ਚੰਡੀਗੜ, 25 ਮਈ (ਕਪਿਲ ਵਧਵਾ) ਚੰਡੀਗੜ ਦੇ ਮਲੋਆ ਇਲਾਕੇ ਵਿਚ ਬਿਨਾ ਪਰਮਿਟ ਵੱਡੀ ਮਾਤਰਾ ਵਿਚ ਸ਼ਰਾਬ ਲਿਜਾਉਣ ਦੇ ਮਾਮਲੇ ਵਿਚ ਪੁਲਿਸ ਨੇ ਠੇਕੇ ਦੇ ਕਰਿੰਦੇ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ | ਪੁਲਿਸ ਨੇ ਉਸ ਕੋਲੋਂ ਕੁੱਲ 30 ਪੇਟੀਆਂ ਸ਼ਰਾਬ ਬਰਾਮਦ ਕੀਤੀ ਹੈ | ਹਾਲਾਂਕਿ ਗਿ੍ਫ਼ਤਾਰੀ ਤੋਂ ਬਾਅਦ ਉਕਤ ਨੌਜਵਾਨ ਨੂੰ ਜ਼ਮਾਨਤ 'ਤੇ ਰਿਹਾਅ ਕਰ ਦਿੱਤਾ ਗਿਆ | ਜਾਣਕਾਰੀ ਅਨੁਸਾਰ ਥਾਣਾ ਮਲੋਆ ਪੁਲਿਸ ਨੇ ਮੋਂਟੀ ਵਾਸੀ ਪਿੰਡ ਖੇਮਪੁਰ, ਜ਼ਿਲਾ ਰਾਮਪੁਰ (ਉੱਤਰ ਪ੍ਰਦੇਸ਼) (21) ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ | ਮੁਲਜ਼ਮ ਨੂੰ 24 ਮਈ ਨੂੰ ਮਲੋਆ ਦੇ ਠੇਕੇ ਨੇੜਲੇ ਇਲਾਕੇ ਤੋਂ ਕਾਬੂ ਕੀਤਾ ਗਿਆ | ਪੁਲਿਸ ਮੁਤਾਬਿਕ ਨੌਜਵਾਨ ਜਿਸ ਸਵਿਫ਼ਟ ਗੱਡੀ ਵਿਚ ਸਵਾਰ ਸੀ, ਉਸ ਵਿਚੋਂ 15 ਪੇਟੀਆਂ ਆਈਕੋਨਿਕ ਵਾਈਟ ਵਿਸਕੀ, 9 ਪੇਟੀਆਂ ਬਲੂ ਸਟਰੋਕ ਵਿਸਕੀ, 4 ਪੇਟੀਆਂ ਸੋਕਿਨ ਸੰਤਰਾ ਮਸਾਲੇਦਾਰ ਤੇ 2 ਪੇਟੀਆਂ ਸੁਪਰ ਹਿੰਮਤ ਸੰਤਰਾ ਬਰਾਮਦ ਹੋਈਆਂ | ਥਾਣਾ ਮੁਖੀ ਅਨੁਸਾਰ ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਇਹ ਸ਼ਰਾਬ ਸੈਕਟਰ-22 ਸਥਿਤ ਠੇਕੇ ਲਈ ਲਿਜਾਈ ਜਾ ਰਹੀ ਸੀ ਪਰ ਰਸਤੇ ਵਿਚ ਗੱਡੀ ਖ਼ਰਾਬ ਹੋ ਜਾਣ ਕਾਰਨ ਨਿੱਜੀ ਵਾਹਨ ਦੀ ਵਰਤੋਂ ਕੀਤੀ ਗਈ | ਪੁਲਿਸ ਨੇ ਕਿਹਾ ਕਿ ਸ਼ਰਾਬ ਦੀ ਢੁਆਈ ਲਈ ਮੌਕੇ ਤੇ ਲੋੜੀਂਦਾ ਪਰਮਿਟ ਮੌਜੂਦ ਨਹੀਂ ਸੀ ਜਿਸ ਕਾਰਨ ਕਾਰਵਾਈ ਕੀਤੀ ਗਈ ਹੈ ਤੇ ਗੱਡੀ ਨੂੰ ਵੀ ਜ਼ਬਤ ਕਰ ਲਿਆ ਗਿਆ | ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ ਸਬੰਧੀ ਅਗਲੀ ਕਾਰਵਾਈ ਸੀਨੀਅਰ ਅਧਿਕਾਰੀਆਂ ਦੇ ਨਿਰਦੇਸ਼ਾਂ ਅਨੁਸਾਰ ਕੀਤੀ ਜਾਵੇਗੀ |
