ਜਦੋਂ ਨਕਸਲੀ ਹਿੰਸਾ ਸਿਖ਼ਰ ’ਤੇ ਸੀ ਤਾਂ ਸੰਵਿਧਾਨ ਦਿਖਾਉਣ ਵਾਲਿਆਂ ਦੇ ਹੱਥ ਕੰਬ ਰਹੇ ਸਨ-ਮੋਦੀ

ਨਵੀਂ ਦਿੱਲੀ, 22 ਜੂਨ (ਏਜੰਸੀ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸੋਮਵਾਰ ਨੂੰ ਦੇਸ਼ ’ਚ ਦਹਾਕਿਆਂ ਤੋਂ ਜਾਰੀ ਮਾਓਵਾਦੀ ਹਿੰਸਾ ਲਈ ਕਾਂਗਰਸ ‘ਤੇ ਤਿੱਖਾ ਹਮਲਾ ਕੀਤਾ ਅਤੇ ਕਿਹਾ ਕਿ ਜੋ ਲੋਕ ਹੁਣ ਸੰਵਿਧਾਨ ਦਿਖਾ ਰਹੇ ਹਨ, ਉਨ੍ਹਾਂ ਦੇ ਹੱਥ ਉਦੋਂ ਕੰਬ ਰਹੇ ਸਨ । ਇਥੇ ਗਣਤੰਤਰ ਸੰਮੇਲਨ 2026 ਨੂੰ ਸੰਬੋਧਨ ਕਰਦੇ ਹੋਏ ਮੋਦੀ ਨੇ ਇਹ ਵੀ ਕਿਹਾ ਕਿ ਭਾਰਤ ਨਾ ਸਿਰਫ਼ ਇਕ ਤੇਜ਼ੀ ਨਾਲ ਵਧ ਰਹੀ ਅਰਥਵਿਵਸਥਾ ਹੈ, ਸਗੋਂ ਇਕ ਭਰੋਸੇਯੋਗ ਅਤੇ ਭਰੋਸੇਮੰਦ ਵਿਸ਼ਵ ਸ਼ਕਤੀ ਵੀ ਹੈ ਅਤੇ ਦੇਸ਼ ਅਗਲੇ 1,000 ਸਾਲਾਂ ਦਾ ਭਵਿੱਖ ਲਿਖ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੀਆਂ ਕਾਂਗਰਸ ਸਰਕਾਰਾਂ ਨੇ ਨਕਸਲ ਪ੍ਰਭਾਵਿਤ ਖੇਤਰਾਂ ਨੂੰ ਪਛੜੇ ਖੇਤਰ ਕਰਾਰ ਦਿੱਤਾ ਸੀ ਪਰ ਐਨ.ਡੀ.ਏ. ਸਰਕਾਰ ਨੇ ਉਨ੍ਹਾਂ ਖੇਤਰਾਂ ਨੂੰ ਬਦਲਣ ਦੀ ਚੁਣੌਤੀ ਸਵੀਕਾਰ ਕੀਤੀ, ਉੱਥੋਂ ਦੇ ਲੋਕਾਂ ਨੂੰ ਨਿਰਾਸ਼ਾ ਤੋਂ ਬਾਹਰ ਨਿਕਲਣ ’ਚ ਮਦਦ ਕੀਤੀ ਅਤੇ ਤਰੱਕੀ ਲਈ ਉਨ੍ਹਾਂ ਦੀਆਂ ਉਮੀਦਾਂ ਜਗਾਈਆਂ। ਇਸ ਨਵੀਂ ਸੋਚ ਨੂੰ ਦਰਸਾਉਂਦੇ ਹੋਏ ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਨੇ ਉਨ੍ਹਾਂ ਖੇਤਰਾਂ ਦਾ ਨਾਂਅ ਬਦਲ ਕੇ ਖਾਹਿਸ਼ੀ ਜ਼ਿਲ੍ਹਿਆਂ ਅਤੇ ਬਲਾਕ ਕਰ ਦਿੱਤਾ ਅਤੇ ਅੱਜ, ਇਹ ਖਾਹਿਸ਼ੀ ਜ਼ਿਲ੍ਹੇ ਅਤੇ ਬਲਾਕ ਉਨ੍ਹਾਂ ਖੇਤਰਾਂ ਦੇ ਵਿਕਾਸ ਨੂੰ ਅੱਗੇ ਵਧਾ ਰਹੇ ਹਨ।ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਖੇਤਰਾਂ ’ਚ ਆਬਾਦੀ ਦਾ ਇਕ ਮਹੱਤਵਪੂਰਨ ਹਿੱਸਾ ਗਰੀਬੀ ’ਚ ਰਹਿੰਦਾ ਸੀ ਪਰ ਪਿਛਲੇ ਕੁਝ ਸਾਲਾਂ ’ਚ, 25 ਕਰੋੜ ਲੋਕਾਂ ਨੇ ਗਰੀਬੀ ’ਤੇ ਕਾਬੂ ਪਾਇਆ ਹੈ, ਇਸ ਪ੍ਰਾਪਤੀ ’ਚ ਖਾਹਿਸ਼ੀ ਜ਼ਿਲ੍ਹੇ ਮਹੱਤਵਪੂਰਨ ਭੂਮਿਕਾ ਨਿਭਾਅ ਰਹੇ ਹਨ ਤੇ ਉਹ ਖੇਤਰ ਜੋ ਕਦੇ ਨਕਸਲਵਾਦ ਤੋਂ ਪ੍ਰਭਾਵਿਤ ਸਨ, ਹੁਣ ਉਥੇ ਵਿਕਾਸ ਦੀਆਂ ਨਵੀਆਂ ਕਿਰਨਾਂ ਦਿਖਾਈ ਦੇ ਰਹੀਆਂ ਹਨ।ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ 21ਵੀਂ ਸਦੀ ’ਚ ਵੀ, ਅੱਤਵਾਦੀਆਂ ਨੇ ਕਬਾਇਲੀ ਖੇਤਰਾਂ ’ਚ ਕਿਸੇ ਵੀ ਸਹੂਲਤ ਨੂੰ ਸਥਾਪਿਤ ਹੋਣ ਤੋਂ ਰੋਕਿਆ ਸੀ। ਉਨ੍ਹਾਂ ਕਿਹਾ ਕਿ 2004 ਅਤੇ 2014 ਵਿਚਕਾਰ, ਮਾਓਵਾਦੀ ਅੱਤਵਾਦ ਕਾਰਨ 17,000 ਤੋਂ ਵੱਧ ਹਿੰਸਕ ਘਟਨਾਵਾਂ ਵਾਪਰੀਆਂ ਅਤੇ ਲਗਭਗ 7,000 ਜਾਨਾਂ ਗਈਆਂ। 2014 ਤੋਂ ਬਾਅਦ, ਅਸੀਂ ਸਥਿਤੀ ਨੂੰ ਬਦਲਣ ਲਈ ਰਾਸ਼ਟਰ ਪਹਿਲਾਂ ਦੇ ਸੰਕਲਪ ਨਾਲ ਅੱਗੇ ਵਧੇ। ਅੱਜ, ਦੇਸ਼ ’ਚ ਮਾਓਵਾਦੀ ਅੱਤਵਾਦ ਆਪਣੇ ਆਖਰੀ ਸਾਹਾਂ ਦੀ ਗਿਣਤੀ ਕਰ ਰਿਹਾ ਹੈ। ਇਹ ਇਸ ਲਈ ਸੰਭਵ ਹੋਇਆ ਕਿਉਂਕਿ ਇਸ ਲਈ ਪੂਰੇ ਸਮਰਪਣ ਦੀ ਲੋੜ ਸੀ।