ਖੰਨਾ, 5 ਜੁਲਾਈ (ਲਾਲ)-ਬੀਤੇ ਦਿਨ ਕੁੱਝ ਘੰਟਿਆਂ ਦੀ ਬਾਰਿਸ਼ ਨੇ ਬੂਥਗੜ੍ਹ ਪਿੰਡ ਵਿਚੋਂ ਲੰਘਦੇ ਪੱਕੇ ਰਜਵਾਹੇ (ਸੂਆ) ਦੀ ਹਾਲਤ ਚਿੰਤਾਜਨਕ ਕਰ ਦਿੱਤੀ। ਕਿਉਂਕਿ ਰਜਵਾਹਾ ਪੂਰੀ ਤਰ੍ਹਾਂ ਭਰ ਗਿਆ ਅਤੇ ਓਵਰਫਲੋਅ ਹੋ ਗਿਆ। ਰਜਵਾਹੇ ਵਿਚੋਂ ਪਾਣੀ ਲਗਾਤਾਰ ਕਿਨਾਰਿਆਂ ਦੇ ਉੱਪਰ ਦੀ ਵਗ ਰਿਹਾ ਹੈ, ਜਿਸ ਨਾਲ ਰਜਵਾਹੇ ਦੇ ਕਿਨਾਰੇ ਪਾਣੀ ਦਾ ਤੇਜ਼ ਵਹਾਅ ਲਗਾਤਾਰ ਮਿੱਟੀ ਨੂੰ ਖੋਰਾ ਲਗਾ ਰਿਹਾ ਹੈ, ਜਿਸ ਨਾਲ ਨੇੜਲੇ ਖੇਤਾਂ, ਘਰਾਂ ਅਤੇ ਲੋਕਾਂ ਨੂੰ ਵੱਡਾ ਨੁਕਸਾਨ ਹੋਣ ਦਾ ਖ਼ਤਰਾ ਹੈ। ਜੇਕਰ ਇਸ ਇਸ ਦਾ ਤੁਰੰਤ ਹੱਲ ਨਾ ਕੀਤਾ ਗਿਆ, ਤਾਂ ਇਹ ਖੇਤਰ ਲਈ ਇੱਕ ਵੱਡੀ ਆਫ਼ਤ ਬਣ ਸਕਦਾ ਹੈ। ਵਰਨਣਯੋਗ ਹੈ ਕਿ ਇੱਥੋਂ ਨਜ਼ਦੀਕ ਹੀ ਨਸਰਾਲੀ ਪਿੰਡ ਨੇੜੇ ਇਕ ਨਹਿਰ ਦੇ ਪਾੜ ਕਾਰਨ ਕਿਸਾਨਾਂ ਦੀ 70 ਏਕੜ ਤੋਂ ਵੱਧ ਝੋਨੇ ਦੀ ਫਸਲ ਬਰਬਾਦ ਹੋ ਗਈ ਹੈ।
