ਉੱਠ ਪੁੱਤ, ਉੱਠ ਪੁੱਤ ਮੰਮੀ ਵਾਜਾਂ ਮਾਰਦੀ

ਉੱਠ ਪੁੱਤ, ਉੱਠ ਪੁੱਤ ਮੰਮੀ ਵਾਜਾਂ ਮਾਰਦੀ
ਬੈਠ ਕੇ ਸਰਾਣੇ ਵੱਲ ਚਾਹ ਰਹੇ ਠਾਰਦੀ
ਪਰ ਯਾਰਾਂ ਦੇ ਤਾਂ ਵਾਰੇ ਹੀ ਨਿਆਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

ਘੋੜੇ ਵੇਚ ਰਾਤੀਂ ਯਾਰ ਸੁੱਤੇ ਹੁੰਦੇ ਨੇ
ਨੀਕਰ ਬੁਨੈਣ ਕਿੱਥੇ ਜੁੱਤੇ ਹੁੰਦੇ ਨੇ
ਟੇਢੇ ਮੇਢੇ ਵਾਲ ਵੀ ਖਿਲਾਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

ਸੁਬ੍ਹਾ ਜਲਦੀ ਨਾ ਸਾਨੂੰ ਉਠਾਇਓ ਮੰਮੀ ਜੀ
ਸਾਡੀ ਨੀਂਦ ਵਿਚ ਖਲਲ ਨਾ ਪਾਇਓ ਮੰਮੀ ਜੀ
ਮਸਾਂ ਛੁੱਟੀ ਵਾਲੇ ਬਲਖ ਬੁਖਾਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

ਦਿਨੇ ਆਲੂ ਵਾਲੇ 
ਪਰੌਂਠੇ ਪਕਾਇਓ ਮੰਮੀ ਜੀ
ਸਾਨੂੰ ਮਖਣੀਂ ਤੇ 
ਦਹੀਂ ਨਾਲ ਖਿਲਾਇਓ ਮੰਮੀ ਜੀ
ਫ਼ੇਰ ਵੱਖਰੇ ਹੀ ਵੱਜਦੇ ਚਟਕਾਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

ਨ੍ਹਾਉਣ ਧੋਣ ਵੱਲ ਸਾਡਾ 
ਕੋਈ ਖ਼ਿਆਲ ਨ੍ਹੀਂ ਹੁੰਦਾ
ਸਾਡੇ ਉੱਤੇ ਕੋਈ ਕਿਸੇ ਦਾ ਸਵਾਲ ਨ੍ਹੀਂ ਹੁੰਦਾ
ਸਾਡੇ ਖੁਸ਼ੀਆਂ 'ਚ ਵੱਜਦੇ ਫੁਕਾਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

ਕਹਿੰਦਾ 'ਲੰਗੇਆਣਾ' ਸਾਨੂੰ ਬੜਾ ਹੁੰਦਾ ਚਾਅ ਮਿੱਤਰੋ
ਲਈਏ ਮਨ ਮਰਜ਼ੀਆਂ ਮਨਾਂ ਦੀਆਂ ਪੁਗਾਅ ਮਿੱਤਰੋ
ਬੱਚੇ ਮਾਪਿਆਂ ਦੀਆਂ ਅੱਖੀਆਂ ਦੇ ਤਾਰੇ ਹੁੰਦੇ ਨੇ
ਦਿਨ ਐਤਵਾਰ ਵੱਖਰੇ ਨਜ਼ਾਰੇ ਹੁੰਦੇ ਨੇ | 

-ਡਾ. ਸਾਧੂ ਰਾਮ ਲੰਗੇਆਣਾ
ਮੋਬਾਈਲ : 98781-17285