ਐੱਚ.ਏ.ਐੱਲ. ਨੇ ਤੇਜਸ ਟ੍ਰੇਨਰ ਤੇ ਐੱਚ.ਟੀ.ਟੀ.-40 ਹਵਾਈ ਫ਼ੌਜ ਨੂੰ ਸੌਂਪੇ

ਧਰੁਵ ਹੈਲੀਕਾਪਟਰ ‘ਪਵਨ ਹੰਸ ਲਿਮਿਟਡ’ ਦੇ ਕੀਤਾ ਹਵਾਲੇ
ਬੈਂਗਲੁਰੂ, 18 ਸਤੰਬਰ (ਪੀ.ਟੀ.ਆਈ.)-ਹਿੰਦੁਸਤਾਨ ਏਅਰੋਨਾਟਿਕਸ ਲਿਮਿਟਡ (ਐੱਚ.ਏ.ਐੱਲ.) ਨੇ ਸ਼ੁੱਕਰਵਾਰ ਨੂੰ 2-ਸੀਟਰ ਐੱਲ.ਸੀ.ਏ. ਤੇਜਸ ਟ੍ਰੇਨਰ ਤੇ ‘ਐੱਚ.ਟੀ.ਟੀ.-40’ ਮੁੱਢਲਾ ਟ੍ਰੇਨਰ ਜਹਾਜ਼ ਭਾਰਤੀ ਹਵਾਈ ਫ਼ੌਜ ਨੂੰ ਸੌਂਪੇ। ਇਸ ਦੇ ਨਾਲ ਹੀ ‘ਧਰੁਵ’ ਆਧੁਨਿਕ ਹਲਕਾ ਹੈਲੀਕਾਪਟਰ ‘ਪਵਨ ਹੰਸ ਲਿਮਿਟਡ’ ਦੇ ਹਵਾਲੇ ਕੀਤਾ ਗਿਆ। ਬੈਂਗਲੁਰੂ ’ਚ ਕਰਵਾਏ ਸਮਾਰੋਹ ਦੌਰਾਨ ਇਨ੍ਹਾਂ ਜਹਾਜ਼ਾਂ ਤੇ ਹੈਲੀਕਾਪਟਰਾਂ ਦਾ ਪ੍ਰਦਰਸ਼ਨ ਵੀ ਕੀਤਾ ਗਿਆ। ਸਮਾਰੋਹ ’ਚ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਅਤੇ ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਕੇ. ਰਾਮਮੋਹਨ ਨਾਇਡੂ ਹਾਜ਼ਰ ਸਨ। ਧਰੁਵ 5.5 ਟਨ ਵਰਗ ਦਾ ਹਲਕਾ, ਦੋ-ਇੰਜਣ ਵਾਲਾ ਮਲਟੀ-ਰੋਲ ਹੈਲੀਕਾਪਟਰ ਹੈ, ਜਿਸ ਨੂੰ ਐੱਚ.ਏ.ਐੱਲ. ਨੇ ਡਿਜ਼ਾਈਨ ਅਤੇ ਤਿਆਰ ਕੀਤਾ ਹੈ। ਐੱਚ.ਏ.ਐੱਲ. ਨੇ ਭਾਰਤੀ ਹਵਾਈ ਫ਼ੌਜ ਨੂੰ 2 ਐੱਲ.ਸੀ.ਏ. ਐੱਫ.ਓ.ਸੀ. ਟ੍ਰੇਨਰ ਜਹਾਜ਼ਾਂ ਤੋਂ ਇਲਾਵਾ ਐੱਚ.ਟੀ.ਟੀ.-40 ਵੀ ਸੌਂਪਿਆ, ਜਿਸਨੂੰ ‘ਅੰਕੁਰ’ ਨਾਮ ਦਿੱਤਾ ਗਿਆ। ਜ਼ਿਕਰਯੋਗ ਹੈ ਕਿ ਐੱਚ.ਟੀ.ਟੀ.-40 ਦੀ ਡਿਲੀਵਰੀ ਨਾਲ 70 ਜਹਾਜ਼ਾਂ ਦੇ ਇਕਰਾਰਨਾਮੇ ਤਹਿਤ ਸਪਲਾਈ ਦੀ ਸ਼ੁਰੂਆਤ ਹੋ ਗਈ ਹੈ।