ਇਕੋ ਰਾਤ 'ਚ ਅੱਧੀ ਦਰਜਨ ਟਿਊਬਵੈੱਲਾਂ ਦੀਆਂ ਕੇਬਲਾਂ ਚੋਰੀ
ਅਜੀਤ ਡੈਸਕ
30-01-2020
ਲਾਲੜੂ, 29 ਜਨਵਰੀ (ਰਾਜਬੀਰ ਸਿੰਘ)-ਇਲਾਕੇ ਵਿਚ ਇਕ ਹੀ ਰਾਤ 'ਚ ਚੋਰਾਂ ਵਲੋਂ 5 ਕਿਸਾਨਾਂ ਦੇ ਖੇਤਾਂ ਵਿਚ ਲੱਗੇ ਅੱਧੀ ਟਿਊਬਵੈੱਲਾਂ ਦੀ ਮੋਟਰਾਂ ਨੂੰ ਨਿਸ਼ਾਨਾ ਬਣਾ ਕੇ ਹਜ਼ਾਰਾਂ ਰੁਪਏ ਦੀ ਕੇਬਲ ਚੋਰੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਕਿਸਾਨਾਂ ਨੇ ਕੇਬਲ ਚੋਰੀ ਦੀ ਸੂਚਨਾ ਲੈਹਲੀ ਪੁਲਿਸ ਨੂੰ ਦੇ ਦਿੱਤੀ ਹੈ | ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ | ਪਿੰਡ ਜਲਾਲਪੁਰ ਅਤੇ ਬਸੀ ਦੇ ਕਿਸਾਨ ਮਹਿੰਦਰ ਸਿੰਘ, ਗੁਰਦੇਵ ਸਿੰਘ, ਜਰਨੈਲ ਸਿੰਘ, ਅਵਤਾਰ ਸਿੰਘ, ਜਨਕ ਸਿੰਘ ਨੇ ਦੱਸਿਆ ਕਿ ਮੰਗਲਵਾਰ-ਬੁੱਧਵਾਰ ਦੀ ਦਰਮਿਆਨੀ ਰਾਤ ਨੂੰ ਚੋਰ ਤਾਲੇ ਤੋੜ ਕੇ 5 ਕਿਸਾਨਾਂ ਦੇ ਅੱਧੀ ਦਰਜਨ ਟਿਊਬਵੈੱਲਾਂ ਦੀ ਮੋਟਰਾਂ ਤੋਂ ਕੇਬਲ ਵੱਢ ਕੇ ਲੈ ਗਏ | ਕਿਸਾਨਾਂ ਨੇ ਦੱਸਿਆ ਕਿ ਇਕ ਟਿਊਬਵੈੱਲ 'ਤੇ ਕਰੀਬ 80 ਫੁੱਟ ਲੰਬੀ ਕੇਬਲ ਦੀ ਤਾਰ ਲੱਗਦੀ ਹੈ, ਜਿਸਦੀ ਕੀਮਤ ਹਜ਼ਾਰਾਂ ਵਿਚ ਹੈ | ਉਨ੍ਹਾਂ ਦੱਸਿਆ ਕਿ ਪਿੰਡ ਲੈਹਲੀ ਦੇ ਕਿਸਾਨ ਬਲਜਿੰਦਰ ਸਿੰਘ ਦੇ ਟਿਊਬਵੈੱਲ ਦੇ ਕਮਰੇ ਦਾ ਤਾਲਾ ਨਾ ਟੁੱਟਣ ਕਾਰਨ ਬਚਾਅ ਰਿਹਾ | ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਜਨਵਰੀ ਦੇ ਮਹੀਨੇ ਵਿਚ ਵੀ ਇਨ੍ਹ ਕਿਸਾਨਾਂ ਦੀ ਮੋਟਰਾਂ ਦੀਆਂ ਕੇਬਲਾਂ ਚੋਰੀ ਹੋਈਆਂ ਸਨ | ਵਾਰ-ਵਾਰ ਇਸ ਤਰ੍ਹਾਂ ਕਿਸਾਨਾਂ ਦੇ ਟਿਊਬਵੈਲਾਂ ਦੀਆਂ ਮੋਟਰਾਂ ਦੀਆਂ ਕੇਬਲਾਂ ਚੋਰੀ ਹੋਣ ਕਾਰਨ ਕਿਸਾਨਾਂ ਨੂੰ ਆਰਥਿਕ ਨੁਕਸ਼ਾਨ ਝੱਲਣਾ ਪੈ ਰਿਹਾ ਹੈ |
