ਤਲਵੰਡੀ ਸਾਬੋ, 22 ਨਵੰਬਰ (ਰਣਜੀਤ ਸਿੰਘ ਰਾਜੂ)-ਉਪ ਮੰਡਲ ਤਲਵੰਡੀ ਸਾਬੋ ਦੇ ਪਿੰਡ ਭਾਗੀਵਾਂਦਰ ਵਿਖੇ ਬੀਤੇ ਸਮੇਂ 'ਚ ਪੁੱਤਰ ਦੀ ਕੁੱਟਮਾਰ ਮਾਮਲੇ 'ਚ ਪੁਲਸ 'ਤੇ ਕਾਰਵਾਈ ਨਾ ਕਰਨ ਅਤੇ ਹੁਣ ਪੰਚਾਇਤ ਵਲੋਂ ਗਲੀ ਦੇ ਨਿਰਮਾਣ ਸਮੇਂ ਜਾਣਬੁੱਝ ਕੇ ਉਸਦੇ ਘਰ ਨੂੰ ਨੀਵਾਂ ਰੱਖਣ ਦੇ ਕਥਿਤ ਦੋਸ਼ ਲਾਉਂਦਿਆਂ ਇੱਕ ਪੀੜਤ ਔਰਤ ਵਲੋਂ ਪੈਟਰੋਲ ਦੀ ਬੋਤਲ ਲੈਕੇ ਦੇਰ ਸ਼ਾਮ ਪਾਣੀ ਵਾਲੀ ਟੈਂਕੀ 'ਤੇ ਚੜ੍ਹ ਜਾਣ ਅਤੇ ਇਨਸਾਫ਼ ਮਿਲਣ ਤੱਕ ਥੱਲੇ੍ਹ ਨਾ ਉੱਤਰਨ ਦੇ ਐਲਾਨ ਕਰਨ ਦੀ ਖ਼ਬਰ ਮਿਲਦਿਆਂ ਹੜਕੰਪ ਮਚ ਗਿਆ ਅਤੇ ਪੁਲਿਸ ਪ੍ਰਸ਼ਾਸਨ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ | ਜਾਣਕਾਰੀ ਅਨੁਸਾਰ ਪਿੰਡ ਭਾਗੀਵਾਂਦਰ ਦੀ ਪਰਵਿੰਦਰ ਕੌਰ ਪਤਨੀ ਹਰਜਿੰਦਰ ਸਿੰਘ ਅੱਜ ਦੇਰ ਸ਼ਾਮ ਪਿੰਡ ਦੇ ਵਾਟਰ ਵਰਕਸ 'ਚ ਬਣੀ ਪਾਣੀ ਵਾਲੀ ਟੈਂਕੀ 'ਤੇ ਪੈਟਰੋਲ ਦੀ ਬੋਤਲ ਲੈ ਕੇ ਚੜ ਗਈ, ਜਿਸ ਨੇ ਕਥਿਤ ਦੋਸ਼ ਲਗਾਇਆ ਕਿ ਕੁੱਝ ਸਮਾਂ ਪਹਿਲਾ ਉਸ ਦੇ ਪੁੱਤਰ ਦੀ ਕੁੱਟਮਾਰ ਕੀਤੀ ਗਈ ਸੀ, ਜਿਸ ਵਿਚ ਤਲਵੰਡੀ ਸਾਬੋ ਪੁਲਸ ਨੇ ਬਣਦੀ ਕਾਰਵਾਈ ਨਾ ਕਰਕੇ ਉਨ੍ਹਾਂ ਦੇ ਪਰਿਵਾਰ ਨੂੰ ਇਨਸਾਫ਼ ਨਹੀਂ ਦਿੱਤਾ, ਭਾਵੇ ਕਿ ਇਨਸਾਫ਼ ਹਾਸਿਲ ਕਰਨ ਲਈ ਉਸਨੇ ਲਗਾਤਾਰ ਥਾਣੇ ਅਤੇ ਪੁਲੀਸ ਅਧਿਕਾਰੀਆਂ ਦੇ ਦਫ਼ਤਰਾਂ 'ਚ ਗੇੜੇ ਮਾਰੇ | ਪੀੜਿਤ ਔਰਤ ਨੇ ਦਾਅਵਾ ਕੀਤਾ ਕਿ ਹੁਣ ਉਸ ਨਾਲ ਇੱਕ ਹੋਰ ਧੱਕਾ ਸੱਤਾਧਿਰ ਨਾਲ ਸਬੰਧਿਤ ਪਿੰਡ ਦੀ ਪੰਚਾਇਤ ਵਲੋਂ ਕੀਤਾ ਜਾ ਰਿਹੈ ਕਿ ਉਸਦੇ ਘਰ ਅੱਗਿਓਾ ਦੀ ਬਣਾਈ ਜਾ ਰਹੀ ਗਲੀ ਉੱਚੀ ਕਰਕੇ ਬਣਾਈ ਜਾ ਰਹੀ ਹੈ, ਜਦੋਂਕਿ ਘਰ ਨੀਵਾਂ ਰਹਿ ਜਾਵੇਗਾ, ਅਜਿਹਾ ਹੋਣ ਦੀ ਸੂਰਤ 'ਚ ਬਰਸਾਤ ਦੇ ਮੌਸਮ 'ਚ ਉਸਦੇ ਘਰ ਪਾਣੀ ਵੜ ਜਾਇਆ ਕਰੇਗਾ | ਉਸ ਮੁਤਾਬਿਕ ਉਸਨੇ ਗਲੀ ਦਾ ਪੱਧਰ ਸਹੀ ਕਰਵਾਉਣ ਦੀ ਗੁਹਾਰ ਲਗਾਈ, ਪਰ ਕੋਈ ਸੁਣਵਾਈ ਨਹੀਂ ਹੋਈ ਅਤੇ ਮਜਬੂਰਨ ਅੱਜ ਉਸਨੂੰ ਇਹ ਕਦਮ ਉਠਾਉਣਾ ਪਿਆ | ਓਧਰ ਮਾਮਲੇ ਦਾ ਪਤਾ ਲਗਦੇ ਹੀ ਥਾਣਾ ਤਲਵੰਡੀ ਸਾਬੋ ਦੇ ਮੁਖੀ ਹਰਬੰਸ ਸਿੰਘ ਪੁਲਸ ਪਾਰਟੀ ਸਮੇਤ ਮੌਕੇ 'ਤੇ ਪੁੱਜ ਗਏ ਤੇ ਟੈਂਕੀ 'ਤੇ ਚੜੀ ਅÏਰਤ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਆਪਣੀ ਮੰਗਾਂ ਮਨਵਾਉਣ ਪ੍ਰਤੀ ਵਜਿੱਦ ਦਿਖਾਈ ਦਿੱਤੀ | ਬਾਅਦ 'ਚ ਡੀ.ਐੱਸ.ਪੀ ਤਲਵੰਡੀ ਸਾਬੋ ਹਰਪ੍ਰੀਤ ਸਿੰਘ ਵੀ ਮੌਕੇ 'ਤੇ ਪੁੱਜੇ ਤੇ ਪੀੜਤ ਔਰਤ ਦੀਆਂ ਮੰਗਾਂ ਦੇ ਹੱਲ ਲਈ ਢੁਕਵੇਂ ਯਤਨ ਕਰਨ ਦੇ ਦਿੱਤੇ ਭਰੋਸੇ ਉਪਰੰਤ ਅਖੀਰ ਕਾਫੀ ਸਮੇਂ ਬਾਅਦ ਔਰਤ ਟੈਂਕੀ ਤੋਂ ਥੱਲ੍ਹੇ ਉੱਤਰ ਆਈ | ਮਾਮਲੇ ਬਾਰੇ ਡੀ.ਐੱਸ.ਪੀ ਤਲਵੰਡੀ ਸਾਬੋ ਨੇ ਦੱਸਿਆ ਕਿ ਉਸ ਦੇ ਲੜਕੇ ਦੀ ਕੁੱਟਮਾਰ ਮਾਮਲੇ ਵਿਚ ਮਾਮਲਾ ਦਰਜ ਕੀਤਾ ਗਿਆ ਸੀ 'ਤੇ ਬਣਦੀ ਕਰਵਾਈ ਕੀਤੀ ਜਾ ਰਹੀ ਹੈ ਜਦੋਂਕਿ ਗਲੀ ਦੇ ਮਾਮਲੇ ਵਿਚ ਪੰਚਾਇਤ ਨੂੰ ਕੱਲ੍ਹ (23 ਨਵੰਬਰ) ਨੂੰ ਬੁਲਾ ਲਿਆ ਗਿਆ ਹੈ | ਉਨ੍ਹਾਂ ਨੇ ਉਮੀਦ ਪ੍ਰਗਟਾਈ ਕਿ ਮਾਮਲਾ ਜਲਦੀ ਹੱਲ ਕਰ ਲਿਆ ਜਾਵੇਗਾ |
