ਮਜੀਠਾ, 11 ਮਈ (ਮਨਿੰਦਰ ਸਿੰਘ ਸੋਖੀ)-ਅਚਾਨਕ ਆਏ ਤੇਜ਼ ਤੂਫਾਨ ਨਾਲ ਹਲਕਾ ਮਜੀਠਾ ਅਧੀਨ ਆਉਂਦੇ ਪਿੰਡ ਟਰਪਈ ਵਿਖੇ ਗ਼ਰੀਬ ਕਿਸਾਨਾਂ ਦੇ ਪਸ਼ੂਆਂ ਦੇ ਸ਼ੈੱਡ ਢਹਿ ਗਏ ਅਤੇ ਸ਼ੈੱਡਾਂ ਅੰਦਰ ਪਿਆ ਪਸ਼ੂਆਂ ਦਾ ਸੁੱਕਾ ਚਾਰਾ ਉਡ ਗਿਆ | ਪੀੜ੍ਹਤ ਕਿਸਾਨ ਗੁਰਮੁੱਖ ਸਿੰਘ, ਨਿਸ਼ਾਨ ਸਿੰਘ, ਪ੍ਰਗਟ ਸਿੰਘ ਨੇ ਭਰੇ ਮਨ ਨਾਲ ਦੱਸਿਆ ਕਿ ਬੀਤੀ ਰਾਤ ਆਏ ਤੇਜ਼ ਤੂਫਾਨ ਨਾਲ ਉਨ੍ਹਾਂ ਦੇ ਪਸ਼ੂਆਂ ਦੇ ਕਮਰੇ ਅਤੇ ਸ਼ੈੱਡ ਦੀਆਂ ਛੱਤਾਂ ਉਡ ਗਈਆਂ | ਉਨ੍ਹਾਂ ਦੱਸਿਆ ਕਿ ਤੂਫਾਨ ਇੰਨਾ ਭਿਆਨਕ ਸੀ ਕਿ ਸ਼ੈੱਡਾਂ ਉਪਰ ਪਾਏ ਲੋਹੇ ਦੇ ਗਾਰਡਰ ਕਰੀਬ 2 ਏਕੜ੍ਹ ਦੂਰ ਪੈਲੀਆਂ ਵਿਚ ਜਾ ਕੇ ਡਿੱਗੇ | ਇਸ ਦੇ ਨਾਲ ਹੀ ਸ਼ੈੱਡਾਂ ਵਿਚ ਪਿਆ ਪਸ਼ੂਆਂ ਦਾ ਸੁੱਕਾ ਚਾਰਾ ਤੂੜੀ ਵਗੈਰਾ ਵੀ ਉਡ ਗਈ ਜਿਹੜੀ ਕਿ ਪਸ਼ੂਆਂ ਵਾਸਤੇ ਸਾਲ ਭਰ ਵਾਸਤੇ ਜਮ੍ਹਾਂ ਕੀਤੀ ਸੀ | ਉਨ੍ਹਾਂ ਦੱਸਿਆ ਕਿ ਕਿਸਮਤ ਨਾਲ ਸੱੈਡ ਅੰਦਰ ਬੱਝੇ ਪਸ਼ੂ ਵਾਲ ਵਾਲ ਬਚ ਗਏ ਅਤੇ ਕਿਸੇ ਵੀ ਵਿਅਕਤੀ ਦਾ ਜਾਨੀ ਨੁਕਸਾਨ ਹੋਣ ਤੋਂ ਬਚ ਗਿਆ | ਪਰ ਫਿਰ ਵੀ ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦਾ ਢਾਈ ਤੋਂ 3 ਲੱਖ ਰੁਪਏ ਦਾ ਵਿੱਤੀ ਨੁਕਸਾਨ ਹੋ ਗਿਆ ਹੈ |
