ਖੰਨਾ, 28 ਦਸੰਬਰ (ਹਰਜਿੰਦਰ ਸਿੰਘ ਲਾਲ)-ਗੁਰੂ ਅੰਗਦ ਦੇਵ ਨਗਰ, ਅਮਲੋਹ ਰੋਡ ਇਲਾਕੇ ਵਿਚ ਘਰ ਦੇ ਨਜ਼ਦੀਕ ਖੜੀ ਬਜ਼ੁਰਗ ਔਰਤ ਦੇ ਕੰਨ ਚੋਂ 2 ਬਾਈਕ ਸਵਾਰ ਅਣਪਛਾਤੇ ਨੌਜਵਾਨ ਸੋਨੇ ਦੀ ਵਾਲੀ ਝਪਟ ਕੇ ਫ਼ਰਾਰ ਹੋ ਗਏ | ਕੰਨ ਚੋਂ ਵਾਲੀ ਖਿੱਚਣ ਕਾਰਨ ਔਰਤ ਦੇ ਕੰਨ ਵਿਚੋਂ ਖੂਨ ਵਗਣ ਲੱਗ ਪਿਆ | ਖੋਹ ਦੀ ਇਹ ਵਾਰਦਾਤ ਘਰ ਦੇ ਨਜ਼ਦੀਕ ਲੱਗੇ ਸੀ. ਸੀ. ਟੀ. ਵੀ. ਕੈਮਰਿਆਂ ਵਿਚ ਕੈਦ ਹੋ ਗਈ ਹੈ | ਵਾਰਦਾਤ ਸੰਬੰਧੀ ਪੁਲਿਸ ਨੂੰ ਸੂਚਨਾ ਦੇ ਦਿੱਤੀ ਗਈ ਹੈ | ਪੀੜਤ ਔਰਤ ਚੰਦਰ ਕਾਂਤਾ ਦੇ ਲੜਕੇ ਦਵਿੰਦਰ ਕੁਮਾਰ ਵਾਸੀ ਗਲੀ ਨੰਬਰ 3 ਗੁਰੂ ਅੰਗਦ ਦੇਵ ਨਗਰ ਨੇ ਦੱਸਿਆ ਕਿ ਅੱਜ ਦੁਪਹਿਰ ਕਰੀਬ 2 ਵਜੇ ਉਸ ਦੀ ਮਾਤਾ ਘਰ ਦੇ ਨਜ਼ਦੀਕ ਗਲੀ ਦੇ ਮੋੜ ਤੇ ਖੜੀ ਸੀ | ਇਸ ਦੌਰਾਨ ਅਮਲੋਹ ਰੋਡ ਵਾਲੀ ਸਾਈਡ ਤੋਂ ਬਿਨਾਂ ਨੰਬਰ ਵਾਲੇ ਮੋਟਰਸਾਈਕਲ 'ਤੇ ਸਵਾਰ 2 ਅਣਪਛਾਤੇ ਨੌਜਵਾਨ ਆਏ, ਜੋ ਉਸ ਦੀ ਮਾਤਾ ਦੇ ਸੱਜੇ ਕੰਨ ਵਿਚ ਪਹਿਨੀ ਹੋਈ ਸੋਨੇ ਦੀ ਵਾਲੀ ਝਪਟ ਕੇ ਪਾਲ ਨਰਸਿੰਗ ਹੋਮ ਵਾਲੇ ਪਾਸੇ ਫ਼ਰਾਰ ਹੋ ਗਏ | ਬਾਅਦ ਵਿਚ ਉਨ੍ਹਾਂ ਨੇ ਥਾਣਾ ਸਿਟੀ-2 ਵਿਚ ਪਹੁੰਚ ਕੇ ਪੁਲਿਸ ਨੂੰ ਲਿਖਤੀ ਸ਼ਿਕਾਇਤ ਕੀਤੀ | ਪੁਲਿਸ ਨੇ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ |
