ਗਲਾਸਗੋ,1 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ) - ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਪ੍ਰਸਿੱਧ ਗਲਾਸਗੋ ਮੇਲਾ 5 ਜੁਲਾਈ ਐਤਵਾਰ ਨੂੰ ਗਲਾਸਗੋ ਦੇ ਕੈਲਵਿਨਗਰੋਵ ਪਾਰਕ ਵਿੱਚ ਦੁਪਹਿਰ 12:00 ਵਜੇ ਤੋਂ ਰਾਤ 8:00 ਵਜੇ ਤੱਕ ਆਯੋਜਿਤ ਹੋਵੇਗਾ। ਇਹ ਸਕਾਟਲੈਂਡ ਦਾ ਸਭ ਤੋਂ ਵੱਡਾ ਦੱਖਣੀ ਏਸ਼ੀਆਈ ਸੱਭਿਆਚਾਰਕ ਮੇਲਾ ਹੈ ਅਤੇ ਇਸ ਵਿੱਚ ਦਾਖਲਾ ਮੁਫ਼ਤ ਹੈ। ਇਸ ਸਾਲ ਪਹੁੰਚ ਰਹੇ ਕਲਾਕਾਰਾਂ ਵਿੱਚ ਪੰਜਾਬੀ ਗਾਇਕੀ ਦੇ ਮਸ਼ਹੂਰ ਸਿਤਾਰੇ ਨਛੱਤਰ ਗਿੱਲ, ਮਸ਼ਹੂਰ ਬੈਂਡ ਆਪਣਾ ਸੰਗੀਤ ਦੇ ਕੇ.ਐੱਸ. ਭੰਵਰਾ ਅਤੇ ਸਰਦਾਰਾ ਗਿੱਲ, ਕਲਾਸੀਕਲ ਗਾਇਕ ਜੋੜੀ ਪੂਜਾ ਆਂਗਰਾ ਅਤੇ ਕਰਨ ਰਾਣਾ ਆਪਣੀ ਗਾਇਕੀ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਕਰਨਗੇ। ਇਸ ਤੋਂ ਇਲਾਵਾ ਦੋ ਸਟੇਜਾਂ ’ਤੇ ਭੰਗੜਾ, ਕਵਾਲੀ, ਲੋਕ ਸੰਗੀਤ, ਹਿਪ-ਹਾਪ, ਜੈਜ਼, ਸੂਫ਼ੀ, ਇਲੈਕਟ੍ਰਾਨਿਕ ਅਤੇ ਭਾਰਤੀ ਸ਼ਾਸਤਰੀ ਸੰਗੀਤ ਸਮੇਤ ਕਈ ਸਥਾਨਕ ਅਤੇ ਅੰਤਰਰਾਸ਼ਟਰੀ ਕਲਾਕਾਰ ਪ੍ਰਦਰਸ਼ਨ ਕਰਨਗੇ।
