ਲੰਡਨ, 3 ਨਵੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਪਿਛਲੇ ਹਫ਼ਤੇ ਵੈਸਟ ਮਿਡਲੈਂਡ ਪੁਲਿਸ ਨੇ ਰਿਪੋਰਟ ਦਿੱਤੀ ਸੀ ਕਿ ਵੁਲਵਰਹੈਂਪਟਨ ਵਿਚ 50 ਸਾਲਾਂ ਦੀ ਇੱਕ ਔਰਤ 'ਤੇ 20 ਸਾਲਾਂ ਦੇ ਚਾਰ ਜਾਂ ਪੰਜ ਆਦਮੀਆਂ ਦੇ ਇੱਕ ਸਮੂਹ ਦੁਆਰਾ ਹਮਲਾ ਕੀਤਾ ਗਿਆ ਸੀ ਜੋ ਨਸਲੀ ਨਫ਼ਰਤ ਤੋਂ ਪ੍ਰੇਰਿਤ ਸੀ | ਹਮਲੇ ਵਿਚ ਇੱਕ ਹੱਥ ਵਿਚ ਫੜੇ ਜਾਣ ਵਾਲੇ ਬਿਜਲਈ ਯੰਤਰ ਦੀ ਵਰਤੋਂ ਕੀਤੀ ਗਈ ਸੀ ਤੇ ਔਰਤ ਨੂੰ ਧਾਤ ਦੀ ਬਾਰ ਨਾਲ ਮਾਰਨ ਦੀ ਕੋਸ਼ਿਸ਼ ਕੀਤੀ ਗਈ ਸੀ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਹ ਪੀੜਤਾ ਵੀ ਸਿੱਖ ਹੈ | ਵੈਸਟ ਮਿਡਲੈਂਡਜ਼ ਪੁਲਿਸ ਦੀ ਮੇਜਰ ਕ੍ਰਾਈਮ ਯੂਨਿਟ ਦੇ ਜਾਂਚ ਇੰਸਪੈਕਟਰ ਰਾਚੇਲ ਐਲਨ ਨੇ ਕਿਹਾ ਕਿ ਇਹ ਨਸਲੀ ਤੌਰ 'ਤੇ ਵਧੇ ਹੋਏ ਤੱਤ ਨਾਲ ਇੱਕ ਘਿਨਾਉਣਾ ਹਮਲਾ ਸੀ ਅਤੇ ਅਸੀਂ ਜਿੰਮੇਵਾਰ ਲੋਕਾਂ ਨੂੰ ਲੱਭਣ ਲਈ ਸਖ਼ਤ ਮਿਹਨਤ ਕਰ ਰਹੇ ਹਾਂ | ਇਹ ਹਮਲਾ 27 ਅਕਤੂਬਰ ਨੂੰ ਹੋਇਆ ਸੀ ਤੇ ਵੁਲਵਰਹੈਂਪਟਨ, ਓਲਡਬਰੀ ਤੇ ਵਾਲਸਾਲ ਵਿਚ ਤਿੰਨ ਹੋਰ ਨਸਲੀ ਹਮਲਿਆਂ ਤੋਂ ਬਾਅਦ ਅਤੇ ਸੰਸਦ ਵਿਚ ਸਿੱਖ ਵਿਰੋਧੀ ਨਫ਼ਰਤ ਨਾਲ ਨਜਿੱਠਣ ਲਈ ਸਰਕਾਰ ਤੋਂ ਤੁਰੰਤ ਕਾਰਵਾਈ ਦੀ ਮੰਗ ਕਰਦੀ ਮੁਹਿੰਮ ਸ਼ੁਰੂ ਕਰਨ ਤੋਂ ਇੱਕ ਦਿਨ ਪਹਿਲਾਂ ਹੋਇਆ | ਓਲਡਬਰੀ ਅਤੇ ਵਾਲਸਾਲ ਵਿਚ ਹੋਏ ਦੋ ਹਮਲੇ ਇੱਕ ਤੋਂ ਬਾਅਦ ਇੱਕ ਹੋਏ ਸਨ ਤੇ 20 ਸਾਲਾਂ ਦੀਆਂ ਦੋ ਸਿੱਖ ਔਰਤਾਂ ਨਾਲ ਨਸਲੀ ਤੌਰ 'ਤੇ ਹੋਏ ਹਮਲੇ ਸਿੱਖ ਭਾਈਚਾਰੇ ਵਿਚ ਰੋਸ ਫੈਲਾ ਚੁੱਕੇ ਹਨ | ਸਿੱਖ ਫੈਡਰੇਸ਼ਨ (ਯੂ.