ਧੂਰੀ, 31 ਅਕਤੂਬਰ (ਲਖਵੀਰ ਸਿੰਘ ਧਾਂਦਰਾ) - ਅੱਜ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਬਲਾਕ ਧੂਰੀ ਵਲੋਂ ਬਲਾਕ ਪ੍ਰਧਾਨ ਹਰਬੰਸ ਸਿੰਘ ਲੱਡਾ ਦੀ ਅਗਵਾਈ ਹੇਠ ਇੱਕ ਮੀਟਿੰਗ ਕੀਤੀ ਗਈ, ਜਿਸ ਵਿਚ ਦਰਸ਼ਨ ਦੇਵੀ ਪਤਨੀ ਸਵ. ਸ਼ਿਆਮ ਲਾਲ ਅਤੇ ਦਵਿੰਦਰ ਪਾਲ ਪਤਨੀ ਬਿੰਨੂ ਦੇ ਮਾਮਲੇ ਨੂੰ ਉਠਾਇਆ ਗਿਆ | ਪਰਿਵਾਰ ਨੇ ਦਸੰਬਰ 2015 ਵਿਚ ਸਟੇਟ ਬੈਂਕ ਆਫ਼ ਇੰਡੀਆ ਤੋਂ ਤੇਹਰਾ ਲੱਖ ਰੁਪਏ ਦਾ ਲੋਨ ਮਕਾਨ ਬਣਾਉਣ ਲਈ ਲਿਆ ਸੀ | ਪਰਿਵਾਰ ਨੇ ਹੁਣ ਤੱਕ ਸੱਤ ਲੱਖ ਚਿਹੱਤਰ ਹਜ਼ਾਰ ਰੁਪਏ ਭਰ ਦਿੱਤੇ ਹਨ ਪਰ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਅਤੇ ਮਾਲੀ ਕਮਜ਼ੋਰੀ ਕਾਰਨ ਬਾਕੀ ਕਰਜ਼ਾ ਚੁਕਾਉਣ ਤੋਂ ਅਸਮਰਥ ਹੈ | ਯੂਨੀਅਨ ਨੇ ਦੱਸਿਆ ਕਿ ਬੈਂਕ ਵਲੋਂ ਕੁੱਲ 26 ਲੱਖ ਰੁਪਏ ਦਾ ਲੋਨ ਪਾਸ ਕੀਤਾ ਗਿਆ ਸੀ ਪਰ ਕੇਵਲ ਤੇਰਾਂ ਲੱਖ ਰੁਪਏ ਹੀ ਦਿੱਤੇ ਗਏ ਸਨ | ਇਸ ਤੋਂ ਇਲਾਵਾ, ਕਮਿਸ਼ਨ ਵਜੋਂ 1.50 ਲੱਖ ਅਤੇ ਬੀਮੇ ਵਜੋਂ 1 ਲੱਖ ਪਹਿਲਾਂ ਹੀ ਕੱਟ ਲਿਆ ਗਿਆ ਸੀ | ਜਿਨ੍ਹਾਂ ਦਾ ਨਾਮ ਹੈਪੀ ਗਰਗ ਵਕੀਲ ਏਜੰਟ, ਹਿਨਾ ਸਿੰਗਲਾ ਜੂਨੀਅਰ ਮੈਨੇਜਰ ਅਤੇ ਵੱਡੇ ਮੈਨੇਜਰ ਨੇ ਵਾਅਦਾ ਕੀਤਾ ਸੀ ਕਿ ਚਾਰ ਮਹੀਨੇ ਬਾਅਦ ਬਾਕੀ ਤੇਰਾਂ ਲੱਖ ਰੁਪਏ ਮਿਲਣਗੇ, ਪਰ ਅਜਿਹਾ ਨਹੀਂ ਹੋਇਆ | ਯੂਨੀਅਨ ਨੇ ਸਾਫ਼ ਕਿਹਾ ਹੈ ਕਿ ਕਿਸੇ ਵੀ ਕੀਮਤ 'ਤੇ ਇਸ ਪਰਿਵਾਰ ਦਾ ਵਰੰਟ ਜਾਂ ਕਬਜ਼ਾ ਨਹੀਂ ਹੋਣ ਦਿੱਤਾ ਜਾਵੇਗਾ | ਇਸ ਮੌਕੇ ਹਰਪਾਲ ਸਿੰਘ ਪੇਧਨੀ, ਕਰਮਜੀਤ ਬੇਨੜਾ, ਜੋਰਾ ਸਿੰਘ, ਮਹਿੰਦਰ ਸਿੰਘ ਭਸੌੜ ਅਤੇ ਪਿੰਡ ਦੇ ਹੋਰ ਕਿਸਾਨ ਹਾਜ਼ਰ ਸਨ |
