ਸੰਗਰੂਰ, 27 ਜੂਨ (ਅਮਨਦੀਪ ਸਿੰਘ ਬਿੱਟਾ) – ਸੰਗਰੂਰ ਦੀ ਕਿਲ੍ਹਾ ਮਾਰਕਿਟ ਐਸੋਸੀਏਸ਼ਨ ਦੇ ਪ੍ਰਧਾਨ ਪਵਨ ਕੁਮਾਰ ਗਰਗ (ਸਤਿਨਾਮ ਪ੍ਰੀਟਿੰਗ ਪ੍ਰੈਸ) ਨੇ ਮਾਰਕਿਟ ਵਿੱਚ ਸਫਾਈ ਨਾ ਹੋਣ ਕਾਰਨ ਅਤੇ ਥਾਂ-ਥਾਂ ਲੱਗ ਰਹੇ ਗੰਦਗੀ ਦੇ ਢੇਰਾਂ ਉੱਤੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਕਹਿਣ ਨੂੰ ਇਹ ਮਾਰਕਿਟ ਸੰਗਰੂਰ ਸ਼ਹਿਰ ਦੀ ਵਿਕਸਤ ਮਾਰਕਿਟਾਂ ਵਿੱਚ ਸ਼ੁਮਾਰ ਹੈ ਪਰ ਅੱਜ ਜੋ ਹਾਲਾਤ ਇਸ ਮਾਰਕਿਟ ਦੇ ਬਣੇ ਹੋਏ ਹਨ ਉਹ ਪ੍ਰਸ਼ਾਸਨ ਅਤੇ ਨਗਰ ਕੌਂਸਲ ਦੇ ਅਧਿਕਾਰੀਆਂ ਦੀ ਅਣਗਹਿਲੀ ਦਾ ਪ੍ਰਤੱਖ ਨਮੂਨਾ ਹੈ । ਉਨ੍ਹਾਂ ਕਿਹਾ ਕਿ ਸਵੱਛ ਭਾਰਤ ਦੀਆਂ ਟੀਮਾਂ ਖਾਨਾਪੂਰਤੀ ਵਜੋਂ ਮਾਰਕੀਟ ’ਚ ਗੇੜਾ ਮਾਰਦਿਆਂ ਹਨ ਪਰ ਕਿੰਨੇ ਕਿੰਨੇ ਦਿਨ ਮਾਰਕੀਟ ’ਚ ਸਫਾਈ ਸੇਵਕ ਨਾ ਹੋਣ ਕਾਰਨ ਲੋਕ ਅਤਿ ਦੀ ਪ੍ਰੇਸ਼ਾਨੀ ’ਚੋਂ ਲੰਘ ਰਹੇ ਹਨ। ਸਫਾਈ ਸੇਵਕ ਨਾ ਆਉਣ ਕਾਰਨ ਮਾਰਕੀਟ ਵਿੱਚ ਥਾਂ-ਥਾਂ ਕੂੜੇ ਦੇ ਢੇਰ ਅਕਸਰ ਲੱਗ ਜਾਂਦੇ ਹਨ ਅਤੇ ਇਨ੍ਹਾਂ ਗੰਦਗੀ ਦੇ ਢੇਰਾਂ ਵਿੱਚ ਉੱਠਦੀ ਦੁਰਗੰਧ ਕਾਰਨ ਇੱਥੋਂ ਲੰਘਣਾ ਵੀ ਦੁਸਵਾਰ ਬਣਿਆ ਹੋਇਆ ਹੈ। ਮਾਰਕੀਟ ਐਸੋਸੀਏਸ਼ਨ ਨਿੱਜੀ ਤੌਰ ਉੱਤੇ ਸਫਾਈ ਸੇਵਕ ਆਪਣੇ ਖਰਚੇ ਉੱਪਰ ਰੱਖਣੀ ਚਾਹੁੰਦੀ ਹੈ ਤਾਂ ਵੀ ਉਨ੍ਹਾਂ ਨੂੰ ਨਗਰ ਕੌਂਸਲ ਅਧਿਕਾਰੀ ਇਸ ਦੀ ਇਜਾਜਤ ਨਹੀਂ ਦਿੰਦੇ ਅਤੇ ਜਬਰੀ ਰੋਕ ਦਿੰਦੇ ਹਨ । ਪਵਨ ਕੁਮਾਰ ਗਰਗ ਨੇ ਮੰਗ ਕੀਤੀ ਕਿ ਮਾਰਕੀਟ ਵਿੱਚ ਸਥਾਈ ਪੱਧਰ ’ਤੇ ਸਫਾਈ ਸੇਵਕ ਤਾਇਨਾਤ ਕੀਤਾ ਜਾਵੇ ।
