ਲਾਨ ਬਾਲ ’ਚ ਨਯਨਮੋਨੀ ਤੇ ਡੈਕਾਥਲਾਨ ’ਚ ਤੇਜਸਵਿਨ ਸ਼ੰਕਰ ਛਾਏ

ਅ

ਅਜੀਤ ਡੈਸਕ 31-07-2026

ਗਲਾਸਗੋ, 30 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਲਾਨ ਬਾਲ ਮੁਕਾਬਲਿਆਂ ’ਚ ਭਾਰਤ ਦੀ ਨਯਨਮੋਨੀ ਸਾਈਕੀਆ ਨੇ ਮਹਿਲਾਵਾਂ ਦੇ ਸਿੰਗਲਜ਼ ਸੈਕਸ਼ਨਲ ਪਲੇ ਦੇ ਆਪਣੇ ਦੂਜੇ ਮੈਚ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਆਇਲ ਆਫ਼ ਮੈਨ ਦੀ ਕੈਰੋਲਾਈਨ ਵਾਈਟਹੈੱਡ ਨੂੰ 2-0 ਸੈੱਟਾਂ ਨਾਲ ਹਰਾਇਆ। ਸੈਕਸ਼ਨ ਸੀ ਦੇ ਰਾਊਂਡ-2 ’ਚ ਖੇਡੇ ਗਏ ਇਸ ਮੁਕਾਬਲੇ ’ਚ ਨਯਨਮੋਨੀ ਨੇ ਸ਼ੁਰੂ ਤੋਂ ਹੀ ਦਬਦਬਾ ਬਣਾਈ ਰੱਖਿਆ ਤੇ ਸਿੱਧੇ ਸੈੱਟਾਂ ’ਚ ਜਿੱਤ ਦਰਜ ਕਰਕੇ ਗਰੁੱਪ ਵਿੱਚ ਆਪਣੀ ਸਥਿਤੀ ਹੋਰ ਮਜ਼ਬੂਤ ਕਰ ਲਈ। ਇਸ ਜਿੱਤ ਨਾਲ ਭਾਰਤੀ ਖਿਡਾਰਨ ਦੇ ਨਾਕਆਊਟ ਪੜਾਅ ’ਚ ਪਹੁੰਚਣ ਦੀਆਂ ਸੰਭਾਵਨਾਵਾਂ ਹੋਰ ਵਧ ਗਈਆਂ ਹਨ।
ਤੇਜਸਵਿਨ ਸ਼ੰਕਰ ਨੇ ਡੈਕਾਥਲਾਨ ਦੀ ਲੰਬੀ ਛਾਲ ’ਚ ਕੀਤਾ ਸ਼ਾਨਦਾਰ ਪ੍ਰਦਰਸ਼ਨ
ਪੁਰਸ਼ਾਂ ਦੇ ਡੈਕਾਥਲਾਨ ਮੁਕਾਬਲੇ ’ਚ ਭਾਰਤ ਦੇ ਤੇਜਸ਼ੰਕਰ ਨੇ ਲੰਬੀ ਛਾਲ ਈਵੈਂਟ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ 7.82 ਮੀਟਰ ਦੀ ਛਾਲ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ। ਇਸ ਪ੍ਰਦਰਸ਼ਨ ਲਈ ਉਨ੍ਹਾਂ ਨੂੰ 1015 ਅੰਕ ਮਿਲੇ ਅਤੇ ਉਨ੍ਹਾਂ ਨੇ ਆਪਣਾ ਨਿੱਜੀ ਸਰਵੋਤਮ ਸਕੋਰ ਵੀ ਬਣਾਇਆ।