ਸਾਹਲੋਂ, 4 ਅਪ੍ਰੈਲ (ਜਰਨੈਲ ਸਿੰਘ ਨਿੱਘਾ)- ਪਿੰਡ ਕਰਿਆਮ ਵਾਸੀ ਕੁਲਵਿੰਦਰ ਕੌਰ ਦਾ ਰੁਜ਼ਗਾਰ ਵਸੀਲਾ ਬਣਾਉਣ ਲਈ 31 ਹਜ਼ਾਰ ਦੀ ਕੀਮਤ ਵਾਲੇ ਦੋ ਪਿ੍ੰਟਰ ਭੇਟ ਕੀਤੇ ਗਏ | ਇਹ ਸਹਿਯੋਗ ਉਸ ਦੀ ਕੰਮਜ਼ੋਰ ਆਰਥਿਕਤਾ ਅਤੇ ਸਰੀਰਕ ਅਪਾਹਜਤਾ ਨੂੰ ਮੁੱਖ ਰੱਖਦਿਆਂ ਕੀਤਾ ਗਿਆ | ਇਸ ਸਹਿਯੋਗ ਲਈ ਲਾਭਪਾਤਰੀ ਨੇ ਅਮਰੀਕਾ ਦੇ ਸੰਧੂ ਪਰਿਵਾਰ ਦਾ ਧੰਨਵਾਦ ਕੀਤਾ ਗਿਆ | ਇਹ ਪਿ੍ੰਟਰ ਭੇਟ ਕਰਨ ਸਮਾਜ ਸੇਵੀ ਸ. ਸਤਨਾਮ ਸਿੰਘ ਬਲਾਕੀਪੁਰ ਪਿੰਡ ਕਰਿਆਮ ਪੁੱਜੇ | ਉਹਨਾਂ ਦੱਸਿਆ ਕਿ ਇਹ ਸਹਿਯੋਗ ਸ. ਸਤਨਾਮ ਸਿੰਘ ਸੰਧੂ ਅਤੇ ਕਰਨੈਲ ਸਿੰਘ ਸੰਧੂ ਵਲੋਂ ਸਮਾਜ ਸੇਵਾ ਦੇ ਕੀਤੇ ਜਾ ਰਹੇ ਕਾਰਜਾਂ ਦੀ ਲੜੀ ਤਹਿਤ ਕੀਤਾ ਗਿਆ ਹੈ | ਉਹਨਾਂ ਦੱਸਿਆ ਕਿ ਸੰਧੂ ਪਰਿਵਾਰ ਜਿੱਥੇ ਮਨੁੱਖੀ ਅਧਿਕਾਰਾਂ ਦੀ ਪ੍ਰਤੀਕ 'ਜਹਾਜ਼ ਹਵੇਲੀ' ਦੀ ਸੰਭਾਲ ਲਈ ਕਾਰਜਸ਼ੀਲ ਹੈ ਉੱਥੇ ਸਮਾਜ ਦੇ ਲੋੜਵੰਦ ਵਰਗ ਲਈ ਘਰ ਬਣਾਉਣ, ਆਟੋ ਰਿਕਸ਼ਾ ਦੇਣ ਅਤੇ ਹੋਰ ਸਹਾਇਕ ਸਮੱਗਰੀ ਪ੍ਰਦਾਨ ਕਰਨ ਦੀ ਸੇਵਾ ਕਰ ਰਹੇ ਹਨ | ਦੱਸਣਯੋਗ ਹੈ ਕਿ ਬੀਤੇ ਸਮੇਂ ਉਕਤ ਲਾਭਪਾਤਰੀ ਬਾਰੇ ਸੋਸ਼ਲ ਮੀਡੀਆ 'ਤੇ ਵੀਡੀਓ ਸਾਂਝੀ ਕੀਤੀ ਗਈ ਸੀ ਜਿਸ ਨੂੰ ਦੇਖਦਿਆਂ ਉਕਤ ਦਾਨੀ ਸੱਜਣਾਂ ਵਲੋਂ ਇਹ ਸਹਿਯੋਗ ਕੀਤਾ ਗਿਆ |
