04-11-25

 ਇਨਸਾਨੀਅਤ ਹੋਈ ਸ਼ਰਮਸਾਰ
ਹਾਲ ਹੀ ਵਿਚ ਡੇਰਾਬੱਸੀ ਦੇ ਇਕ ਪੋਤੇ ਨੇ ਆਪਣੀ ਦਾਦੀ ਦਾ ਹੀ ਕਤਲ ਕਰ ਦਿੱਤਾ ਹੈ। ਕਿਉਂਕਿ ਦਾਦੀ ਉਸਨੂੰ ਸ਼ਰਾਬ ਪੀਣ ਤੋਂ ਰੋਕਦੀ ਸੀ। ਜਦਕਿ ਪੋਤਾ ਸ਼ਰਾਬ ਦਾ ਆਦੀ ਸੀ। ਇਸ ਘਟਨਾ ਨੇ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਦਿੱਤਾ ਹੈ।
ਖ਼ੂਨ ਦੇ ਰਿਸ਼ਤਿਆਂ ਦੀ ਅਹਿਮੀਅਤ ਖ਼ਤਮ ਹੋ ਰਹੀ ਹੈ। ਇਹ ਕੋਈ ਅਜਿਹੀ ਪਹਿਲੀ ਘਟਨਾ ਨਹੀਂ ਹੈ, ਪਹਿਲਾਂ ਵੀ ਕਈ ਅਜਿਹੀਆਂ ਵਾਰਦਾਤਾਂ ਹੋ ਚੁੱਕੀਆਂ ਹਨ। ਪਿੱਛੇ ਜਹੇ ਫਿਰੋਜ਼ਪੁਰ ਵਿਚ ਵੀ ਇਖ ਪੁੱਤਰ ਵੇਲੇ ਆਪਣੇ ਪਿਉ ਨੂੰ ਮਾਰ ਦਿੱਤਾ ਸੀ ਕਿਉਂਕਿ ਪਿਉ ਉਸ ਤੋਂ ਪੈਸਿਆਂ ਦਾ ਹਿਸਾਬ ਕਿਤਾਬ ਮੰਗਦਾ ਸੀ। ਜਦਕਿ ਪੁੱਤਰ ਨੇ ਪੈਸੇ ਗਲਤ ਥਾਂ 'ਤੇ ਲਗਾ ਦਿੱਤੇ ਸਨ। ਮੋਗਾ ਵਿਚ ਇਕ ਨਸ਼ੇੜੀ ਪੁੱਤ ਵਲੋਂ ਆਪਣੇ ਮਾਂ ਦਾ ਕਤਲ ਕਰ ਦਿੱਤਾ ਗਿਆ ਸੀ। ਕਿਉਂਕਿ ਮਾਂ ਉਸ ਨੂੰ ਹਰ ਰੋਜ਼ ਚਿੱਟਾ ਪੀਣ ਤੋਂ ਰੋਕਦੀ ਸੀ। ਕਿਹੋ ਜਿਹਾ ਸਮਾਂ ਆ ਗਿਆ ਹੈ ਕਿ ਆਪਣੇ ਹੀ ਜਾਇਆਾਂ ਵਲੋਂ ਖ਼ੂਨ ਕੀਤੇ ਜਾ ਰਹੇ ਹਨ। ਜੋ ਮਾਂ-ਬਾਪ ਤੰਗੀਆਂ ਕੱਟ ਕੇ ਆਪਣੀ ਔਲਾਦ ਨੂੰ ਪੜ੍ਹਾਉਂਦੇ ਹਨ। ਔਲਾਦ ਉਨ੍ਹਾਂ ਦਾ ਖ਼ੂਨ ਕਰ ਰਹੀ ਹੈ ਤਾਂ ਉਨ੍ਹਾਂ 'ਤੇ ਕੀ ਬੀਤਦੀ ਹੋਵੇਗੀ। ਕਈ ਵਾਰ ਮਾਂ-ਪਿਉ ਨੂੰ ਆਪਣੀ ਔਲਾਦ ਖਾਤਰ ਦੂਜਿਆਂ ਤੋਂ ਬਹੁਤ ਕੁਝ ਸੁਣਨਾ ਪੈਂਦਾ ਹੈ, ਜ਼ਲੀਲ ਹੋਣਾ ਪੈਂਦਾ ਹੈ ਪਰ ਬੱਚੇ ਨਹੀਂ ਮੰਨਦੇ ਹਨ। ਮਾਂ-ਪਿਉ ਬੱਚਿਆਂ ਨੂੰ ਚੰਗੇ ਸੰਸਕਾਰ ਸਿਖਾਉਣੇ ਹਨ ਪਰ ਬੱਚੇ ਸੁਣਦੇ ਨਹੀਂ। ਜਦੋਂ ਆਪਣੀ ਨੌਜਵਾਨੀ ਨਸ਼ਿਆਂ ਦੀ ਆਦੀ ਹੋ ਚੁੱਕੀ ਹੈ ਜਿਨ੍ਹਾਂ ਮੋਬਾਈਲ ਨੂੰ ਜ਼ਿੰਦਗੀ ਦਾ ਆਧਾਰ ਬਣਾ ਲਿਆ ਹੈ।

