ਖੰਨਾ, 25 ਜੂਨ (ਹਰਜਿੰਦਰ ਸਿੰਘ ਲਾਲ)-ਲੁਧਿਆਣਾ-ਅੰਮ੍ਰਿਤਸਰ ਰਾਸ਼ਟਰੀ ਰਾਜਮਾਰਗ ’ਤੇ ਖੰਨਾ ਦੇ ਪ੍ਰਿਸਟੀਨ ਮਾਲ ਦੇ ਸਾਹਮਣੇ ਸਥਿਤ ਹਾਈ-ਟੈਕ ਪੁਲਿਸ ਚੌਕੀ ’ਤੇ ਅੱਜ ਇੱਕ ਵੱਡਾ ਹਾਦਸਾ ਹੋਣ ਤੋਂ ਟਲ ਗਿਆ। ਇੱਕ ਤੇਜ਼ ਰਫ਼ਤਾਰ ਡਾਕ ਪਾਰਸਲ ਟਰੱਕ ਪੁਲਿਸ ਬੈਰੀਕੇਡਾਂ ਨੂੰ ਤੋੜ ਕੇ ਉਨ੍ਹਾਂ ਨੂੰ ਕਾਫ਼ੀ ਦੂਰੀ ਤੱਕ ਘਸੀਟਦਾ ਲੈ ਗਿਆ। ਚੌਕੀ ’ਤੇ ਤਾਇਨਾਤ ਚਾਰ ਤੋਂ ਪੰਜ ਪੁਲਿਸ ਅਧਿਕਾਰੀ ਵਾਲ-ਵਾਲ ਬਚ ਗਏ।ਮੁੱਢਲੀ ਜਾਣਕਾਰੀ ਅਨੁਸਾਰ, ਡਾਕ ਪਾਰਸਲਾਂ ਨਾਲ ਭਰਿਆ ਕੈਂਟਰ ਸ਼ੰਭੂ ਤੋਂ ਲੁਧਿਆਣਾ ਜਾ ਰਿਹਾ ਸੀ। ਖੰਨਾ ਹਾਈ-ਟੈਕ ਚੌਕੀ ਦੇ ਨੇੜੇ ਪਹੁੰਚਣ ’ਤੇ, ਡਰਾਈਵਰ ਨੂੰ ਅੱਗੇ ਵਾਲੀ ਚੌਕੀ ਦਾ ਧਿਆਨ ਨਾ ਗਿਆ ਅਤੇ ਕੈਂਟਰ ਸਿੱਧਾ ਬੈਰੀਕੇਡਾਂ ਨਾਲ ਟਕਰਾ ਗਿਆ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਕੈਂਟਰ ਬੈਰੀਕੇਡਾਂ ਨੂੰ ਤੋੜ ਕੇ ਕਈ ਸੌ ਮੀਟਰ ਤੱਕ ਘਸੀਟਿਆ ਗਿਆ। ਪਰ ਚੰਗੀ ਗੱਲ ਇਹ ਰਹੀ ਕਿ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।
