ਲੰਡਨ, 1 ਮਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਮੈਡਮ ਤੁਸਾਦ ਲੰਡਨ ਨੇ ਬਾਲੀਵੁੱਡ, ਕ੍ਰਿਕਟ ਸਿਤਾਰਿਆਂ ਨਾਲ 'ਆਈਕਨਜ਼ ਆਫ਼ ਇੰਡੀਆ' ਪ੍ਰਦਰਸ਼ਨੀ ਦਾ ਉਦਘਾਟਨ ਕੀਤਾ ਹੈ | 2 ਮਹੀਨਿਆਂ ਲਈ ਲਗਾਈ ਗਈ ਇਹ ਪ੍ਰਦਰਸ਼ਨੀ 'ਚ ਬਾਲੀਵੁੱਡ ਦੇ ਪ੍ਰਮੁੱਖ ਅਦਾਕਾਰਾਂ ਤੇ ਭਾਰਤੀ ਕ੍ਰਿਕਟ ਸਿਤਾਰਿਆਂ ਦੇ 13 ਮੋਮ ਦੇ ਪੁਤਲੇ ਸ਼ਾਮਿਲ ਕੀਤੇ ਗਏ ਹਨ | 1 ਮਈ ਤੋਂ 30 ਜੂਨ ਤੱਕ ਲੱਗਣ ਵਾਲੀ ਇਸ ਪ੍ਰਦਰਸ਼ਨੀ ਨੂੰ ਭਾਰਤੀ ਸੱਭਿਆਚਾਰ ਤੋਂ ਪ੍ਰੇਰਿਤ ਇਕ ਜਗ੍ਹਾ 'ਚ ਬਦਲ ਦਿੱਤਾ ਹੈ ਜੋ ਹਿੰਦੀ ਸਿਨੇਮਾ ਤੇ ਕ੍ਰਿਕਟ ਦੀ ਵਿਰਾਸਤ ਨੂੰ ਉਜਾਗਰ ਕਰੇਗਾ | ਇਸ ਦੌਰਾਨ ਸੈਲਾਨੀ ਭਾਰਤੀ ਮਨੋਰੰਜਨ ਦੇ ਵੱਡੇ ਨਾਵਾਂ ਨਾਲ ਤਸਵੀਰਾਂ ਲੈ ਸਕਣਗੇ, ਜਿਨ੍ਹਾਂ 'ਚ ਸ਼ਾਹਰੁਖ ਖਾਨ, ਦੀਪਿਕਾ ਪਾਦੂਕੋਣ, ਪਿ੍ਅੰਕਾ ਚੋਪੜਾ ਜੋਨਸ, ਅਮਿਤਾਭ ਬੱਚਨ ਤੇ ਰਿਤਿਕ ਰੋਸ਼ਨ ਸ਼ਾਮਲ ਹਨ | ਜਦਕਿ ਕੈਟਰੀਨਾ ਕੈਫ, ਮਾਧੁਰੀ ਦੀਕਸ਼ਿਤ ਅਤੇ ਰਣਵੀਰ ਸਿੰਘ ਵੀ ਕਤਾਰ ਵਿੱਚ ਸ਼ਾਮਲ ਹਨ | ਇਸ ਤੋਂ ਇਲਾਵਾ ਕ੍ਰਿਕਟ ਸਿਤਾਰੇ ਸਚਿਨ ਤੇਂਦੁਲਕਰ ਤੇ ਵਿਰਾਟ ਕੋਹਲੀ ਵੀ ਸ਼ਾਮਲ ਹੋਣਗੇ, ਕੋਹਲੀ ਦਾ ਚਿੱਤਰ ਬੈਂਕਾਕ ਤੋਂ ਲਿਆਂਦਾ ਗਿਆ ਹੈ | ਰਣਬੀਰ ਕਪੂਰ, ਐਸ਼ਵਰਿਆ ਰਾਏ ਬੱਚਨ ਤੇ ਕਾਜਲ ਅਗਰਵਾਲ ਦੇ ਚਿੱਤਰ ਵੀ ਪ੍ਰਦਰਸ਼ਿਤ ਕੀਤੇ ਜਾਣਗੇ, ਜੋ ਕਿ ਹੋਰ ਅੰਤਰਰਾਸ਼ਟਰੀ ਮੈਡਮ ਤੁਸਾਦ ਸਥਾਨਾਂ ਤੋਂ ਲਿਆਂਦੇ ਹਨ |
