ਚੰਡੀਗੜ੍ਹ, 14 ਮਈ (ਸੁਖਵਿੰਦਰ ਸਿੰਘ ਸ਼ਾਨ)-ਗਰਮ ਰੁੱਤ ਦੌਰਾਨ ਪੰਜਾਬ ਵਿਚ ਮੌਸਮ ਕੁੱਝ ਦਿਨ ਨਰਮ ਰਹਿਣ ਤੋਂ ਬਾਅਦ ਹੁਣ ਸਖ਼ਤ ਗਰਮੀ ਪੈਣ ਅਤੇ ਲੂ (ਗਰਮ ਹਵਾ) ਚੱਲਣ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ | ਅੱਜ ਸੂਬੇ ਵਿਚ ਵੱਖ-ਵੱਖ ਥਾਂਵਾਂ 'ਤੇ ਬੱਦਲਵਾਈ ਰਹਿਣ ਅਤੇ ਹਲਕਾ ਮੀਂਹ ਪੈਣ ਦੇ ਬਾਵਜੂਦ ਦਿਨ ਦਾ ਤਾਪਮਾਨ 42 ਡਿਗਰੀ ਤੋਂ ਪਾਰ ਪਹੁੰਚ ਗਿਆ ਹੈ | ਮੌਸਮ ਵਿਭਾਗ ਕੇਂਦਰ ਚੰਡੀਗੜ੍ਹ ਤੋਂ ਮਿਲੀ ਜਾਣਕਾਰੀ ਅਨੁਸਾਰ 16 ਮਈ ਤੋਂ ਪੰਜਾਬ ਵਿਚ ਗਰਮੀ ਵਧੇਗੀ ਅਤੇ ਗਰਮ ਹਵਾਵਾਂ (ਲੂ) ਚੱਲਣਗੀਆਂ | ਜਿਸ ਕਾਰਨ ਦਿਨ ਤੇ ਰਾਤ ਦੇ ਤਾਪਮਾਨ ਵਿਚ ਵਾਧਾ ਹੋਵੇਗਾ ਤੇ ਲੋਕਾਂ ਨੂੰ ਗਰਮੀ ਦਾ ਪ੍ਰਚੰਡ ਪ੍ਰਭਾਵ ਝੱਲਣਾ ਪਵੇਗਾ | ਲੂ ਚੱਲਣ ਦਾ ਪ੍ਰਭਾਵ ਜ਼ਿਆਦਾਤਰ ਸਿਖ਼ਰ ਦੁਪਹਿਰ ਵੇਲੇ ਰਹੇਗਾ | ਇਸ ਲਈ ਦੁਪਹਿਰ ਵੇਲੇ ਸਫ਼ਰ ਕਰਨ ਤੋਂ ਗੁਰੇਜ ਕਰਨ, ਪਾਣੀ ਤੇ ਲੱਸੀ ਦੀ ਜ਼ਿਆਦਾ ਵਰਤੋਂ ਕਰਨ ਅਤੇ ਦੋ ਪਹੀਆ ਵਾਹਨਾਂ 'ਤੇ ਮੂੰਹ ਸਿਰ ਢੱਕ ਕੇ ਚੱਲਣ ਦੀ ਸਲਾਹ ਦਿੱਤੀ ਗਈ ਹੈ |
