ਨਵੇਂ ਵਰ੍ਹੇ ਦਿਆ ਸੂਰਜਾ <h4> * ਪ੍ਰੋ: ਜਸਵੰਤ ਸਿੰਘ ਗੰਡਮ * </h4>

ਨਵੇਂ ਸਾਲ ਦਿਆ ਸੂਰਜਾ, ਸੁਪਨੇ ਕਰ ਦੇ ਸੱਚ,
ਕੁੱਲੀਆਂ, ਛੰਨਾਂ, ਕੁੰਦਰਾਂ, ਢਾਰਿਆਂ ਦੇ ਵਿਚ ਮੱਚ।
ਨਵੇਂ ਸਾਲ ਦਿਆ ਸੂਰਜਾ, ਹਾਕਮਾਂ ਨੂੰ ਦੱਸ ਦੇ,
ਲੋਕਸ਼ਾਹੀ ਦੀ ਖੀਰ 'ਚ, ਪਾਵਣ ਨਾ ਉਹ ਖੇਹ।
ਨਵੇਂ ਸਾਲ ਦਿਆ ਸੂਰਜਾ, ਇਹ ਕੈਸੀ ਵਗੀ ਵਾ,
ਪੰਜਾਬੀ ਤਾਂ ਸਭ ਪੈ ਗਏ, ਪਰਦੇਸਾਂ ਦੇ ਰਾਹ।
ਨਵੇਂ ਸਾਲ ਦਿਆ ਸੂਰਜਾ, ਬੁੱਢਿਆਂ ਦੀ ਲੈ ਸਾਰ,
ਪਏ ਡੱਕੇ ਡੋਲੇ ਖਾਂਵਦੇ, ਗਈ 'ਡੰਗੋਰੀ' ਬਾਹਰ।
ਨਵੇਂ ਸਾਲ ਦਿਆ ਸੂਰਜਾ,
ਕਰ ਐਸੀ ਅਰਦਾਸ,
ਮੋੜਾ ਕਿਧਰੇ ਪੈ ਜਾਏ,
ਪਲਟ ਪਵੇ ਪਰਵਾਸ।
ਨਵੇਂ ਸਾਲ ਦਿਆ ਸੂਰਜਾ,
ਚਾਨਣ ਕਰ ਚੁਫੇਰ,
ਕਾਲੀ ਬੋਲੀ ਰਾਤ ਦਾ,
ਮਿਟ ਜਾਏ ਘੁੱਪ-ਅੰਧੇਰ।
ਨਵੇੇਂ ਸਾਲ ਦਿਆ ਸੂਰਜਾ,
ਸੱਜਰੀ ਸੋਨ ਸਵੇਰ,
ਕਲੀਆਂ, ਗੇਂਦਾਂ 'ਤੇ ਗੁਲਾਬ,
ਨੱਚਣ ਕੁਮਦ ਕਨੇਰ।

ਮੋਬਾਈਲ : 98766-55055.