ਨਵੀਂ ਦਿੱਲੀ, 5 ਫਰਵਰੀ (ਮਿਸਰਦੀਪ ਭਾਟੀਆ)-ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਨੇ ਸਿਵਲ ਸੇਵਾਵਾਂ ਪ੍ਰੀਖਿਆ (ਸੀ.ਐਸ.ਈ.) 2026 ਲਈ ਅਰਜ਼ੀ ਪ੍ਰਕਿਰਿਆ ਵਿਚ ਹੁਣ ਤੱਕ ਦੇ ਸਭ ਤੋਂ ਵੱਡੇ ਬਦਲਾਅ ਕੀਤੇ ਹਨ | ਯੂ.ਪੀ.ਐਸ.ਸੀ. ਸੀ.ਐਸ.ਈ. ਦੇ ਹਾਲ ਹੀ ਵਿਚ ਜਾਰੀ ਨੋਟੀਫਿਕੇਸ਼ਨ ਨੇ ਅਰਜ਼ੀ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਬਦਲ ਕੇ ਰੱਖ ਦਿੱਤਾ ਹੈ | ਅਕਸਰ ਅਜਿਹਾ ਆਮ ਦੇਖਿਆ ਜਾਂਦਾ ਸੀ ਕਿ ਜੋ ਉਮੀਦਵਾਰ ਆਈ.ਏ.ਐਸ., ਆਈ.ਪੀ.ਐਸ., ਆਈ.ਐਫ.ਐਸ. ਅਤੇ ਆਈ.ਆਰ.ਐਸ. ਵਰਗੇ ਗਰੁੱਪ-ਏ ਅਹੁਦਿਆਂ ਲਈ ਚੁਣੇ ਜਾਂਦੇ ਸਨ, ਉਹ ਵੀ ਆਪਣੀ ਮਨਚਾਹੀ ਸਰਵਿਸ ਦੇ ਲਈ ਇਹ ਪ੍ਰੀਖਿਆ ਦੁਬਾਰਾ ਦਿੰਦੇ ਸਨ | ਪਰ ਹੁਣ ਨਵੇਂ ਨਿਯਮ ਲਾਗੂ ਕਰ ਦਿੱਤੇ ਗਏ ਹਨ ਹੁਣ ਪਹਿਲਾਂ ਚੁਣੇ ਗਏ ਗਰੁੱਪ-ਏ ਅਧਿਕਾਰੀਆਂ ਲਈ ਦੁਬਾਰਾ ਇਸ ਪ੍ਰੀਖਿਆ ਵਿਚ ਸ਼ਾਮਿਲ ਹੋਣਾ ਸੰਭਵ ਨਹੀਂ ਹੋਵੇਗਾ | ਇਸ ਬਦਲਾਅ ਦੇ ਇਲਾਵਾ ਯੂ.ਪੀ.ਐਸ.ਸੀ. ਦਾ ਨਵਾਂ ਨੋਟੀਫਿਕੇਸ਼ਨ ਵਿਚ ਇਸ ਵਾਰ ਪ੍ਰਕਿਰਿਆ ਨੂੰ ਸਰਲ ਬਣਾਉਣ 'ਤੇ ਕੇਂਦਰਤ ਹੈ | ਇਸ ਤੋਂ ਇਲਾਵਾ ਪਛਾਣ ਤਸਦੀਕ ਨੂੰ ਤੇਜ਼ ਕਰਨ ਅਤੇ ਨਿਯਮਾਂ ਨੂੰ ਜ਼ਿਆਦਾ ਸਖ਼ਤ ਕਰਨ 'ਤੇ ਯੂ.ਪੀ.ਐਸ.ਸੀ. ਨੇ ਜ਼ਿਆਦਾ ਧਿਆਨ ਦਿੱਤਾ ਹੈ | ਯੂ.ਪੀ.ਐਸ.ਸੀ. ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਥੋੜ੍ਹੀ ਜਿਹੀ ਲਾਪ੍ਰਵਾਹੀ ਵੀ ਅਰਜ਼ੀ ਰੱਦ ਹੋਣ ਦਾ ਕਾਰਨ ਬਣ ਸਕਦੀ ਹੈ | ਯੂ.ਪੀ.ਐਸ.ਸੀ. ਨੇ ਹੁਣ ਆਪਣੇ ਆਨਲਾਈਨ ਪੋਰਟਲ ਨੂੰ ਚਾਰ ਭਾਗਾਂ ਵਿਚ ਵੰਡਿਆ ਹੈ | ਇਨ੍ਹਾਂ ਵਿਚੋਂ ਤਿੰਨ ਭਾਗ ਸਾਰੀਆਂ ਪ੍ਰੀਖਿਆਵਾਂ ਲਈ ਸਾਂਝੇ ਹੋਣਗੇ ਅਤੇ ਚੌਥਾ ਭਾਗ ਉਸ ਪ੍ਰੀਖਿਆ ਨਾਲ ਜੁੜਿਆ ਹੋਵੇਗਾ | ਜਿਸ ਲਈ ਉਮੀਦਵਾਰ ਅਰਜ਼ੀ ਦੇ ਰਹੇ ਹਨ | ਯੂ.ਪੀ.ਐਸ.ਸੀ. ਨੇ ਲਾਈਵ ਫੋਟੋ ਕੈਪਚਰ ਨੂੰ ਲਾਜ਼ਮੀ ਕਰ ਦਿੱਤਾ ਹੈ | ਹੁਣ ਉਮੀਦਵਾਰ ਨੂੰ ਚਿੱਟੇ ਕਾਗਜ਼ਾਂ 'ਤੇ ਕਾਲੇ ਪੈੱਨ ਨਾਲ ਤਿੰਨ ਵਾਰ ਦਸਤਖ਼ਤ ਕਰਨੇ ਹੋਣਗੇ ਅਤੇ ਉਸੇ ਸ਼ੀਟ ਨੂੰ ਸਕੈਨ ਕਰ ਕੇ ਨਿਰਧਾਰਤ ਫਾਰਮੈਟ ਵਿਚ ਅਪਲੋਡ ਕਰਨਾ ਹੋਵੇਗਾ | ਯੂ.ਪੀ.ਐਸ.ਸੀ. ਨੇ ਆਧਾਰ ਕਾਰਡ ਨੂੰ ਪਛਾਣ ਪੱਤਰ ਵਜੋਂ ਇਸਤੇਮਾਲ ਕਰਨ ਦੀ ਸਲਾਹ ਦਿੱਤੀ ਹੈ | ਇਸ ਵਾਰ ਇਹ ਸਭ ਤੋਂ ਸਖ਼ਤ ਨਿਯਮ ਹੈ ਕਿ ਇਕ ਵਾਰੀ ਅਰਜ਼ੀ ਜਮ੍ਹਾਂ ਕਰਵਾਉਣ ਤੋਂ ਬਾਅਦ ਕੋਈ ਬਦਲਾਅ ਨਹੀਂ ਕੀਤਾ ਜਾ ਸਕਦਾ ਅਤੇ ਨਾ ਹੀ ਅਰਜ਼ੀ ਵਾਪਸ ਲਈ ਜਾ ਸਕਦੀ ਹੈ | ਹੁਣ ਐਡਮਿਟ ਕਾਰਡ ਡਾਕ ਡਾਂ ਈ-ਮੇਲ ਰਾਹੀਂ ਨਹੀਂ ਭੇਜੇ ਜਾਣਗੇ | ਉਮੀਦਵਾਰਾਂ ਨੂੰ ਵੈੱਬਸਾਈਟ 'ਤੇ ਲਾਗਇਨ ਕਰ ਕੇ ਆਪਣਾ ਐਡਮਿਟ ਕਾਰਡ ਡਾਊਨਲੋਡ ਕਰਨਾ ਹੋਵੇਗਾ | ਯੂ.ਪੀ.ਐਸ.ਸੀ. ਨੇ ਨਕਲ ਅਤੇ ਧੋਖਾਧੜੀ ਨੂੰ ਰੋਕਣ ਲਈ ਪ੍ਰੀਖਿਆ ਕੇਂਦਰਾਂ 'ਤੇ ਚਿਹਰੇ ਦੀ ਪਛਾਣ ਲਾਜ਼ਮੀ ਕਰ ਦਿੱਤੀ ਹੈ |