕਰਮ ਲਧਾਣਾ)-ਕੁੱਲ ਹਿੰਦ ਖੇਤ ਮਜ਼ਦੂਰ ਯੂਨੀਅਨ ਦੀ ਸੂਬਾ ਵਰਕਿੰਗ ਕਮੇਟੀ ਦੀ ਮੀਟਿੰਗ ਸੂਬਾ ਪ੍ਰਧਾਨ ਰਾਮ ਸਿੰਘ ਨੂਰਪੁਰੀ ਦੀ ਪ੍ਰਧਾਨਗੀ ਹੇਠ ਹੋਈ | ਮੀਟਿੰਗ 'ਚ ਕੇਰਲਾ ਦੇ ਸਾਬਕਾ ਮੁੱਖ ਮੰਤਰੀ ਕਾਮਰੇਡ ਵੀ ਐਚ ਅਛੂਤਾਕਵਨ, ਭੈਣ ਪ੍ਰੀਤਮ ਕੌਰ ਵਿਰਕ, ਕਸ਼ਮੀਰ ਸਿੰਘ ਜਮਸ਼ੇਰ, ਭੂਰਾ ਸਿੰਘ ਪੱਕਾ ਕਲਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਗਈ | ਇਸ ਸੰਬੰਧੀ ਸੂਬਾ ਜਨਰਲ ਸਕੱਤਰ ਗੁਰਮੇਸ਼ ਸਿੰਘ ਨੇ ਦੱਸਿਆ ਕਿ ਪਿਛਲੇ ਦਿਨੀ ਪੰਜਾਬ ਦੀਆਂ ਅੱਠ ਪੇਂਡੂ ਤੇ ਖੇਤ ਮਜ਼ਦੂਰ ਜਥੇਬੰਦੀਆਂ ਵਲੋਂ ਸਾਂਝਾ ਮੋਰਚਾ ਬਣਾ ਕੇ 15 ਮੰਗਾਂ ਲਈ ਜ਼ੋਰਦਾਰ ਸੰਘਰਸ਼ ਕੀਤਾ | ਸਮੇਂ-ਸਮੇਂ ਐਕਸ਼ਨ ਵਿਚ ਸਾਡੇ ਯੂਨੀਅਨ ਦੇ ਸਾਥੀਆਂ ਨੇ ਭਰਵੀਂ ਸ਼ਮੂਲੀਅਤ ਕੀਤੀ | ਇਸੇ ਤਰ੍ਹਾਂ ਐਸ. ਕੇ. ਐਮ. ਵਲੋਂ ਦਿੱਤੇ ਐਕਸ਼ਨਾਂ ਦਾ ਸਮਰਥਨ ਕੀਤਾ | ਯੂਨੀਅਨ ਦੀ ਮੁੱਢਲੀ ਮੈਂਬਰਸ਼ਿਪ ਵਧਾਉਣ ਲਈ ਫੈਸਲੇ ਕੀਤੇ ਗਏ | ਜਥੇਬੰਦੀ ਨੂੰ ਹੇਠਾਂ ਤੋਂ ਮਜ਼ਬੂਤ ਕਰਨ ਲਈ 300 ਮੁੱਢਲੇ ਮੈਂਬਰ ਬਣਾਉਣ ਦਾ ਫੈਸਲਾ ਕੀਤਾ | 30 ਨਵੰਬਰ ਤੱਕ ਇਹ ਟੀਚਾ ਪੂਰਾ ਕੀਤਾ ਜਾਵੇਗਾ ਨਾਲ ਹੀ ਤਹਿਸੀਲ ਇਕਾਈਆਂ ਦੇ ਅਜਲਾਸ ਕੀਤੇ ਜਾਣਗੇ | 10 ਜਨਵਰੀ 2026 ਤੱਕ ਸਾਰੇ ਜ਼ਿਲਿ੍ਹਆਂ ਦੇ ਇਜਲਾਸ ਕੀਤੇ ਜਾਣਗੇ | ਫਰਵਰੀ 'ਚ ਯੂਨੀਅਨ ਦੀ 32ਵੀਂ ਸੂਬਾਈ ਕਾਨਫਰੰਸ ਜ਼ਿਲ੍ਹਾ ਜਲੰਧਰ ਦੇ ਇਤਿਹਾਸਕ ਕਸਬਾ ਨੂਰਮਹਿਲ ਵਿਖੇ ਕੀਤੀ ਜਾਵੇਗੀ | ਯੂਨੀਅਨ ਦਾ ਬੁਲਾਰਾ ਕਮੀਆਂ ਦੀ ਲਹਿਰ ਨੂੰ ਜਾਰੀ ਕੀਤਾ | ਮੀਟਿੰਗ 'ਚ ਇਕ ਮਤਾ ਪਾਸ ਕਰਕੇ ਦਲਿਤਾਂ 'ਤੇ ਹੋ ਰਹੇ ਹਮਲਿਆਂ ਦੀ ਨਿਖੇਧੀ ਕੀਤੀ ਅਤੇ ਆਈ. ਪੀ. ਐਸ. ਪੂਰਨ ਕੁਮਾਰ ਦੀ ਮੌਤ ਦੀ ਅਦਾਲਤੀ ਜਾਂਚ ਦੀ ਮੰਗ ਕੀਤੀ | ਦੂਜੇ ਮਤੇ ਰਾਹੀਂ ਪੰਜਾਬ ਵਿਚ ਹੋਏ ਹੜ੍ਹਾਂ ਨਾਲ ਖਰਾਬੇ ਦੀ ਫੌਰੀ ਰਾਹਤ ਦੇਣ ਦੀ ਮੰਗ ਕੀਤੀ | ਮੀਟਿੰਗ 'ਚ ਵੱਖ-ਵੱਖ ਜ਼ਿਲਿ੍ਹਆਂ ਦੇ 26 ਸਾਥੀਆਂ ਨੇ ਭਾਗ ਲਿਆ | ਅੰਤ 'ਚ ਸੂਬਾ ਪ੍ਰਧਾਨ ਨੇ ਆਏ ਸਾਥੀਆਂ ਦਾ ਧੰਨਵਾਦ ਕੀਤਾ |