ਕੇ.) ਦੇ ਭਾਈ ਅਮਰੀਕ ਸਿੰਘ ਗਿੱਲ ਤੇ ਭਾਈ ਦਬਿੰਦਰਜੀਤ ਸਿੰਘ ਓ.ਬੀ.ਈ. ਨੇ ਕਿਹਾ ਕਿ ਗ੍ਰਹਿ ਦਫ਼ਤਰ ਦੇ ਅੰਕੜਿਆਂ ਦਾ ਵਿਸ਼ਲੇਸ਼ਣ ਦਰਸਾਉਂਦਾ ਹੈ ਕਿ ਗੈਰ-ਗੋਰਿਆਂ ਨੂੰ ਗੋਰਿਆਂ ਨਾਲੋਂ ਨਫ਼ਰਤ ਦੇ ਅਪਰਾਧਾਂ ਦਾ ਅਨੁਭਵ ਕਰਨ ਦੀ ਸੰਭਾਵਨਾ ਦਸ ਗੁਣਾ ਜਿਆਦਾ ਹੈ ਅਤੇ ਨਸਲੀ ਘੱਟ ਗਿਣਤੀਆਂ ਵਿਚ ਸਿੱਖ ਭਾਈਚਾਰਾ ਨਫ਼ਰਤੀ ਅਪਰਾਧਾਂ ਦਾ ਸਭ ਤੋਂ ਵੱਧ ਸਾਹਮਣਾ ਕਰ ਰਿਹਾ ਹੈ | ਐਮ. ਪੀ. ਪ੍ਰੀਤ ਕੌਰ ਗਿੱਲ ਨੇ ਵੀ ਵੁਲਵਰਹੈਂਪਟਨ ਵਿਚ ਹੋਏ ਨਸਲੀ ਹਮਲੇ ਦੀ ਨਿੰਦਾ ਕੀਤੀ ਹੈ | ਇੱਕ ਅਦਾਲਤੀ ਕੇਸ ਵਿਚ 40 ਸਾਲ ਪਹਿਲਾਂ ਸਿੱਖਾਂ ਨੂੰ ਇੱਕ ਵੱਖਰੇ ਨਸਲੀ ਸਮੂਹ ਵਜੋਂ ਪਰਿਭਾਸ਼ਿਤ ਕੀਤਾ ਸੀ, ਪਰ ਪੁਲਿਸ ਜਾਣਬੁੱਝ ਕੇ ਪੀੜਤ ਦੀ ਜਾਤੀ ਨੂੰ ਸਿੱਖ ਵਜੋਂ ਦਰਜ ਨਾ ਕਰਕੇ ਸਮਾਨਤਾ ਕਾਨੂੰਨ ਦੀ ਪਾਲਣਾ ਕਰਨ ਵਿਚ ਅਸਫਲ ਰਹੀ ਹੈ | ਜਨਗਣਨਾ ਵਿਚ ਸਿੱਖਾਂ ਨੂੰ ਐਥਨਿਕ ਤੌਰ 'ਤੇ ਸ਼ਾਮਿਲ ਕਰਨ ਲਈ ਮੰਗ ਕੀਤੀ ਗਈ ਸੀ | ਸਾਨੂੰ ਯਕੀਨ ਹੈ ਕਿ ਰਾਸ਼ਟਰੀ ਅੰਕੜਾ ਦਫਤਰ ਦਾ ਵਿਸ਼ਲੇਸ਼ਣ ਦਿਖਾਏਗਾ ਕਿ ਸਿੱਖ ਵਿਰੋਧੀ ਨਫ਼ਰਤ ਦੇ ਅਪਰਾਧ ਅਧਿਕਾਰਤ ਤੌਰ 'ਤੇ ਰਿਪੋਰਟ ਕੀਤੇ ਕੇਸਾਂ ਨਾਲੋਂ ਵੀਹ ਗੁਣਾ ਵੱਧ ਹਨ | ਐਮ. ਪੀ. ਇਸ ਹਫ਼ਤੇ ਦੇ ਅੰਤ ਵਿਚ ਪੁਲਿਸ ਮੰਤਰੀ ਸਾਰਾਹ ਜੋਨਸ ਨਾਲ ਮੁਲਾਕਾਤ ਕਰ ਰਹੇ ਹਨ ਤੇ ਸਾਨੂੰ ਭਰੋਸਾ ਹੈ ਕਿ ਗ੍ਰਹਿ ਦਫ਼ਤਰ ਧਰਮ ਤੇ ਨਸਲੀ ਡੇਟਾ ਲਈ ਉਹ ਸਾਡੇ ਨਵੀਨਤਾਕਾਰੀ ਪ੍ਰਸਤਾਵ ਨੂੰ ਅਪਣਾਉਣਗੇ | ਸਿੱਖ ਆਗੂਆਂ ਨੇ ਸਿੱਖਾਂ ਵਿਰੁੱਧ ਹੋ ਰਹੀ ਨਸਲੀ ਨਫ਼ਰਤੀ ਹਿੰਸਾ ਨੂੰ ਰੋਕਣ ਲਈ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ |
