ਗੁਰ ਨਾਨਕ ਸਭ ਕੇ ਸਿਰਤਾਜਾ

ਅੱਜ ਹਰ ਪਾਸਿਉਂ ਵਧਾਈਆਂ ਆਉਣ ਲੱਗੀਆਂ |
ਪੌਣਾਂ ਪਹਿਲੇ ਪਾਤਸ਼ਾਹ ਦੇ ਗੀਤ ਗਾਉਣ ਲੱਗੀਆਂ |

ਸੱਚੇ ਪਾਤਸ਼ਾਹ ਦੇ ਪ੍ਰਕਾਸ਼ ਦਾ ਦਿਹਾੜਾ ਆਇਆ
ਖ਼ੁਸ਼ੀ ਵਿਚ ਝੂਮ ਰੂਹਾਂ ਪੈਲਾਂ ਪਾਉਣ ਲੱਗੀਆਂ |

ਸਾਰੀ ਕਾਇਨਾਤ ਵਿਚ ਛਾ ਗਿਆ ਖ਼ੁਮਾਰ ਕੋਈ
ਝੂਮ ਝੂਮ ਆਤਮਾਵਾਂ ਨਸ਼ਿਆਉਣ ਲੱਗੀਆਂ |

ਚੰਨ ਅਤੇ ਤਾਰਿਆਂ ਨੇ ਝਿਲਮਿਲੀ ਨਾਚ ਪਾਇਆ
ਸੂਰਜੀ ਸ਼ੁਆਵਾਂ ਚਾਨਣੀ ਵਿਛਾਉਣ ਲੱਗੀਆਂ |

ਸਾਰਿਆਂ ਦੇ ਸਾਂਝੇ ਸਤਿਗੁਰੂ ਜੀ ਦੇ ਪਿਆਰ ਵਿਚ
ਯਾਦਾਂ ਦੀਆਂ ਸੀਤਲ ਘਟਾਵਾਂ ਛਾਉਣ ਲੱਗੀਆਂ |

ਰੰਗ ਰਸ ਰੂਪ ਖ਼ੁਸ਼ਬੂਆਂ ਅਤੇ ਰੌਸ਼ਨੀਆਂ
ਧੰਨ ਨਿਰੰਕਾਰ ਦੀਆਂ ਬਾਤਾਂ ਪਾਉਣ ਲੱਗੀਆਂ |

ਸਾਰੀ ਹੀ ਮਨੁੱਖਤਾ ਹੈ ਸ਼ੁਕਰਾਂ 'ਚ ਭਰੀ ਹੋਈ
ਅਦਬਾਂ ਦੇ ਮੋਤੀ ਅੱਖਾਂ ਬਰਸਾਉਣ ਲੱਗੀਆਂ |

ਧਰਤੀ ਦਾ ਕੋਨਾ ਕੋਨਾ ਮਹਿਕ ਰਿਹਾ ਯਾਦ ਵਿਚ
ਅੱਜ ਵੀ ਉਡੀਕਾਂ ਸੁੱਚਾ ਪੀੜ੍ਹਾ ਡਾਹੁਣ ਲੱਗੀਆਂ |

ਭਿੱਜ ਗਈਆਂ ਰੂਹਾਂ ਸੱਚੇ ਪਾਤਸ਼ਾਹ ਦੇ ਪਿਆਰ ਵਿਚ
ਮਿਹਰਾਂ ਤੇ ਮੁਹੱਬਤਾਂ ਨੇ ਯਾਦ ਆਉਣ ਲੱਗੀਆਂ |

ਲੱਖਾਂ ਹੀ ਡੰਡਉਤਾਂ ਮੇਰੇ ਸਾਹਿਬਾਂ ਦੇ ਚਰਨਾਂ 'ਚ
ਸਾਰੀਆਂ ਫ਼ਿਜ਼ਾਵਾਂ ਅੱਜ ਮੁਸਕਾਉਣ ਲੱਗੀਆਂ |