ਆਕੜ

ਉਹ ਹਰ ਕਿਸੇ ਨਾਲ ਹਰ ਗੱਲ 'ਤੇ ਆਕੜਦਾ ਰਹਿੰਦਾ ਹੈ, ਮੈਂ ਉਸ ਨੂੰ ਬਹੁਤ ਵਾਰ ਸਮਝਾਇਆ, ਇਸ ਤਰ੍ਹਾਂ ਹਰ ਕਿਸੇ ਨਾਲ ਆਕੜੀ ਦਾ ਨੀਂ। ਇਹ ਆਕੜ ਛੱਡ ਤੇ ਆਪਣੇ-ਆਪ ਨੂੰ ਬਦਲ। ਉਹ ਕਹਿੰਦਾ, 'ਹੁਣ ਨੀਂ ਸੁਭਾਅ ਬਦਲਦਾ। ਇਹ ਆਕੜ ਤਾਂ ਹੁਣ ਨਾਲ ਈ ਜਾਊ।'
ਪਤੰਦਰ ਨੇ ਜੋ ਕਿਹਾ ਉਹੀ ਕਰ ਦਿਖਾਇਆ। ਮਰਨ ਉਪਰੰਤ ਉਹ ਅੱਜ ਸੱਚਮੁੱਚ ਆਕੜਿਆ ਪਿਆ ਸੀ।
ਆਪਾਂ ਕੀ ਲੈਣਾ
ਉਸ ਦੀਆਂ ਲਿਖਤਾਂ ਜ਼ੁਲਮ ਨਾ ਸਹਿਣ ਕਰਨ ਦੀ ਬਜਾਏ ਉਸ ਵਿਰੁੱਧ ਆਵਾਜ਼ ਬੁਲੰਦ ਕਰਨ ਦਾ ਸੁਨੇਹਾ ਦਿੰਦਿਆਂ ਜੋਸ਼ ਭਰ ਦਿੰਦੀਆਂ। ਇਨਕਲਾਬੀ ਵਿਚਾਰਧਾਰਾ ਦੀਆਂ ਕਵਿਤਾਵਾਂ ਪੜ੍ਹ ਕੇ ਲਗਦਾ, ਇਨਕਲਾਬ ਆਇਆ ਲੈ। ਪਰ ਖੁਦ ਉਹ ਸੱਚ ਦਾ ਸਾਥ ਦੇਣ ਤੋਂ ਹਮੇਸ਼ਾ ਇਹ ਕਹਿ ਕੇ ਕੰਨ੍ਹੀ ਕਤਰਾਉਂਦਾ ਰਿਹਾ, 'ਆਪਾਂ ਕੀ ਲੈਣਾ।'
ਚੰਡੀ
ਉਹ ਆਪਣੀ ਗਊ ਵਰਗੀ ਪਤਨੀ ਨੂੰ ਅਕਸਰ ਟੋਕਦਾ, ਕੋਸਦਾ, ਕੁੱਟਦਾ-ਮਾਰਦਾ ਤੇ ਆਖਦਾ, 'ਇਕ ਦਿਨ ਅਜਿਹਾ ਚੰਡੂੰ ਕਿ ਜ਼ਿੰਦਗੀ ਭਰ ਯਾਦ ਰੱਖੇਂਗੀ।' ਉਸ ਦੇ ਜੁਲਮ ਦੀ ਸਤਾਈ ਉਹ ਇਕ ਦਿਨ ਚੰਡੀ ਦਾ ਰੂਪ ਧਾਰ ਗਈ।

-ਮੋਬਾ.: 98721-93320