ਪਠਾਨਕੋਟ, 3 ਨਵੰਬਰ (ਸੰਧੂ)- ਭੜੋਲੀ ਕਲਾਂ ਦੇ ਵਸਨੀਕਾਂ ਨੂੰ ਆਉਣ ਵਾਲੇ ਦਿਨਾਂ ਵਿਚ ਕਾਫ਼ੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਵੇਗਾ | ਰੇਲਵੇ ਨੇ ਟਰੈਕ ਦੀ ਜ਼ਰੂਰੀ੍ਹ ਮੁਰੰਮਤ ਦੇ ਕੰਮ ਕਾਰਨ ਤਿੰਨ ਦਿਨਾਂ ਲਈ ਗੇਟ ਨੰਬਰ ਸੀ-79 ਨੂੰ ਪੂਰੀ ਤਰ੍ਹਾਂ ਬੰਦ ਕਰਨ ਦਾ ਫ਼ੈਸਲਾ ਕੀਤਾ ਹੈ | ਰੇਲਵੇ ਪੀ.ਡਬਲਿਯੂ.ਆਈ. ਅਨਿਲ ਕੁਮਾਰ ਮੀਨਾ ਨੇ ਦੱਸਿਆ ਕਿ ਇਹ ਫਾਟਕ 4, 5 ਤੇ 6 ਨਵੰਬਰ ਨੂੰ ਬੰਦ ਰਹੇਗਾ | ਇਸ ਸਮੇਂ ਦੌਰਾਨ ਭਵਿੱਖ ਵਿਚ ਸੁਰੱਖਿਅਤ ਤੇ ਸੁਚਾਰੂ ਰੇਲ ਆਵਾਜਾਈ ਨੂੰ ਯਕੀਨੀ ਬਣਾਉਣ ਲਈ ਰੇਲਵੇ ਟਰੈਕ ਦੀ ਦੇਖਭਾਲ ਤੇ ਤਕਨੀਕੀ ਜਾਂਚ ਕੀਤੀ ਜਾਵੇਗੀ | ਫਾਟਕ ਬੰਦ ਹੋਣ ਨਾਲ ਸਥਾਨਿਕ ਨਿਵਾਸੀਆਂ ਦੇ ਨਾਲ-ਨਾਲ ਸਕੂਲੀ ਬੱਚਿਆਂ, ਕਰਮਚਾਰੀਆਂ ਤੇ ਇਸ ਰੂਟ 'ਤੇ ਰੋਜ਼ਾਨਾ ਯਾਤਰਾ ਕਰਨ ਵਾਲੇ ਵਾਹਨ ਚਾਲਕਾਂ ਨੂੰ ਕਾਫ਼ੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਵੇਗਾ | ਵਸਨੀਕਾਂ ਨੇ ਪਹਿਲਾਂ ਹੀ ਵਿਕਲਪਿਕ ਰੂਟਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ | ਲੋਕਾਂ ਨੇ ਰੇਲਵੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਹੈ ਕਿ ਉਨ੍ਹਾਂ ਦੇ ਆਉਣ-ਜਾਣ 'ਚ ਹੋਣ ਵਾਲੀ ਅਸੁਵਿਧਾ ਨੂੰ ਘੱਟ ਤੋਂ ਘੱਟ ਕਰਨ ਲਈ ਮੁਰੰਮਤ ਦਾ ਕੰਮ ਜਲਦੀ ਤੋਂ ਜਲਦੀ ਪੂਰਾ ਕੀਤਾ ਜਾਵੇ |
