ਨਵੀਂ ਦਿੱਲੀ, 15 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਦੇ ਯਮੁਨਾ ਪੁਲ ਤੋਂ ਕੜਕੜ੍ਹੀ ਡੂੰਮਾ ਮਾਸਟਰ ਪਲਾਨ ਰੋਡ ਦੇ ਹੇਠਾਂ ਗੰਦੇ ਨਾਲੇ ਦੀ ਸਫ਼ਾਈ ਕਰਦੇ ਸਮੇਂ ਉਸ ਵਿਚੋਂ ਬਹੁਤ ਜ਼ਿਆਦਾ ਮਾਤਰਾ ਵਿਚ ਗਾਰ ਕੱਢੀ ਗਈ ਸੀ ਪਰੰਤੂ ਇਹ ਗਾਰ ਹੁਣ ਤੱਕ ਹਟਾਈ ਨਹੀਂ ਗਈ | ਗਾਰ ਪਈ ਹੋਣ ਦੇ ਕਾਰਨ ਇਸ ਰਸਤੇ 'ਤੇ ਆਵਾਜਾਈ ਪ੍ਰਭਾਵਿਤ ਹੋ ਰਹੀ ਹੈ | ਲੋਕਾਂ ਨੂੰ ਲੰਘਣ ਲਈ ਰਸਤਾ ਨਹੀਂ ਮਿਲ ਰਿਹਾ ਜਿਸ ਕਰਕੇ ਲੋਕਾਂ ਨੂੰ ਪ੍ਰੇਸ਼ਾਨੀ ਵੀ ਹੋ ਰਹੀ ਹੈ | ਸੜਕ 'ਤੇ ਪਈ ਗਾਰ ਦੇ ਕਾਰਨ ਬਦਬੂ ਫੈਲਣ ਕਾਰਨ ਲੋਕ ਬਹੁਤ ਦੁਖੀ ਹੋ ਰਹੇ ਹਨ | ਲੋਕਾਂ ਨੇ ਇਸ ਗਾਰ ਪ੍ਰਤੀ ਸ਼ਿਕਾਇਤ ਵੀ ਕੀਤੀ ਪਰੰਤੂ ਕੋਈ ਸੁਣਵਾਈ ਨਹੀਂ ਹੋ ਰਹੀ | ਇਥੋਂ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਇਸ ਦੇ ਨਾਲ ਬਿਮਾਰੀਆਂ ਫੈਲਣ ਦਾ ਡਰ ਬਣਿਆ ਹੋਇਆ ਹੈ | ਦੂਸਰਾ ਇਹ ਕਿ ਬਾਰਿਸ਼ ਦਾ ਮੌਸਮ ਵੀ ਸਿਰ 'ਤੇ ਹੈ, ਜਿਸ ਕਾਰਨ ਹੋਰ ਵੀ ਦਿੱਕਤ ਪੇਸ਼ ਆ ਸਕਦੀ ਹੈ | ਲੋਕਾਂ ਦੀ ਮੰਗ ਹੈ ਕਿ ਇਸ ਗਾਰ ਨੂੰ ਜਲਦੀ ਤੋਂ ਜਲਦੀ ਹਟਾਇਆ ਜਾਵੇ |
