ਦੋ ਪੱਕੀਆਂ ਸਹੇਲੀਆਂ ਦੀ ਇਕੋ ਦਿਨ ਹੋਈ ਮੌਤ-ਦੋਵਾਂ ਨੇ ਦਾਨ ਕੀਤੀਆਂ ਅੱਖਾਂ <br/>

ਅ

ਅਜੀਤ ਡੈਸਕ 01-02-2026

ਡੇਰਾਬੱਸੀ, 31 ਜਨਵਰੀ (ਗੁਰਮੀਤ ਸਿੰਘ)-ਭਾਰਤ ਵਿਕਾਸ ਪ੍ਰੀਸ਼ਦ ਦੀ ਵਿਵੇਕਾਨੰਦ ਸ਼ਾਖਾ ਵਲੋਂ 'ਹਨ੍ਹੇਰੇ ਤੋਂ ਉਜਾਲੇ' ਵੱਲ ਮੁਹਿੰਮ ਤਹਿਤ ਅੱਜ ਦੋ ਮਹਿਲਾਵਾਂ ਦੀਆਂ ਮਰਨ ਉਪਰੰਤ ਅੱਖਾਂ ਦਾਨ ਕਰਵਾ ਕੇ 4 ਲੋਕਾਂ ਦੀ ਹਨ੍ਹੇਰੀ ਜ਼ਿੰਦਗੀ 'ਚ ਚਾਨਣ ਕੀਤਾ ਗਿਆ | ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਭਾਰਤ ਵਿਕਾਸ ਪ੍ਰੀਸ਼ਦ ਦੇ ਉਪ ਪ੍ਰਧਾਨ ਨਿਤਿਨ ਜਿੰਦਲ ਨੇ ਦੱਸਿਆ ਕਿ ਪਹਿਲਾਂ ਪ੍ਰੀਸ਼ਦ ਦੀ ਟੀਮ ਵਲੋਂ ਏ. ਟੀ. ਐੱਸ. ਦੀ ਰਹਿਣ ਵਾਲੀ 68 ਸਾਲਾ ਕਮਲਾ ਰਾਣੀ ਪਤਨੀ ਡਾ. ਬਰਖਾ ਰਾਮ ਦੀਆਂ ਮਰਨ ਉਪਰੰਤ ਅੱਖਾਂ ਦਾਨ ਕਰਵਾਈਆਂ ਗਈਆਂ, ਜਦਕਿ ਬਾਅਦ 'ਚ ਏ. ਟੀ. ਐੱਸ. ਦੀ ਹੀ ਰਹਿਣ ਵਾਲੀ 85 ਸਾਲਾ ਕਿ੍ਸ਼ਨਾ ਸੰਗਰ ਦੀਆਂ ਅੱਖਾਂ ਦਾਨ ਕਰਵਾਈਆਂ ਗਈਆਂ | ਅੱਖਾਂ ਲੈਣ ਦੀ ਪੂਰੀ ਪ੍ਰਕਿਰਿਆ ਪੀ. ਜੀ. ਆਈ. ਚੰਡੀਗੜ੍ਹ ਤੋਂ ਆਈ ਡਾਕਟਰਾਂ ਦੀ ਟੀਮ ਵਲੋਂ ਮੁਕੰਮਲ ਕੀਤੀ ਗਈ | ਇਹ ਵੀ ਇਕ ਇਤਫ਼ਾਕ ਹੈ ਕਿ ਮਰਨ ਵਾਲੀਆਂ ਦੋਵੇਂ ਔਰਤਾਂ ਇਕੋ ਟਾਵਰ 'ਚ ਰਹਿੰਦੀਆਂ ਸਨ ਅਤੇ ਉਹ ਬਹੁਤ ਵਧੀਆ ਸਹੇਲੀਆਂ ਵੀ ਸਨ, ਜਦਕਿ ਉਨ੍ਹਾਂ ਦੀ ਮੌਤ ਵੀ 10 ਮਿੰਟਾਂ ਦੇ ਅੰਤਰਾਲ ਨਾਲ ਹੋਈ | ਜ਼ਿਕਰਯੋਗ ਹੈ ਕਿ ਕਮਲਾ ਰਾਣੀ ਦੇ ਪਤੀ ਡਾ. ਬਰਖਾ ਰਾਮ ਡੇਰਾਬੱਸੀ ਦੇ ਪ੍ਰਸਿੱਧ ਸਮਾਜ ਸੇਵੀ ਹਨ, ਜੋ ਕਿ ਮੌਜੂਦਾ ਸਮੇਂ 'ਚ ਭਾਰਤ ਵਿਕਾਸ ਪ੍ਰੀਸ਼ਦ ਦੇ ਪ੍ਰਧਾਨ ਹਨ | ਭਾਰਤ ਵਿਕਾਸ ਪ੍ਰੀਸ਼ਦ ਹੁਣ ਤੱਕ 11 ਵਿਅਕਤੀਆਂ ਦੀਆਂ ਮਰਨ ਉਪਰੰਤ ਅੱਖਾਂ ਦਾਨ ਕਰਵਾ ਚੁੱਕੀ ਹੈ, ਜਿਸ ਨਾਲ 22 ਨੇਤਰਹੀਣ ਵਿਅਕਤੀ ਇਸ ਸੁੰਦਰ ਦੁਨੀਆ ਨੂੰ ਦੇਖਣ ਦੇ ਯੋਗ ਹੋਏ ਹਨ | ਦੋਵਾਂ ਮਹਿਲਾਵਾਂ ਦਾ ਅੰਤਿਮ ਸਸਕਾਰ ਅੱਜ ਰਾਮ ਬਾਗ਼ ਸ਼ਮਸ਼ਾਨਘਾਟ ਵਿਖੇ ਕੀਤਾ ਗਿਆ, ਜਿਥੇ ਕਿ ਵੱਖ-ਵੱਖ ਰਾਜਸੀ, ਧਾਰਮਿਕ, ਤੇ ਸਮਾਜ ਸੇਵੀ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਸਮੇਤ ਵੱਡੀ ਗਿਣਤੀ ਸਥਾਨਕ ਪਤਵੰਤੇ ਹਾਜ਼ਰ ਸਨ |

ਪਿਛਲੀ ਖ਼ਬਰ ਹਰਪ੍ਰੀਤ ਸਿੰਘ ਭਾਜਪਾ ਮੰਡਲ ਲਾਲੜੂ ਦੇ ਇੰਚਾਰਜ ਨਿਯੁਕਤ <br/> ਅਗਲੀ ਖ਼ਬਰ ਗੁਰੂ ਰਵਿਦਾਸ ਜੀ ਦੇ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਨਗਰ ਕੀਰਤਨ ਸਜਾਇਆ <br/>

ਦੋ ਪੱਕੀਆਂ ਸਹੇਲੀਆਂ ਦੀ ਇਕੋ ਦਿਨ ਹੋਈ ਮੌਤ-ਦੋਵਾਂ ਨੇ ਦਾਨ ਕੀਤੀਆਂ ਅੱਖਾਂ <br/>

ਸੰਬੰਧਿਤ ਖ਼ਬਰਾਂ