ਮਹਿੰਦਰਾ ਜੀਪ ਹੋਈ ਹਾਦਸਾਗ੍ਰਸਤ

ਬਲਾਚੌਰ, 28 ਜੂਨ (ਨਰੇਸ਼ ਧੌਲ)-ਬੀਤੀ ਰਾਤ ਬਲਾਚੌਰ ਭੱਦੀ ਮੁੱਖ ਸੜਕ ‘ਤੇ ਥੋਪੀਆ ਮੋੜ ਤੇ ਪਿੰਡ ਧੌਲ ਦੇ ਵਿਚਕਾਰ ਇੱਕ ਜੀਪ ਅਚਾਨਕ ਹਾਦਸਾਗ੍ਰਸਤ ਹੋਣ ਦੀ ਖਬਰ ਹੈ। ਜਾਣਕਾਰੀ ਅਨੁਸਾਰ ਲੰਘੀ ਰਾਤ ਇਕ ਮਹਿੰਦਰਾ ਜੀਪ ਨੰਬਰ ਪੀ.ਬੀ 10 ਸੀ ਐਕਸ 9964 ਜੋ ਬਲਾਚੌਰ ਵਾਲੀ ਸਾਈਡ ਤੋਂ ਭੱਦੀ ਵਾਲੀ ਸਾਈਡ ਨੂੰ ਜਾ ਰਹੀ ਸੀ ਕਿ ਪਿੰਡ ਧੌਲ ਅਤੇ ਥੋਪੀਆ ਮੋੜ ਦੇ ਨਜ਼ਦੀਕ ਅਚਾਨਕ ਬੇਕਾਬੂ ਹੋ ਕੇ ਇਕ ਦਰੱਖਤ ਨਾਲ ਟਕਰਾ ਗਈ। ਜਿਸ ਦੇ ਫਲਸਰੂਪ ਜੀਪ ਇਕ ਸਾਈਡ ਨੂੰ ਪਲਟ ਗਈ ਅਤੇ ਅਗਲੇ ਪਾਸੇ ਤੋਂ ਬੁਰੀ ਤਰ੍ਹਾਂ ਨੁਕਸਾਨੀ ਗਈ। ਹਾਦਸੇ ਦੌਰਾਨ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ। ਉਪਰੰਤ ਦਿਨ ਵੇਲੇ ਹਾਦਸਾਗ੍ਰਸਤ ਜੀਪ ਨੂੰ ਉਕਤ ਸਥਾਨ ਤੋਂ ਚੁਕਵਾ ਕੇ ਆਵਾਜਾਈ ਨੂੰ ਨਿਰਵਿਘਨ ਬਣਾਇਆ ਗਿਆ।