ਬੱਚੇ ਦੀ ਪਾਣੀ ਵਾਲੀ ਹੌਦੀ 'ਚ ਡੁੱਬਣ ਕਰਕੇ ਮੌਤ <br/>

ਖਰੜ (ਮੋਹਾਲੀ), 23 ਅਪ੍ਰੈਲ (ਜੰਡਪੁਰੀ)-ਇਥੇ ਸੁੱਖ ਇਨਕਲੇਵ ਵਿਖੇ ਇਕ ਪ੍ਰਵਾਸੀ ਦੇ 7 ਸਾਲਾ ਲੜਕੇ ਦੇ ਉਸਾਰੀ ਅਧੀਨ ਮਕਾਨ 'ਚ ਪਾਣੀ ਲਈ ਬਣੀ ਹੌਦੀ 'ਚ ਡੁੱਬਣ ਕਰਕੇ ਮੌਤ ਹੋ ਗਈ | ਮਿ੍ਤਕ ਦੀ ਪਛਾਣ ਬਿੱਟੂ ਵਜੋਂ ਹੋਈ ਹੈ, ਜੋ ਕਿ ਪਿੰਡ ਰਡਿਆਲਾ ਦੇ ਪ੍ਰਾਇਮਰੀ ਸਕੂਲ ਦਾ ਵਿਦਿਆਰਥੀ ਸੀ | ਥਾਣੇ ਵਿਖੇ ਬੱਚੇ ਦੇ ਪਿਤਾ ਸ਼ਸ਼ੀਕਾਂਤ ਚੌਰਸੀਆ ਨੇ ਦਿੱਤੇ ਬਿਆਨਾਂ 'ਚ ਦੱਸਿਆ ਕਿ ਉਹ ਖਰੜ 'ਚ ਕੋਠੀਆਂ ਬਣਾਉਣ ਵਾਲੇ ਠੇਕੇਦਾਰ ਵਜੋਂ ਕੰਮ ਕਰਦਾ ਹੈ ਅਤੇ ਸੁੱਖ ਇਨਕਲੇਵ 'ਚ ਕਿਰਾਏ ਦੇ ਮਕਾਨ 'ਚ ਆਪਣੇ ਪਰਿਵਾਰ ਸਮੇਤ ਰਹਿੰਦਾ ਹੈ | ਉਸ ਨੇ ਦੱਸਿਆ ਕਿ ਦੁਪਹਿਰ ਸਮੇਂ ਅਕਸਰ ਬੱਚੇ ਸਕੂਲ ਤੋਂ ਆ ਕੇ ਖੇਡਣ ਲੱਗ ਜਾਂਦੇ ਸਨ ਅਤੇ ਅੱਜ ਵੀ ਉਨ੍ਹਾਂ ਦਾ ਪੁੱਤਰ ਬਿੱਟੂ ਖੇਡਣ ਲਈ ਘਰੋਂ ਗਿਆ ਸੀ | ਕਾਫ਼ੀ ਸਮੇਂ ਤੱਕ ਜਦੋਂ ਉਸ ਦੀ ਪਤਨੀ ਨੂੰ ਬਿੱਟੂ ਦਿਖਾਈ ਨਾ ਦਿੱਤਾ ਤਾਂ ਉਹ ਆਪਣੇ ਵੱਡੇ ਲੜਕੇ ਸਮੇਤ ਉਸ ਨੂੰ ਲੱਭਣ ਲੱਗ ਪਈ | ਇਸੇ ਦੌਰਾਨ ਉਨ੍ਹਾਂ ਨੇ ਆਪਣੇ ਮਕਾਨ ਤੋਂ ਥੋੜ੍ਹਾ ਅੱਗੇ ਬਣ ਰਹੀ ਜਦੋਂ ਇਕ ਕੋਠੀ 'ਚ ਜਾ ਕੇ ਬੱਚੇ ਦੀ ਭਾਲ ਸ਼ੁਰੂ ਕੀਤੀ ਤਾਂ ਉਹ ਪਾਣੀ ਹੌਦੀ 'ਚ ਡੁੱਬਿਆ ਹੋਇਆ ਮਿਲਿਆ | ਇਸ ਤੋਂ ਬਾਅਦ ਉਸ ਨੂੰ ਤੁਰੰਤ ਸਿਵਲ ਹਸਪਤਾਲ ਵਿਖੇ ਲੈ ਗਏ, ਜਿਥੇ ਡਾਕਟਰਾਂ ਨੇ ਉਸ ਨੂੰ ਮਿ੍ਤਕ ਐਲਾਨ ਦਿੱਤਾ |