-ਸੰਜੀਵ ਸਿੰਘ ਸੈਣੀ
ਮੁਹਾਲੀ।

ਪਾਣੀ ਪਲੀਤ ਨਾ ਕਰੋ
ਜਦੋਂ ਕੋਈ ਵੀ ਚੀਜ਼ ਗੰਦੀ/ਮੈਲੀ ਹੋ ਜਾਂਦੀ ਹੈ ਤਾਂ ਅਸੀਂ ਉਸ ਨੂੰ ਪਾਣੀ ਨਾਲ ਸਾਫ਼ ਕਰਦੇ ਹਾਂ। ਇਥੋਂ ਤੱਕ ਕਿ ਪਾਣੀ ਤੋਂ ਬਿਨਾਂ ਧਰਤੀ ਉੱਪਰ ਜੀਵਨ ਦੀ ਕਲਪਨਾ ਵੀ ਨਹੀਂ ਕੀਤੀ ਜਾ ਸਕਦੀ। ਇਸੇ ਕਰਕੇ ਹੀ ਸਾਡੇ ਗੁਰੂ ਸਾਹਿਬਾਨ ਜੀ ਨੇ ਗੁਰਬਾਣੀ ਵਿਚ ਪਾਣੀ ਨੂੰ ਪਿਤਾ ਦਾ ਦਰਜਾ ਦਿੱਤਾ ਹੈ। ਪੁਰਾਣੇ ਸਮਿਆਂ ਵਿਚ ਲੋਕ ਅਨਪੜ੍ਹ ਹੁੰਦੇ ਸਨ, ਪਰੰਤੂ ਪਾਣੀ ਨੂੰ ਹਮੇਸ਼ਾ ਸਾਫ਼ ਰੱਖਦੇ ਸਨ। ਪਾਣੀ ਪੀਣ ਲਈ ਵੀ ਬਰਤਨ ਨੂੰ ਮੂੰਹ ਲਗਾਉਣ ਦੀ ਥਾਂ ਹੱਥ ਦੀ ਹਥੇਲੀ ਵਰਤੀ ਜਾਂਦੀ ਸੀ।
ਹੁਣ ਜਦੋਂ ਕਦੇ ਕੋਈ ਨਹਿਰ ਬੰਦ ਹੁੰਦੀ ਹੈ ਤਾਂ ਖਾਲੀ ਹੋਈ ਨਹਿਰ ਵਿਚ ਲੋਕਾਂ ਵਲੋਂ ਸੁੱਟੀ ਗੰਦਗੀ ਵੇਖ ਕੇ ਪਾਣੀ ਪੀਣ ਤੋਂ ਹਮੇਸ਼ਾਂ ਲਈ ਮਨ ਤੌਬਾ ਕਰਨ ਨੂੰ ਕਰਦਾ ਹੈ। ਮਨੁੱਖੀ ਜੀਵਨ ਨੂੰ ਤੰਦਰੁਸਤ ਰੱਖਣ ਲਈ ਸਾਨੂੰ ਹਮੇਸ਼ਾ ਹੀ ਪਾਣੀ ਦੀ ਪਵਿੱਤਰਤਾ ਨੂੰ ਕਾਇਮ ਰੱਖਣਾ ਚਾਹੀਦਾ ਹੈ। ਸਰਕਾਰ ਨੂੰ ਵੀ ਪਾਣੀ ਗੰਦਲਾ ਕਰਨ ਵਾਲੇ ਲੋਕਾਂ ਖਿਲਾਫ ਕਰੋਨਾ ਸਮੇਂ ਵਾਂਗ ਸਖ਼ਤੀ ਨਾਲ ਕਾਰਵਾਈ ਕਰਨੀ ਚਾਹੀਦੀ ਹੈ।

-ਅੰਗਰੇਜ਼ ਸਿੰਘ ਵਿੱਕੀ
ਪਿੰਡ ਤੇ ਡਾਕ. ਕੋਟਗੁਰੂ (ਬਠਿੰਡਾ)