ਮੁਸਲਮਾਨ ਭਾਈਚਾਰੇ ਦੇ ਸ਼ਸਤਰੀਕਰਨ ਲਈ ਸਰਕਾਰ ਉਸਾਰੂ ਰੁਖ਼ ਅਪਣਾਵੇ - ਸ਼ਾਹੀ ਇਮਾਮ

ਭੀਖੀ, 27 ਜੁਲਾਈ (ਬਲਕਾਰ ਸਿੰਘ ਸਹੋਤਾ)- ਮਜਲਿਸ ਅਹਿਰਾਰ ਇਸਲਾਮ ਹਿੰਦ ਦੇ ਜ਼ਿਲ੍ਹਾ ਪ੍ਰਧਾਨ ਡਾ. ਸੁਲਤਾਨ ਸ਼ਾਹ ਦੇ ਘਰ ਵਿਖੇ ਗ਼ੈਰਰਸਮੀ ਗੱਲਬਾਤ ਦੌਰਾਨ ਸ਼ਾਹੀ ਇਮਾਮ ਮੌਲਾਨਾ ਮੁਹੰਮਦ ਉਸਮਾਨ ਰਹਿਮਾਨੀ ਲੁਧਿਆਣਵੀ ਨੇ ਕਿਹਾ ਕਿ ਸੂਬੇ ਦੇ ਜ਼ਿਆਦਾਤਰ ਮੁਸਲਿਮ ਨਾਗਰਿਕ ਮੱਧਵਰਗੀ ਜਾਂ ਗ਼ਰੀਬੀ ਰੇਖਾਂ ਤੋਂ ਹੇਠਾਂ ਹਨ, ਨੂੰ ਆਰਥਿਕ, ਸਮਾਜਿਕ ਅਤੇ ਵਿੱਦਿਅਕ ਪੱਧਰ ’ਤੇ ਪੈਰਾਂ ਸਿਰ ਕਰਨ, ਪੁੰਨਰ-ਨਿਵਾਸ ਅਤੇ ਸ਼ਸਤਰੀਕਰਨ ਲਈ ਵਿਸ਼ੇਸ਼ ਯੋਜਨਾਵਾਂ ਉਲੀਕੀਆਂ ਜਾਣੀਆਂ ਚਾਹੀਦਾ ਹਨ। ਉਨ੍ਹਾਂ ਕਿਹਾ ਕਿ ਵਿੱਦਿਅਕ ਤੌਰ ’ਤੇ ਮੁਸਲਿਮ ਭਾਈਚਾਰੇ ਦੇ ਵਿਦਿਆਰਥੀ ਜੋ ਪਰੰਪਰਾਗਤ ਅਕਾਦਮਿਕ ਸਿੱਖਿਆਂ ਗ੍ਰਹਿਣ ਕਰ ਰਹੇ ਹਨ, ਦੇ ਨਾਲ-ਨਾਲ ਉਨ੍ਹਾਂ ਲਈ ਧਾਰਮਿਕ ਸਿੱਖਿਆ ਲਈ ਚਲਾਏ ਜਾ ਰਹੇ ਮਦਰਸਿਆਂ ਨੂੰ ਵੱਧ ਤੋਂ ਵੱਧ ਵਿੱਤੀ ਸਹਾਇਤਾ ਕਰਨੀ ਚਾਹੀਦੀ ਹੈ। ਇਸ ਤੋਂ ਇਲਾਵਾ ਮੁਸਲਿਮ ਭਾਈਚਾਰੇ ਦੀਆਂ ਕਬਰਸਤਾਨਾਂ ਲਈ ਜ਼ਮੀਨ ਦੀ ਥੋੜ੍ਹ ਹੈ, ਨੂੰ ਪੁਰ ਕਰਨ ਲਈ ਵੀ ਉਪਰਾਲੇ ਕਰਨੇ ਚਾਹੀਦੇ ਹਨ। ਉਨ੍ਹਾਂ ਮੁਸਲਮਾਨਾਂ ਨੂੰ ਤਾਕੀਦ ਕੀਤੀ ਕਿ ਉਹ ਸੂਬੇ ’ਚ ਭਾਈਚਾਰਕ ਮਜ਼ਬੂਤ ਕਰਨ, ਲੋੜਵੰਦਾਂ ਦੇ ਨਾਲ ਖੜਨ ਅਤੇ ਮਨੁੱਖੀ ਸਾਂਝ ਨੂੰ ਹੋਰ ਮਜ਼ਬੂਤ ਕਰਨ ਲਈ ਪ੍ਰਤੀਬੱਧ ਰਹਿਣ। ਉਨ੍ਹਾਂ ਕਿਹਾ ਕਿ ਦੇਸ਼ ਦੇ ਮੌਜੂਦਾ ਹਾਲਤਾਂ ਨੂੰ ਦੇਖਦਿਆਂ ਘੱਟ ਗਿਣਤੀਆਂ ਨੂੰ ਕੌਮੀ ਪੱਧਰ ’ਤੇ ਇੱਕਜੁੱਟਤਾ ਦੀ ਅਹਿਮ ਜ਼ਰੂਰਤ ਹੈ, ਜਿਸ ਲਈ ਘੱਟ ਗਿਣਤੀ ਆਗੂਆਂ ਨੂੰ ਸਕਰਾਤਮਕ ਪਹੁੰਚ ਅਪਣਾਉਣੀ ਚਾਹੀਦੀ ਹੈ। ਇਸ ਮੌਕੇ ਜ਼ਿਲ੍ਹਾ ਸਕੱਤਰ ਬਹਾਦਰ ਖਾਂ, ਉਪ ਪ੍ਰਧਾਨ ਫ਼ਿਰੋਜ਼ ਖਾਂ, ਬਲਾਕ ਪ੍ਰਧਾਨ ਸਿਕੰਦਰ ਖਾਂ, ਅਫਤਾਬ ਖਾਂ, ਬਾਰੂ ਖਾਂ, ਜੱਗੀ ਖਾਂ, ਮੁਹੰਮਦ ਮਕਸੂਦ ਆਦਿ ਹਾਜ਼ਰ ਸਨ।