ਕੁਰਾਲੀ, 29 ਜਨਵਰੀ (ਹਰਪ੍ਰੀਤ ਸਿੰਘ)-ਕੁਰਾਲੀ ਵਿਚਲੇ ਡਾਕਘਰ ਦਾ ਕੰਪਿਊਟਰ ਸਿਸਟਮ ਕਈ ਦਿਨਾਂ ਤੋਂ ਖਰਾਬ ਹੋਣ ਕਾਰਨ ਜਿਥੇ ਪੈਸਿਆਂ ਦਾ ਲੈਣ-ਦੇਣ ਇਕ ਹਫ਼ਤੇਂ ਤੋਂ ਪੂਰੀ ਤਰ੍ਹਾਂ ਠੱਪ ਪਿਆ ਹੈ, ਉਥੇ ਡਾਕਘਰ ਨਾਲ ਸਬੰਧਿਤ ਕੰਮਾਂ ਲਈ ਲੋਕਾਂ ਨੂੰ ਖੱਜਲ ਖੁਆਰ ਹੋ ਕੇ ਹੋਰ ਸ਼ਹਿਰਾਂ ਦੇ ਡਾਕਘਰਾਂ ਵਿਚ ਜਾਣਾ ਪੈ ਰਿਹਾ ਹੈ | ਸਥਾਨਕ ਸਿੰਘਪੁਰਾ ਰੋਡ 'ਤੇ ਸਥਿਤ ਡਾਕਘਰ ਵਿਖੇ ਪਹੁੰਚੇ ਲੋਕਾਂ ਨੇ ਦੱਸਿਆ ਕਿ 23 ਜਨਵਰੀ ਤੋਂ ਡਾਕਘਰ ਦਾ ਕੰਪਿਊਟਰ ਖਰਾਬ ਹੈ, ਜਿਸ ਕਾਰਨ ਡਾਕਘਰ ਵਿਚ ਕੰਮ ਲਈ ਆਉਣ ਵਾਲੇ ਲੋਕਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਇਸ ਸਬੰਧੀ ਵਾਰਡ ਨੰ. 14 ਵਾਸੀ ਦਵਿੰਦਰ ਸਿੰਘ ਨੇ ਦੱਸਿਆ ਕਿ ਉਸਨੇ ਡਾਕਘਰ ਵਿਚ ਖੁਲਵਾਏ ਖਾਤੇ ਵਿਚੋਂ ਪੈਸੇ ਕਢਵਾਉਣੇ ਸਨ | ਉਨ੍ਹਾਂ ਕਿਹਾ ਕਿ ਉਹ ਪਿਛਲੇ ਕਈ ਦਿਨਾਂ ਤੋਂ ਡਾਕਘਰ ਵਿਚ ਚੱਕਰ ਲਗਾ ਰਹੇ ਹਨ ਪਰ ਰੋਜ਼ਾਨਾ ਹੀ ਉਨ੍ਹਾਂ ਨੂੰ ਬਗੈਰ ਪੈਸਿਆਂ ਤੋਂ ਪਰਤਣਾ ਪੈ ਰਿਹਾ ਹੈ | ਇਸੇ ਦੌਰਾਨ ਯਾਦਵਿੰਦਰ ਗੌੜ ਅਤੇ ਅਜੈ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪੋ ਆਪਣੀਆਂ ਸੰਸਥਾਵਾਂ ਦੇ ਦਫ਼ਤਰੀ ਕੰਮ ਲਈ ਰਜਿਸਟਰੀਆਂ ਕਰਵਾਉਣੀਆਂ ਸਨ | ਇਸ ਸਬੰਧੀ ਸੰਪਰਕ ਕਰਨ 'ਤੇ ਡਾਕਘਰ ਦੇ ਸਹਾਇਕ ਪੋਸਟਮਾਸਟਰ ਗੁਰਚਰਨ ਸਿੰਘ ਨੇ ਡਾਕਘਰ ਦੇ ਕੰਪਿਊਟਰ ਸਿਸਟਮ ਵਿਚ ਆਈ ਖਰਾਬੀ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਤਕਨੀਕੀ ਖਰਾਬੀ ਕਾਰਨ ਇਹ ਸਮੱਸਿਆ ਆਈ ਹੈ | ਉਨ੍ਹਾਂ ਕਿਹਾ ਕਿ ਸਿਸਟਮ ਛੇਤੀ ਹੀ ਚਾਲੂ ਕਰਨ ਲਈ ਯਤਨਸ਼ੀਲ ਹਨ |
