ਨਵੀਂ ਦਿੱਲੀ, 2 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਪੁਲਿਸ ਨੂੰ ਇਕ ਵੱਡੀ ਸਫ਼ਲਤਾ ਮਿਲੀ ਹੈ ਅਤੇ ਉਸ ਨੇ ਇਕ ਅੰਤਰਰਾਸ਼ਟਰੀ ਕਾਰਾਂ ਚੋਰੀ ਕਰਨ ਵਾਲੇ ਗਰੋਹ ਦਾ ਪਰਦਾਫਾਸ਼ ਕੀਤਾ ਹੈ | ਇਸ ਮਾਮਲੇ ਵਿਚ ਅਪਰਾਧ ਸ਼ਾਖਾ ਨੇ ਗਰੋਹ ਦੇ 10 ਮੈਂਬਰਾਂ ਨੂੰ ਕਾਬੂ ਕੀਤਾ ਹੈ, ਜਿਨ੍ਹਾਂ ਕੋਲੋਂ 31 ਮਹਿੰਗੀਆਂ ਲਗਜ਼ਰੀ ਗੱਡੀਆਂ ਬਰਾਮਦ ਕੀਤੀਆਂ ਹਨ | ਇਹ ਲੋਕ ਗੱਡੀਆਂ ਦੀਆਂ ਚੈਸੀਆਂ ਦੇ ਨੰਬਰ ਨਾਲ ਛੇੜਛਾੜ ਕਰਦੇ ਸਨ ਅਤੇ ਫਿਰ ਫਰਜ਼ੀ ਅਤੇ ਨਕਲੀ ਦਸਤਾਵੇਜ਼ਾਂ ਦੀ ਵਰਤੋਂ ਕਰਕੇ ਉਨ੍ਹਾਂ ਨੂੰ ਦੁਬਾਰਾ ਰਜਿਸਟਰ ਕਰਵਾਉਂਦੇ ਸਨ | ਉਸ ਤੋਂ ਬਾਅਦ ਇਨ੍ਹਾਂ ਗੱਡੀਆਂ ਨੂੰ ਦੇਸ਼ ਵਿਚ ਵੇਚ ਦਿੰਦੇ ਸਨ | ਇਸ ਆਪ੍ਰੇਸ਼ਨ ਵਿਚ ਇੰਟਰਸਟੇਟ ਸੈੱਲ ਦੀ ਟੀਮ, ਸਬ-ਇੰਸਪੈਕਟਰ ਰਾਜਿੰਦਰ ਢਾਕਾ, ਏ.ਐਸ.ਆਈ. ਪ੍ਰਵੀਨ ਅਤੇ ਸਿਪਾਹੀ ਮੋਹਿਤ ਨੇ ਬਹੁਤ ਕੰਮ ਕੀਤਾ | ਜਿਸ ਕਰਕੇ 31 ਮਹਿੰਗੀਆਂ ਲਗਜ਼ਰੀ ਗੱਡੀਆਂ ਦੀ ਬਰਾਮਦਗੀ ਹੋਈ ਹੈ | ਗੱਡੀਆਂ ਵਿਚ ਟੋਯੋਟਾ, ਫਾਰਚੂਨਰ, ਇਨੋਵਾ, ਮਹਿੰਦਰਾ ਥਾਰ, ਸਕਾਰਪੀਓ ਜਿਹੇ ਮਾਡਲਾਂ ਦੀਆਂ ਗੱਡੀਆਂ ਹਨ | ਇਸ ਮਾਮਲੇ ਵਿਚ ਲਾਈਸੈਂਸਿੰਗ ਅਥਾਰਟੀ ਦਾ ਇਕ ਕਰਮਚਾਰੀ ਵੀ ਸ਼ਾਮਿਲ ਹੈ | ਇਹ ਗਰੋਹ ਹੁਣ ਤੱਕ ਇਕ ਹਜ਼ਾਰ ਤੋਂ ਵੱਧ ਗੱਡੀਆਂ ਵੇਚ ਚੁੱਕਾ ਹੈ |
