ਝੁੱਗੀਆਂ ਤੇ ਢਾਰਿਆਂ ਵਾਲਿਓ
ਛੰਨਾ ਚੁਬਾਰਿਆਂ ਵਾਲਿਓ
ਭਰ ਭਰ ਮੁਹੱਬਤ ਚੂੰਗੜੇ
ਅੱਜ ਰਾਤੀਂ ਬਾਲਿਓ
ਉੱਚੇ ਜੋ ਦਿੱਸਣ ਚਬੂਤਰੇ
ਇੱਥੇ ਲੋਕ ਦੀਂਹਦੇ ਸਿਰਫਿਰੇ
ਬਾਰੂਦ ਨੂੰ ਅੱਗ ਲਾਉਣਗੇ
ਅੰਬਰੀਂ ਧਮਾਕੇ ਪਾਉਣਗੇ
ਤੁਸੀਂ ਆਪਣਾ ਘਰ ਸੰਭਾਲਿਓ
ਲੋਕੋ ਓ ਭੋਲੇ ਭਾਲਿਓ
ਓਏ ਜਨੌਰੋ ਓਏ ਰਾਣਿਓ
ਸਮੇਂ ਦੀ ਨਬਜ਼ ਪਛਾਣਿਓਂ
ਬੋਟਾਂ ਦੇ ਕੋਲ ਬੈਠੇ ਰਹੋ
ਖੰਭਾਂ ਨੂੰ ਫੁਰਸਤ ਦਿਓ
ਉਡਿਓ ਨਾ ਖੰਭਾਂ ਵਾਲਿਓ
ਮੋਹਵੰਤਿਓ, ਮੋਹ ਵਾਲਿਓ
ਜਦ ਪੌਣ ਰੋਂਦੀ ਸੁਣੂੰਗੀ
ਸਾਹਾਂ 'ਚੋਂ ਜ਼ਹਿਰਾਂ ਪੁਣੂੰਗੀ
ਸੋਚਿਓ ਤੇ ਕੁਝ ਵਿਚਾਰਿਓ
ਕੁਝ ਅਕਲ ਨੂੰ ਹੱਥ ਮਾਰਿਓ
ਸਾਹਾਂ ਨਾਲ ਖੇਡਣ ਵਾਲਿਓ
ਨਾ ਹਾਰ ਪੱਲੇ ਪਾਲਿਓ
ਇਹ ਜਸ਼ਨ ਕਿਸ ਵਿਚਾਰ ਦਾ
ਕੁਦਰਤ ਨੂੰ ਜੋ ਲਲਕਾਰਦਾ
ਇਹ ਪੋਟਾਸ਼ ਆਤਿਸ਼ਬਾਜ਼ੀਆਂ
ਸਾਹ ਖਾਂਦੇ ਉਲਟਬਾਜ਼ੀਆਂ
ਖ਼ੁਸ਼ੀਆਂ ਮਨਾਵਣ ਵਾਲਿਓ
ਮਨ ਨਾਲ ਦੀਵੇ ਬਾਲਿਓ
-ਮੋਬਾਈਲ : 097806-67686
